ქალისა და მამაკაცის ურთიერთობის ნიუანსები
როგორია მისი პირველი შთაბეჭდილება? სამწუხაროდ, ეს არის თემა და კითხვა, რომელზეც პასუხის გაცემა მამაკაცებს არ უყვართ. თუმცა ვინ არ ოცნებობს იმაზე, იცოდეს, რა ხდება მამაკაცის თავში ამ დროს? ქვემოთ კი მოცემულია კაცის ყველაზე გავრცელებული ფიქრები, რომლებიც შესაძლოა ძლიერი სქესის წარმომადგენელს გონებაში უტრიალებდეს პირველი პაემ/.ნის დროს.
არომატები
ყველასთვის ცნობილია, რომ პირველი შეხედულებები და შთაბეჭდილებები ვიზუალური მახასიათებლების მიხედვით ყალიბდება. ვიღაცას შესაძლოა უცნაურად მოეჩვენოს, მაგრამ მამაკაცების გარკვეული ნაწილი ქალებს არომატებით განასხვავებს. მეტად უსიამოვნოა, თუ პარტნიორი ქალზე ფიქრობს: „რა ცუდი სუნი ასდის“. ამ შემთხვევაში სუნამოებსა და სხვადასხვა ჰიგიენურ საშუალებაზეა საუბარი, რომელთა არომატმაც შესაძლოა მამაკაცი გააღიზიანოს. ამიტომ პირველ პაემანზე თქვენთვის საყვარელი სუნამო გამოიყენეთ და გადაჭარბებულ კრემებსა და სხვა არომატებზე უარი თქვით. წინააღმდეგ შემთხვევაში შესაძლოა მეორე პაემანი არც კი შედგეს.
საუბრები სამსახურზე
კარგი იქნება, რაც უფრო მოკლედ ისაუბრებთ იმ თემაზე, რასაც მუშაობა და თანხის გამომუშავება ჰქვია. შეგიძლიათ, რაც შეიძლება მოკლედ მოუყვეთ, თუ რით ხართ დაკავებული და შემდეგ ეს თემა საერთოდ დაივიწყოთ. პირველივე პაემანზე იმაზე საუბარი, რამდენად დაკავებული ხართ და კარიერული წინსვლისთვის რა გეგმები გაქვთ შემუშავებული, ნამდვილად დააფრთხობს თქვენს პარტნიორს და რამდენიმე წუთით მარტო დარჩენის შემთხვევაშიც კარგს არაფერს აფიქრებინებს. ეს ყველაფერი რაც შეიძლება მოკლე, რამდენიმესიტყვიანი და ლაკონიური უნდა იყოს. თუ თქვენ იმაზე საუბარს დაიწყებთ, თუ როგორ არ მოგწონთ თქვენი თანამშრომლები და ხელმძღვანელობა, მაშინ მამაკაცი აუცილებლად იფიქრებს, რომ არასასიამოვნო ადამიანი ხართ სხვათათვის.
ფინანსები და პირველი პაემანი
კარგი იქნება, თუ პირველი პაემანი ერთი ფინჯანი ყავით ჩაივლის. თუ მამაკაცს საკმაოდ დიდი გადასახადის გადახდა მოუწევს პირველივე პაემანზე, მაშინ იცოდეთ, რომ მეორე პაემანზე შესაძლოა საერთოდ აღარც კი იფიქროს. არავითარ შემთხვევაში არ მისცეთ კაცს უფლება პირველივე შეხვედრისას საყვარელი წიგნივით ამოგიკითხოთ.
ძალიან კარგია, ქალს რომ არ შეუძლია კაცის აზრების კითხვა, რომლებიც პირველ შთაბეჭდილებასა და სუსტი სქესის გარეგნობასთან არის დაკავშირებული. შესაძლოა, ფიზიკური მონაცემები მამაკაცმა პირველ ადგილზე არ დააყენოს, მაგრამ გახსოვდეთ, რომ ეს ყველაფერი ერთგვარ მთავარ როლს მაინც ასრულებს. მთავარია, თქვენი ხასიათის დადებითი მახასიათებლები გამოავლინოთ, რაც გადაფარავს გარკვეულ ვიზუალურ ნაკლს. ამ შემთხვევაში მამაკაცი აუცილებლად დაფიქრდება ურთიერთობის შემდგომ განვითარებაზე.
