რა არის შეგრენის სინდრომი
ავტოიმუნური დაავადებების დროს ადამიანის ორგანიზმში წარმოიქმნება ისეთი ანტისხეულები, რომლებიც საკუთარ ქსოვილებს ებრძვიან. შეგრენის სინდრომის დროს იმუნური სისტემა თავს ესხმის ლორწოვან გარსებსა და იმ ჯირკვლებს, რომლებიც თვალისა და პირის ღრუს ლორწოვანის ტენიანობას უზრუნველყოფს. ამგვარად გამოხატულ შეგრენის სინდრომს პირველადს უწოდებენ, ხოლო როდესაც აღინიშნება იმუნური სისტემის სხვა დაავადებაც, (რევმატოიდული ართრიტი, წითელი მგლურა) მეორეული შეგრენის სინდრომი ეწოდება.
შეგრენის სინდრომი ქრონიკული პათოლოგიაა. მისი სიმპტომები მოიცავს: ნერწყვისა და ცრემლის შემცირებულ გამოყოფას. თვალების სიმშრალეს თან ახლავს წვის, ქავილის შეგრძნება, სინდრომის მქონე პირებს უჭირთ ყლაპვა და მეტყველება.
ამ სიმპტომებს შესაძლოა თან დაერთოს: სახსრების ტკივილი, მოძრაობის შეზღუდვა სანერწყვე (ყბისქვეშა და ყბაყურა) ჯირკვლების შეშუპება, კანის სიმშრალე ან გამონაყარი, ქრონიკული მშრალი ხველა, გახანგრძლივებული სისუსტე.
დაავადების განვითარების რისკ-ფაქტორებს მიეკუთვნება: გენეტიკური ფაქტორი, სახსრების დაავადებები(რევმატოიდული ართრიტი, სისტემური წითელი მგლურა).
შეგრენის სინდრომი შესაძლოა გართულდეს:კბილების კარიესით ( შეგრენის სინდრომის დროს მცირდება ნერწყვის გამომუშავება, ნერწყვი კი კბილებს ბაქტერიების მავნე ზემოქმედებისგან იცავს)
იშვიათად რთულდება: სხვა ჯირკვლების ანთებით, პნევმონიით, ბრონქიტი ან ფილტვის სხვა დაავადებებით, თირკმელების ფუნქციის გაუარესებით, ციროზით.
შეგრენის სინდრომი ქრონიკული დაავადებაა და მისგან სრულად განკურნების გზა არ არსებობს, თუმცა შესაძლებელია სიმპტომების შემსუბუქება.
სანერწყვე ჯირკვლების ტკივილისა და შეშუპების დროს სასურველია თბილი კომპრესის დადება.
მშრალი თვალის მკურნალობისათვის გამოიყენება ხელოვნური ცრემლის წვეთები.
პირის ღრუს სიმშრალის დროს, დანოტივება შესაძლებელია სითხის ხშირი მიღებით, უშაქრო საღეჭი რეზინის დაღეჭვით ან ნერწყვის შემცვლელი პირის ღრუს სავლების გამოყენებით, ასევე სასურველია ოთახში ჰაერის დატენიანება.
ყავის და ალკოჰოლის შეზღუდვა (ისინი უფრო აშრობენ პირის ღრუს).
მჟავა სასმელების, მაგალითად, კოკა-კოლას შეზღუდვა(მჟავა კბილის მინანქარს აზიანებს).