რა ვიცით პაპილომავირუსის შესახებ
ლორწოვანზე განთავსებისას მას კონდილომებს უწოდებენ. ამგვარი ახალწარმონაქმნის მიზეზი ხშირად ადამიანის პაპილომავირუსია.
პაპილომავირუსი არა მარტო კოსმეტიკური დეფექტია, ჯანმრთელობასაც სერიოზულ საფრთხეს უქმნის. ვირუსული ინფექციების აღნიშნულ ჯგუფს შეუძლია არა მარტო კანზე კეთილთვისებიანი წარმონაქმნის, არამედ საშვილოსნოს ყელის კიბოს პროვოცირებაც. ზოგიერთი ტიპის პაპილომავირუსი შარდ-სასქესო სისტემაში პათოლოგიურ პროცესებს იწვევს. პაპილომავირუსმა შეიძლება დააზიანოს ხორხის ლორწოვანი გარსი და ონკოლოგიური დაავადების პროვოცირება მოახდინოს.
აღსანიშნავია, რომ პაპილომავირუსი არა მარტო ზრდასრულთა, არამედ ბავშვთა პრობლემაც შეიძლება გახდეს. ვითარდება როგორც მამაკაცის, ისე ქალის ორგანიზმში.
როგორ გადაეცემა ვირუსი
ინფექციის რეზერვუარსა და წყაროს დაავადებული ადამიანი წარმოადგენს. ინფექცია კონტაქტური გზით გადაეცემა. აუცილებელია ვირუსის პირდაპირი კონტაქტი კანის საფარველთან ან ლორწოვან გარსთან.
ხშირად ინფიცირება ხდება საფარველის ტრავმირებისას ინფიცირებულ ადამიანთან სქესობრივი კონტაქტის დროს.
საყოფაცხოვრებო გზით ინფიცირების შესაძლებლობა მეცნიერებმა ვერ დაამტკიცეს, თუმცა პარსვის, ეპილაციის, ასევე სამედიცინო გასინჯვის ან არასტერილური ინსტრუმენტებით მანიპულაციის დროს დასნებოვნება არ არის გამორიცხული. ჰიგიენის წესების დაუცველობა, მჭიდრო თეთრეულის ტარება ასევე შეიძლება გახდეს ინფიცირების მიზეზი.
პაპილომავირუსი მეტად კომფორტულად გრძნობს თავს წყალში 38-50 0С ტემპერატურაზეც კი. ასე რომ, აღნიშნულ პრობლემას შეიძლება წავაწყდეთ აუზზე, აბანოში, საუნაში.
თუ დედას კონდილომები აქვს, ნაყოფი სამშობიარო გზების გავლის დროს ინფიცირდება.
რა ზრდის პაპილომავირუსით ინფიცირების რისკს
ყველაზე ხშირად კონდილომები აღინეშნებათ 17-35 წლის ახალგაზრდებს. დასუსტებული იმუნიტეტის მქონე პირები განსაკუთრებით მგრძნობიარენი არიან ამ დაავადების მიმართ. პაპილომავირუსით დასნებოვნების დიდი ალბათობა აქვთ იმ ქალებს, რომლებიც ხანგრძლივად იღებენ ორალურ კონტრაცეპტივებს ან ბევრი სქესობრივი პარტნიორი ჰყავთ.
აღსანიშნავია, რომ პაპილომავირუსის ზოგიერთი ტიპი, ადეკვატური მკურნალობის გარეშე, არა მარტო აქვეითებს ორგანიზმის იმუნურ სისტემას, არამედ ონკოლოგიურ დაავადებებსაც აპროვოცირებს.
პაპილომავირუსის გამოვლენა
აღნიშნული დაავადების მთავარი თავისებურება კლინიკური ნიშნების არარსებობაა.
დასნებოვნებიდან მწვავე პრობლემების გამოვლენამდე შეიძლება რამდენიმე წელი გავიდეს. პაპილომავირუსული ინფექციისას კანის სხვადასხვა პრობლემა იჩენს თავს. ინფექციის რამდენიმე ტიპს გენიტალიების დაზიანება შეუძლია. გენიტალური წვეტიანი კონდილომები საშვილოსნოს ყელის მიდამოს ონკოლოგიური ან დისპლაზიური პრობლემების განვითარების ფონს წარმოადგენს. ამდენად, პრობლემის უყურადღებოდ დატოვება არ შეიძლება.
ინფექციის საყვარელი ადგილებია: სახის კანი, მიდამო პირის ირგვლივ, ცხვირის შესავალი, ხელის მტევანი, ხელისგული, ანოგენიტალური ტრაქტის ლორწოვანი გარსი, გენიტალიები, საზარდულის არე და სხვა.
პაპილომავირუსული ინფექცია შეიძლება გავრცელდეს კანის საფარველის ნებისმიერ უბანზე. ხშირია პაპილომები სასქესო ორგანოების, ანუსის ლორწოვანი გარსის მიდამოში. გენიტლური კონდილომების გამოვლენა წინასამშობიარო პერიოდში ბავშვისთვის პოტენციური საფრთხის შემცველია.
პაპილომავირუსულ ინფექციას რამდენიმე თავისებურება აქვს, რომლებიც დაკავშირებულია სქესთან, ორგანიზმის ფიზიოლოგიურ მდგომარეობასა და ასაკთან.
მკურნალობა
პაპილომავირუსი თავისით არ გაივლის. საბედნიეროდ, მისი მკურნალობა ხელმისაწვდომია.
ხშირად წარმონაქმნის თვითნებურად მოშორების მცდელობა არა მარტო მდგომარეობის გაუარესებას, არამედ ინფექიის გავრცელებასაც იწვევს. გასათვალისწინებელია, რომ პაპილომის ნიღბის ქვეშ შეიძლება ავთვისებიანი ხალი იმალებოდეს, რომლის მოშორებაც სიცოცხლისთვის საშიშია. ამდენად, პირველი ნიშნებისთანავე საჭიროა ექიმის კონსულტაცია.
პაპილომების მოსაშორებელი მრავალი მეთოდი არსებობს: ქირურგიული, კრიოდესტრუქცია, დიათერმოკოაგულაცია, რადიოტალღური მეთოდი, იმუნოლოგიური პრეპარატებით ადგილობრივი და სისტემური მკურნალობა.
არანამკურნალევი პაპილომები, მაგალითად, ანოგენიტალური მიდამოსი, იწვევს ნახეთქების, სისხდენის განვითარებას, მეორეული ინფექციის თანდართვას, რაც მნიშვნელოვნად აღრმავებს პრობლემას. მკურნალობის გარეში ინფექცია აქტიურად ვრცელდება.
დაავადების ყველაზე საშიში გამოსავალია პაპილომის ავთვისებიან სიმსივნედ გარდაქმნა, რასაც ძირითადად უროგენიტალიური ზონისა და ნაწლავის პაპილომები განიცდიან.
შესაძლებელია თუ არა ინფიცირების თავიდან აცილება
პაპილომავირუსის პროფილატიკისა და მკურნალობის ერთ-ერთი პერსპექტიული მეთოდია ვაქცინაცია. ვაქცინა მიმართულია პაპილომავირუსული ინფექციის ონკოლოგიურ ტიპებთან დაკავშირებული დაავადებების პროფილაქტიკისკენ.