როგორც მამაკაცები, ასევე ქალებიც ხშირად კარგავენ მეორე ნახევარს. გარკვეული დროის შემდეგ კი უბრალოდ ხვდებიან, რომ მათ უარი არ უნდა თქვან პაემანზე. რა თქმა უნდა, ძალიან არასასიამოვნოა, როცა პაემანზე იმ მამაკაცთან ერთად წახვალთ, რომელმაც ეს ნაბიჯი მხოლოდ მოწყენილობის გამო გადადგა. ამ შემთხვევაში, ქალებო, იცოდეთ, რომ მამაკაცები რომანტიკასა და სიყვარულზე ნამდვილად არ ფიქრობენ, მათ გული გართობისკენ მიუწევთ.
ურთიერთობების გაწყვეტა საწინააღმდეგო სქესის წარმომადგენლებთან, შესაძლოა, უპირველეს სასაუბრო თემად იქცეს. ეს არის საკითხი, რომელიც არც პირველ, არც მეორე პაემანზე და არც დაქორწინების შემდეგ ფართოდ არ უნდა განიხილოთ. ამ თემაზე ისაუბრეთ შინ, დედასთან ან უახლოეს მეგობრებთან. წინააღმდეგ შემთხვევაში კაცი ბრაზიან და საკმაოდ უსიამოვნო პიროვნებად ჩაგთვლით. უფრო მეტიც, მამაკაცმა შეიძლება იფიქროს, რომ თქვენ ძველებურად გიყვართ ყოფილი პარტნიორი.
ხშირად არის შემთხვევები, როცა კაცს იმდენად უყვარს ქალი პირველივე პაემანზე, რომ სისულელეების ლაპარაკს იწყებს. შესაძლოა, მამაკაცი იმდენად შეყვარებული იყოს, რომ ამ თემაზე უარყოფითი პასუხის შიშით საუბარიც კი არ უნდოდეს. შეგიძლიათ ამ შემთხვევაში მას გახსნაში დაეხმაროთ. რა თქმა უნდა, ასეთი მოზღვავებული ენთუზიაზმი მას შეაშინებს, მაგრამ საკუთარ გრძნობებზე საუბარს აუცილებლად დაიწყებს.
რა უნდათ ქალებს მამაკაცებისაგან?
მამაკაცები ხშირად ამბობენ, რომ ვერ ხვდებიან, რა სურთ ქალებს და მათი გაგება უჭირთ. სწორედ ამიტომ, ბევრი მათგანი მარტოობას ამჯობინებს.
ახალი კვლევების უმეტესობა ამტკიცებს, რომ თანამედროვე ქალისათვის უკვე სულერთია, ქერა იქნება თუ შავგვრემანი, რამდენი აქვს შემოსავალი, ან რა მანქანა ჰყავს მის მეორე ნახევარს. თანამედროვე ქალისათვის მთავარია – ურთიერთგაგება! ქალს სწორედ ემპათია ანიჭებს ბედნიერებას.
აღნიშნული საკითხი ჰარვარდის მედიცინის სკოლის მეცნიერებმა იკვლიეს. მკვლევრებმა ის 156 წყვილი შეისწავლეს (აქედან 102 ახალგაზრდების, ხოლო 54 უფროსი ასაკის იყო), რომელთაც ხანგრძლივი ურთიერთობა ჰქონდათ, მათი 56 პროცენტი დაოჯახებული იყო.
კვლევის მონაწილეები კითხვებს პასუხობდნენ, რომელთა უმეტესობაც ეხებოდა იმას, თუ რატომ ცხოვრობენ კონკრეტულად ამ პარტნიორთან და არა სხვასთან.
შედეგი საკმაოდ საინტერესო აღმოჩნდა. ქალებს, რომელთა მეორე ნახევარს შეეძლო გაეგო, თუ რატომ ბრაზდება მისი პარტნიორი, ურთიერთობით კმაყოფილების მაღალი მაჩვენებელი ჰქონდათ.
