როგორ დავიცვათ შინაური ცხოველების ჰიგიენა
როგორც ადამიანის. საკმაოდ მნიშვნელოვანი პროცედურები უნდა ჩატარდეს გარკვეული პერიოდულობით, რაც თავიდან აგვაცილებს მრავალი დაავადების განვითარებას. ასეთ პროცედურებს მიეკუთვნება ბეწვის, კანის, ფრჩხილების, ყურების, თვალებისა და პირის ღრუს მოვლა. ცხოველის ჰიგიენის დაცვაზე გვესაუბრება გრუმერი – დავით ასათიანი.
– ბატონო დავით, როგორ დავიცვათ შინაური ცხოველების სისუფთავე შინ?
– შინაურ ცხოველს უნდა ჰქონდეს თავისი ადგილი, სადაც ის კომფორტულად განთავსდება. კატას უნდა ედგას ტუალტი თავისი შემავსებლით. ძაღლს ესაჭიროება გასეირნება, ასევე ჰიგიენური პროცედურები, რომელთა სიხშირე დამოკიდებულია ცხოველის ჯიშზე.
– როგორ მოვუაროთ ცხოველის ბეწვს, როგორი სიხშირით დავვარცხნოთ კატა, ძაღლი, როგორი სავარცხელი ჯობს?
– გრძელბეწვიანი ძაღლები და კატები უნდა დაივაცხნონ ყოველდღიურად. თუ ვერ ახერხებთ ყოველდღიურად ვარცხნას, მაშინ, სულ მცირე, კვირაში სამჯერ მაინც უნდა ჩაატაროთ ეს პროცედურა. მოკლებეწვიანი კატებისა და ძაღლებისათვის ეს პროცედურა კვირაში ორჯერ ან სამჯერ საკმარისია. თუმცაღა სეზონური თმის ცვლის პერიოდში უფრო ხშირი ვარცხნა მოგიწევთ.
სავარცხელი უნდა შეირჩეს ინდივიდუალურად, ჯიშის მიხედვით. სავარცხლის შერჩევისა და დავარცხნისას უნდა დავაკვირდეთ, რომ მან არ დააზიანოს ცხოველის კანი.
– რომელი ასაკიდან შეიძლება ცხოველის დაბანა და როგორი სიხშირით?
– დასაბანი ასაკი მკაცრად განსაზღვრული არ არის. ცხოველს ბანენ საჭიროების მიხედვით. დაბანას აჩვევენ სიფრთხილით, რომ პატარა არ შეშინდეს და პროცედურა მისთვის შეძლებისდაგვარად სასიამოვნო გახდეს.
ყურადღება მიაქციეთ წყლის ტემპერატურას. ის ცხოველისთვის კომფორტული უნდა იყოს. არ ჩაასხათ წყალი ცხვირში, თვალებსა და ყურებში. ჯერ უნდა დაბანოთ ტანი, შემდგომ კი – თავი. შამპუნებისა და კონდიციონერის გამოყენებისას დაიცავით ინსტრუქცია. ზოგი შამპუნი და კონდიციონერი საჭიროებს განზავებას.
დაბანის სიხშირე დამოკიდებულია ცხოველის ჯიშზე, ასევე ბიწვის ტიპსა და კანის მგრძნობელობაზე.
– რომელი საშუალებები უნდა გამოვიყენოთ ცხოველების დასაბანად?
– ცხოველის დასაბანად უნდა გამოიყენოთ: შამპუნი, ბალზამი, ნიღაბი და კონდიციონერი, ასევე მშრალი შამპუნები. საბედნიეროდ, დღეს არჩევანი დიდია და კარგადაა წარმოდგენილი მრავალი ბრენდის მიერ. შესაბამისი კოსმეტიკის შერჩევა დამოკიდებულია ცხოველის ჯიშზე, ასაკზე, თმის ტიპსა და ფერზე.
კოსმეტიკის შერჩევაში დაგეხმარებათ თქვენი მომშენებელი, ვეტექიმი და გრუმერი.
– გარეთ გაყვანის შემდეგ როგორ გავასუფთაოთ ძაღლი, ყოველ ჯერზე უნდა დავბანოთ თათები და მუცელი?
– სეირნობისას ძაღლის თათები შეიძლება დაბინძურდეს ბაქტერიებით ან რაიმე ქიმიკატით. ამის თავიდან ასარიდებლად, სასურველია, ძაღლმა ფეხსაცმლით იაროს. თუმცა მათ დიდად არ უყვართ ფეხსაცმელი და ყველა პატრონიც ვერ ახერხებს, თავისი ცხოველი ფეხსაცმლით სიარულს მიაჩვიოს. ამიტომ სახლში დაბრუნების შემდგომ აუცილებელია მათთვის თათებისა და მუცლის გასუფთავება.
– ამ დროს თუ შეიძლება სადეზინფექციო საშუალებების გამოყენება და რომლის?
