როგორ იცვლება მტევნები ფარისებრი ჯირკვლის პათოლოგიების და შაქრიანი დიაბეტის დროს
- რა ცვლილებები ხდება მტევანში დიაბეტის დროს?
- მტევანთან დაკავშირებული ცვლილებები შაქრიანი დიაბეტის გართულებებს უფრო მეტად ახასიათებს. კერძოდ, ასეთი გართულებაა ოსტეოპოროზი, რომელიც ინსულინის დეფიციტის გამო ძვლოვან ქსოვილში ოსტეობლასტების შემცირებას უკავშირდება.
შაქრიანი დიაბეტის ხანგრძლივი და არარაციონალური მკურნალობის შედეგად ხშირად ვითარდება სხვადასხვა გართულება ნერვული სისტემისა და მამოძრა-ვებელი (ძვლოვანი) აპარატის მხრივ.
ეს არის სიმპტომოკომპლექსი, რომელსაც დიაბეტურ მტევანს ვუწოდებთ. მას ახასიათებს გაელვებისა და წვის შეგრძნება, დაბუჟება, მგრძნობელობის დაქვეითება, რაც ხელთათმანის სიმპტომად მოიხსენიება. დეფორმაციის პროცესში ჩართულია როგორც ძვლოვანი, ისე ნერვკუნთოვანი სისტემა, ხდება ძვლოვანი სისტემის დეფორმაცია და კუნთების ატროფია.
ატროფირებული, განლეული ადგილი კარგად ჩანს საჩვენებელ თითსა და ცერა თითს შორის არსებული ჩაღრმა-ვების სახით.
რაც შეეხება სუბიექტურ ჩივილებს: ტკივილი საკმაოდ მწვავეა, იწვევს შრომის უნარის დაქვეითებას და უძილობას.
- საუბრის დასაწყისში ბრძანეთ, რომ ზედა კიდურებში მიმდინარე ცვლილებები ფარისებრი ჯირკვლის დაავადებასაც ახასიათებს.
- ფარისებრი ჯირკვლის დაავადების, კერძოდ, მისი ჰიპერფუნქციის (თირეოიდული ჰორმონის სიჭარბის) დროს კატაბოლიზმის გამო ძვლოვან ქსოვილში მცირდება ცილოვანი სტრუქტურა.
ამ დროს თითების კანი ნაზია, ფალანგები - განლეული, ამას თან სდევს ტკივილი და ხშირი მოტეხილობა.
ფარისებრი ჯირკვლის ფუნქციის დაქვეითებით მიმდინარე ჰიპოთირეოზს ახასიათებს კიდურების, კერძოდ, მტევნების დეფორმაცია, რომელიც თირეოტროპული ჰორმონის ნაკლებობას, ორგანიზმში ჭარბი სითხის დაგროვებასა და შეშუპებას უკავშირდება, რასაც კანის სიმშრალე და გაუხეშებაც ერთვის.
შეშუპება ჰიპოთირეოზის ერთ-ერთი ადრეული სიმპტომია. უფრო მეტიც - ის ამ დაავადების ერთგვარი სადიაგნოსტიკო ნიშანიც კი გახლავთ.