საინტერესოა, რომ ურთიერთგაგება თავად მამაკაცსაც ბედნიერებას ანიჭებს. ვისაც მეგობარი ქალის ემოციის გამოცნობა შეეძლო, თავად ურთიერთობით უფრო მეტად კმაყოფილი იყო, ვიდრე სხვები.
რჩევები ქალებს
კომპლიმენტების მიღება ქალებისა და კაცებისათვის ერთნაირად სასიამოვნოა, თუმცა მათ განსხვავებულად აღიქვამენ, რაც ერთს სიამოვნებს და უხარია, მეორეს შეიძლება ეწყინოს, მესამე კი არც მოგისმენთ. ალბათ, გაგიგიათ, ქალებს ყურებით უყვართ, მამაკაცებს კი – თვალებითო. მაგრამ თბილი სიტყვა ვის არ ესიამოვნება? რაც უფრო გულწრფელია კომპლიმენტი, მით უფრო დადებით ემოციებს იწვევს. კომპლიმენტები მამაკაცებისათვის:
„ყველაფერი გამოგივა!“ – უთხარით ეს თქვენს მამაკაცებს, როდესაც საქმე მის შესაძლებლობებს ეხება. არ აქვს მნიშვნელობა, სად უწევს ამ შესაძლებლობების გამოვლენა: სამზარეულოში, ავტოფარეხში, სამსახურსა თუ საწოლში. კაცებისთვის ძალიან მნიშვნელოვანია, რომ მათი სჯეროდეთ და ენდობოდნენ. ეს მოტივაციას ზრდის. „შენთან თავს დაცულად/ბედნიერად ვგრძნობ!“ – დიდი გრძნობით ნათქვამი სიტყვები, რომლის მოსმენაც ყველა მამაკაცისათვის ბედნიერებაა. ეს ნიშნავს, რომ მისი საქციელი მართლაც მნიშვნელოვანია და ქალი ამას ხედავს, აფასებს.
კომპლიმენტი გარეგნულ მხარეზე – როგორც ქალს, ასევე მამაკაცს თვითშეფასებას უზრდის ისეთი კომპლიმენტები, რომლებიც მის გარეგნობას ეხება. შეუქეთ თვალები, მამაკაცური მხრები, კუნთები ან ნებისმიერი რამ, რაც კომპლიმენტს იმსახურებს.
„მიყვარს, როდესაც შენთან ერთად ვარ!“ – ეს სიტყვები მამაკაცს უჩვენებს, რომ მისი სტატუსი, ფული და ფიზიკური მონაცემები ნაკლებად მნიშვნელოვანია, ვიდრე მისი შინაგანი სამყარო.
„მომწონს შენი პერანგი!“ – ჩაცმის სტილს ყველა მამაკაცი არ უთმობს დიდ დროს, თუმცა ყველას სურს კარგად გამოიყურებოდეს. ამიტომ, თუ მართლაც აცვია ის, რაც უხდება, ამის აღნიშვნა აუცილებელია.
„კარგად იცი შენი საქმე!“ – ამგვარი კომპლიმენტი მამაკაცისათვის ნიშნავს, რომ ქალი მის ძალისხმევას, მონდომებას, შრომისმოყვარეობასა და პროფესიონალიზმს ამჩნევს.
„შესანიშნავი ოჯახი/მეგობრები გყავს!“ – მამაკაცისათვის მნიშვნელოვანია, რომ მეორე ნახევარი მისი ოჯახის წევრებსა და მეგობრებს პატივს სცემდეს და მოსწონდეს.
გახსოვდეთ, მამაკაცების უმეტესობას არ უყვარს, როდესაც კომპლიმენტებს საჯარო სახე და მოფერებითი ფორმა აქვს. „ჩემო ფუმფულა“, „კნუტო“ და „ზევსო“ ინტიმური გარემოსათვის შემოინახეთ. საჯაროდ ამას თუ ეტყვით, შეურაცხყოფად უფრო აღიქვამენ, ვიდრე კომპლიმენტად.