ლალი ჩხიკვაძე

არსებობს უამრავი მითი ქალის სექსუალურ ჯანმრთელობასა და დისფუნქციაზე და ასეთი დეზინფორმაცია ძალიან საზიანოა - ქალებს კიდევ უფრო რცხვენიათ თავიანთი სექსუალური პრობლემების განხილვის, რაც ქმნის ბარიერს ნორმალურ სექსუალურ გამოხატვისთვის.

მითი 1: სექსუალური დისფუნქცია იშვიათია ქალებში

• ფაქტი: სქესობრივად აქტიური ქალების 30-დან 50 პროცენტამდე განიცდის სექსუალური დისფუნქციის გარკვეულ ფორმას. ეს შეიძლება იყოს დაბალი ლიბიდო (სექსუალური სურვილი), ორგაზმის მიღწევის პრობლემები, ტკივილი სქესობრივი აქტის დროს. ამ დარღვევებმა შეიძლება გავლენა იქონიოს ყველა ასაკისა და ყველა სოციალური ფენის ქალზე.

თუ სექსუალური დისფუნქციის გამოვლინებები იწვევს სტრესს ან ამცირებს ცხოვრების ხარისხს, აუცილებელია სპეციალისტის კონსულტაცია.

მითი 2: ქალებში ყველა სექსუალური პრობლემა ტვინიდან მოდის

• ფაქტი: სექსუალურ ჯანმრთელობაზე გავლენას ახდენს მრავალი ფაქტორი — ფიზიოლოგიური, ემოციური, სოციალური და გარემო.

ამრიგად, სექსუალურ დისფუნქციას შეიძლება თან ახლდეს გარკვეული ფიზიკური დაავადებები და მედიკამენტების გამოყენება. ფსიქიკურმა აშლილობებმა, მაგალითად დეპრესიამ და შფოთვამ, ისევე როგორც მათ სამკურნალოდ გამოყენებულმა მედიკამენტებმა, შეიძლება მნიშვნელოვნად შეუწყოს ხელი სექსუალური პრობლემების განვითარებას. გარდა ამისა, ურთიერთობის პრობლემებმა, ფსიქოლოგიურმა ტრავმამ ან ძალადობამ შეიძლება გამოიწვიოს სექსუალური დისფუნქცია.

ამიტომ, რაიმე ფიზიოლოგიური პრობლემის გამორიცხვის მიზნით, ყოველთვის საჭიროა ექიმთან კონსულტაცია.

სპეციალისტს შეუძლია დაადგინოს სექსუალური პრობლემების გამომწვევი მიზეზები და შეიმუშაოს პერსონალიზებული მკურნალობის გეგმა სექსუალური სიამოვნების, ინტიმური ურთიერთობისა და სექსისგან კმაყოფილების გასაძლიერებლად.

სექსთან ან რაიმე სახის ძალადობასთან დაკავშირებული ტრავმული გამოცდილების შემთხვევაში, სპეციალისტი ამ ტრავმის ჯანსაღად გადამუშავებაში დაეხმარება პაციენტს.

მითი 3: ქალებს უფრო დაბალი სექსუალური ლტოლვა აქვთ ვიდრე მამაკაცებს.

• ფაქტი: სექსუალური ლტოლვა ყველასთვის განსხვავებულია, ის შეიძლება გაქრეს, შეიცვალოს დროთა განმავლობაში და სხვადასხვა გარემოებებში. ეს თანაბრად ეხება როგორც მამაკაცებს, ასევე ქალებს. ჰორმონები, ავადმყოფობა, სტრესი, დაღლილობა, ურთიერთობების პრობლემები - ყველა ეს ფაქტორი, რომელსაც ვერ ვაკონტროლებთ, გავლენას ახდენს ჩვენს ლიბიდოზე.

ამიტომ, მნიშვნელოვანია გვესმოდეს, რომ სექსის სურვილის ხარისხის მერყეობა, ისევე როგორც პარტნიორებს შორის სექსუალური ლტოლვის განსხვავება, სრულიად ნორმალური მოვლენაა და სულაც არ მიუთითებს პრობლემის არსებობაზე.

მითი 4: ქალებისთვის ნორმალურია ტკივილის შეგრძნება სქესობრივი აქტის დროს.

• ფაქტი: სექსის დროს ტკივილი (დისპარეუნია) არ არის ნორმალური და არ უნდა იყოს იგნორირებული. მუცლის ტკივილის ან თავის ტკივილის მსგავსად, დისპარეუნიის შემთხვევაში, მიზეზის დასადგენად საჭიროა ექიმის კონსულტაცია.

ეს შეიძლება მოიცავდეს ფიზიოლოგიურ დარღვევებს (ვაგინალური ინფექციები, მენჯის ღრუს ანთებითი დაავადება, ენდომეტრიოზი, ვულვოდინია, ვაგინალური ატროფია), კუნთოვანი სისტემის პრობლემებს, ჰორმონალურ ცვლილებებს, ფსიქიკურ და ფსიქოლოგიურ პრობლემებს.

ასევე ძალიან მნიშვნელოვანია ინტიმური ურთიერთობის, ურთიერთგაგებისა და თანადგომის შენარჩუნება, პარტნიორთან ღიად და გულწრფელად სქესობრივი აქტის დროს მტკივნეული შეგრძნებების განხილვა.

მითი 5: დაბერება იწვევს ქალის სექსუალური ფუნქციის დაქვეითებას

• ფაქტი: დაბერებასთან დაკავშირებულმა ჰორმონალურმა ცვლილებებმა შეიძლება გავლენა იქონიოს ქალის სექსუალურ ფუნქციაზე. თუმცა, ბევრ ხანდაზმული ქალი აგრძელებს სექსის სიყვარულსა და სიამოვნებას.

საქმე იმაშია, რომ ჰარმონიაში უნდა იყოს ქალი საკუთარ სხეულთან და გონებასთან. ამისთვის ასევე მნიშვნელოვანია პარტნიორთან ღია, გულახდილი კომუნიკაცია - მენოპაუზის შემდეგ, სექსუალური სიამოვნებისა და კმაყოფილების მისაღებად, განსაკუთრებულად მნიშვნელოვანია ხანგრძლივი პრელუდია, მგრძნობიარე შეხება, ეროტიული მოფერება, მოდუნება და პარტნიორთან ემოციური კავშირის განცდა.