ყურყური მუცლის არეში
რისი ბრალი იქნება და როგორ მოვიქცე?
მუცლის ყურყური, შებერილობა, მეტეორიზმი იმაზე მიგვანიშნებს, რომ ორგანიზმში ნაწლავური მიკროორგანიზმების ბალანსია დარღვეული. მოგეხსენებათ, ნაწლავის მიკროფლორა სასარგებლო და მავნე, პირობითპათოგენური მიკროორგანიზმებისგან შედგება. ბალანსის დარღვევისას სასარგებლო მიკროორგანიზმები ითრგუნება და ამ ფონზე ძლიერდება დაავადების გამომწვევი მიკროორგანიზმების აქტიურობა.
მიკრობების ცხოველმყოფელობის პროცესების გავლენით ნაწლავებში დუღილი და ლპობა მიმდინარეობს. ამის შედეგად ნაწლავებში გროვდება აირები, რომლებიც მუცლის შებერილობასა და მეტეორიზმს იწვევს. ამ დროს გამოიყოფა მჟავები, რომლებიც აღიზიანებს ნაწლავის ლორწოვან გარსს, აძლიერებს და აჩქარებს პერისტალტიკას, ამიტომ მეტეორიზმსა და შებერილობას ხშირად ერთვის თან მოუნელებელი, ქაფიანი, მომჟავო სუნის განავლოვანი მასების გამოყოფა.
ყურყური ის ხმაა, რომელიც საჭმლის მონელების პროცესში მოსანელებელი მასის გადაადგილებისას ისმის საჭმლის მომნელებელი ტრაქტიდან. კუჭში მოხვედრილი საკვები მჟავა არეში "იძირება" და თანდათანობით გადაადგილდება ნაწლავებისკენ. ამ დროს ხდება საკვების დაშლა, მონელება, სასარგებლო ნივთიერებების შეწოვა. ოთხი-ექვსი საათის შემდეგ საკვები კუჭიდან ნაწლავებში გადაინაცვლებს. განურჩევლად იმისა, არის თუ არა საკვები კუჭში, ყოველი ერთი-ორი საათის შემდეგ გამოიყოფა კუჭის წვენის მომდევნო ულუფა, რომელიც კუჭში დარჩენილი საკვების დასამუშავებლად არის საჭირო. სწორედ ამ დროს ისმის მუცლიდან ყურყური.
ყურყური კუჭის აშლილობას (დიარეას) და გაღიზიანებული ნაწლავის სინდრომსაც ახასიათებს, მაგრამ ამ შემთხვევაში მას სხვა ნიშნებიც ერთვის. ამ ნიშნების შემჩნევისას, გირჩევთ, დიაგნოზის დასაზუსტებლად და სამკურნალოდ გასტროენტეროლოგს ან ინფექციონისტს მიმართოთ.
თუ ყურყური ერთადერთი ნიშანია, რომელიც დისკომფორტს გიქმნით, გირჩევთ:
- მდგომარეობა შეიმსუბუქოთ სმექტას თბილი ხსნარით. 1 პაკეტი სმექტა 50 მლ თბილ წყალში იხსნება. შეგიძლიათ მიიღოთ დღეში 3-4 პაკეტი ჭამამდე რამდენიმე წუთით ადრე.
- 1 ჩაის კოვზი კოჭა 250 მლ წყალში წამოადუღეთ, გააგრილეთ და სვით თბილ-თბილი, მთელი დღის განმავლობაში, ჭამამდე.
- თავი არიდეთ გაზიან სასმელებს.
- თუ სისტემატურად არღვევთ კვების რეჟიმს, ვერ ახერხებთ შუადღისას სადილობას, გამონახეთ რამდენიმე წუთი წასახემსებლად, თუნდაც ერთი ჭიქა იოგურტი მიირთვით.
- შესაძლოა, მეტისმეტად სწრაფად ჭამდეთ და ამ დროს ჰაერს ყლაპავდეთ. ეცადეთ, სწორად ისუნთქოთ.
- ყურადღება მიაქციეთ რაციონს. იგი გამდიდრებული უნდა იყოს რძემჟავა პროდუქტებით.
- უპრიანია, მიიღოთ ჭამამდე პრობიოტიკი (ლაქტო-G, ულტრაბიოტიკი, ლაციდოფილი, ბიფიფორმი). უკეთესი ეფექტისთვის ჯობს, იგი ინულინსაც შეიცავდეს. ინულინი ნატურალური მცნარეული ბოჭკოა, რომელიც ცნობილია თავისი სასარგებლო თვისებებით - იგი კუჭ-ნაწლავის ტრაქტს ფუნქციის მოწესრიგებაში, საჭმლის მონელებაში ეხმარება. ინულინი წიდას ღრუბელივით იწოვს და გარეთ გამოაქვს, რითაც ხელს უწყობს ორგანიზმის დეტოქსიკაციას. გარდა ამისა, აუმჯობესებს საჭმლიდან სასარგებლო ნივთიერებების (ვიტამინების, მიკროელემენტების) შეწოვას კუჭ-ნაწლავის ტრაქტში. ასტიმულირებს კუჭ-ნაწლავის მოტორიკას, საჭმლის მონელების პროცესს.
ნაწლავის მიკროფლორის დარღვევას მოწმობს:
- მუცლის ხშირი შებერვა, ყურყური;
- ტკივილი ჭიპის არეში;
- დეფეკაციის ხანგრძლივი მოშლა (შეკრულობისა და ფაფისებური განავლის მონაცვლეობა);
- გულისრევა;
- მწარე გემო პირში;
- გამოჯანმრთელების გაჭიანურება ნაწლავთა მწვავე ინფექციის გადატანის შემდეგ;
- ნაწლავთა დისფუნქცია, რომელიც წამლების მიღებით არის გამოწვეული. ამ ფონზე ხშირია მწვავე რესპირაციული ინფექციის, ჰერპესული ინფექციის, ლამბლიოზის, კანდიდოზის განვითარება. ადამიანი უჩივის საერთო სისუსტეს, ადვილად დაღლას.
აღნიშნული ჩივილების არსებობისას მიმართეთ სპეციალისტს. მკურნალობა ხანგრძლივია, მაგრამ მოთმინებით უნდა აღიჭურვოთ და ზუსტად შეასრულოთ ექიმის მითითებები.