– დიახ. ამ პროცედურისათვის არსებობს სპეციალური შამპუნები და საპნები, ასევე სველი ხელსაწმენდები, რომელთა შეძენა შესაძლებელია სპეციალიზებულ მაღაზიებში.
– როგორ მოვუაროთ ძაღლის ბრჭყალებს და რა პერიოდულობით დავაჭრათ?
– დიდი ჯიშის ძაღლები, ძირითადად, ბრჭყალებს სეირნობისას იცვეთენ და მათი დაჭრა საჭირო აღარ არის. პატარა ჯიშისა და ნაკლებაქტიურ ძაღლებს ბრჭყალები ნაკლებად უცვდებათ, ამიტომ მათ საშუალოდ თვეში ერთხელ აჭრიან.
თუ არ იცით ამ პროცედურის სწორად ჩატარება, დახმარებისათვის გრუმერს ან ვეტექიმს მიმართეთ.
– კატებისთვის თუ შეიძლება ბრჭყალების დაჭრა და როგორი სიხშირით?
– თუ კატა ეზოში გადის, მაშინ ბრჭყალების დაჭრა არ არის სასურველი. მაგრამ სახლის კატებისათვის ეს აუცილებელი პროცედურაა, რაც, საშუალოდ, თვეში ერთხელ ხდება.
– როგორ მოვუაროთ ძაღლის და კატის ყურებს. რამდენ ხანში უნდა გავუწმინდოთ და რომელი საშუალებებით?
– ყურის გასაწმენდად ვიყენებთ სპეციალურ ლოსიონს ან გელს.
დავასველოთ ბამბის დისკი გელით და გავწმინდოთ ყურის ნიჟარა. რასაც ბამბის დისკით ვერ მივწვდებით, შეგვიძლია ფრთხილად გამოვწმინდოთ ყურის ჩხირით.
ყურის ჩხირებით ღრმად ამოწმენდა არ არის რეკომენდებული. საამისოდ ვიყენებთ ყურში ჩასაწვეთებელ ლოსიონს, რომლის მოხმარების შემდგომ, უბრალოდ, ვასუფთავებთ ყურის ნიჟარას ბამბის დისკით.
– როგორ და რომელი საშუალებებით გავუწმინდოთ კატას და ძაღლს თვალები?
– აიღეთ თვალის ლოსიონი ან ფიზიოლოგიური ხსნარი. დაასველეთ სტერილური ხელსაწმენდი, ცხოველი მოხერხებულად დაიჭირეთ. სასურველია ვინმემ დაგიჭიროთ, ვიდრე თქვენ თვალებს უწმენდთ. თვალის ქუთუთოები უნდა გაწმინდოთ ფრთხილად, რომ არ დააბინძუროთ თვალი. არ შეიძლება უშუალოდ თვალის გუგაზე შეხება. თუ თვალი გაღიზიანებულია, ჯობს, მიმართოთ ვეტექიმს.
არ შეიძლება ქუთუთოს გასაწმენდი ლოსიონის თვალში ჩაწვეთება. თვალში ჩასაწვეთებლად გამოიყენება თვალის წვეთები, რომელიც ვეტექიმმა უნდა დანიშნოს საჭიროების შემთხვევაში.
– როგორ მოვუაროთ შინაური ცხოველის კბილებს, რა სიხშირითა და საშუალებით გავუწმინდოთ კბილები კატასა და ძაღლს?
– ცხოველისათვის კბილების გასაწმენდად ვიყენებთ მათთვის განკუთვნილ კბილის პასტასა და ჯაგრისს. ადამიანის კბილის პასტის გამოყენება დაუშვებელია, რადგან შეიძლება ცხოველი მოიწამლოს.
ძაღლებისთვის არსებობს სპეციალური საღრღნელები, რომლებიც ხელს უწყობს კბილების დასუფთავებას, მაგრამ ხშირად ეს საკმარისი არ არის.
კბილების წმენდა რეკომენდებულია დღეში ერთხელ. თუმცა, ჩვენი რეალობის მიხედვით, აუცილებელია კვირაში სამჯერ ან ორჯერ მაინც. კბილის ჯაგრისის შერჩევისას ყურადღებით იყავით,რადგან კბილის ჯაგრისი ინდივიდუალურად, ცხოველის ზომის მიხედვით უნდა შეირჩეს. არსებობს თითზე წამოსაცმელი სილიკონის საწმენდებიც.
კბილების გაწმენდისას არ უნდა დააზიანოთ ცხოველის ღრძილები.
კბილებზე ძლიერი ნადების ან ქვების გაჩენისას მიმართეთ ვეტერინარს. აღვნიშნავ – ვეტერინარს და არა გრუმერს.
კბილებიდან ქვების მოცილება საკმაოდ საპასუხისმგებლო პროცედურაა და მისი ჩატარება მხოლოდ ვეტექიმს უნდა ანდოთ.
