მარიამ ფოლადაშვილი

ვან გოგის სინდრომი

ვან გოგის სინდრომის დროს ფსიქიკური ავადმყოფი თავს იზიანებს(იკვეთს სხეულის ნაწილს, ჭრილობებს აყენებს საკუთარ თავს), ან მოითხოვს გაუკეთონ ქირურგიული ოპერაცია. გამოწვეულია ჰიპოქონდრიული მანიით, ჰალუცინაციებით, იმპულსური გამოვლინებებით.ხშირია შიზოფრენიის დროს.

კატის კნავილის სინდრომი

კატის კნავილის დაავადება ანუ სინდრომი წარმოადგენს B ჯგუფის ქრომოსომების ანომალიით განპირობებულ პათოლოგიას. მისთვის დამახასიათებელია ხორხის ანომალია, რის გამოც ბავშვის ტირილი კატის კნავილს მოგვაგონებს. მისთვის დამახასიათებელია მიკროცეფალია(პატარა ზომის თავის ქალა), გონებრივი ჩამორჩენილობა, ზრდაში შეფერხება, დაბლა მდებარე დისპლაზიური ყურები.

ლურჯი სკლერების სინდრომი

ლურჯი სკლერების სინდრომი მემკვიდრეობითი პათოლოგიაა და გადაეცემა აუტოსომურ-დომინანტური ტიპით. მისთვის დამახასიათებელია ძვლების მტვრევადობა, სმენის დაქვეითება და სკლერების მორუხო-მოცისფრო შეფერილობა, რაც გამოწვეულია გათხელებითა და მათი გამჭვირვალეობის მომატებით.

მიუნჰაუზენის სინდრომი

მიუნჰაუზენის სინდრომი ფსიქონევროზული სიმპტომოკომპლექსია: ავადმყოფი გამუდმებით მიმართავს სამედიცინო დაწესებულებებს სხვადასხვა ანამნეზური(უმთავრესად მწვავე) სიმპტომატიკით, რასაც ობიექტური ორგანული პათოლოგია არ უდევს საფუძვლად.

არლეკინის სინდრომი

არლეკინის სინდრომი - ეს არის მიკროცირკულაციისა და პერიფერიული სისხლის მიმოქცევის დარღვევა, რასაც სამშობიარო ტრავმისას ჰიპოთალამური ზონის დაზიანება იწვევს. დაბადებიდან 3-4 დღის შემდეგ ვლინდება სიმპტომთა კომპლექსი: ახალშობილის სხეულის ნახევარზე კანის შეფერილობა პერიოდულად იცვლება (30-წამიდან 20 წუთამდე) ვარდისფრიდან ციანოზურამდე (ლურჯამდე). ეს ნიშანი განსაკუთრებით მკვეთრად არის გამოხატული, როცა ბავშვი გვერდზე წევს. კანის შეფერილობის ცვლილება არ აუარესებს ბავშვის თვითშეგრძნებას.