9 საინტერესო ფაქტი პლასტიკური ქირურგიის შესახებ
07.06.2012
პლასტიკური ქირურგია მედიცინის იდუმალებით მოცული ნაწილია, რომლის შესახებ ყველაზე მეტი მითი არსებობს.
9 საინტერესო ფაქტი პლასტიკური ქირურგიის შესახებ
-
გთავაზობთ რამდენიმე საინტერესო ფაქტს
- ყველაზე გავრცელებული პლასტიკური ოპერაცია მკერდის გადიდება და მისი რეკონსტრუქციაა. ამასთან, ევროპაში მსგავსი ოპერაციები გაცილებით ნაკლები ღირს, ვიდრე ამერიკის შეერთებულ შტატებში.
- პლასტიკური ქირურგიის მომსახურებით ყველაზე მეტად სარგებლობენ 20-დან 40 წლამდე ქალბატონები. თუმცა ეს იმას როდი ნიშნავს, რომ მამაკაცებს პლასტიკური ოპერაციების ჩატარების სურვილი არ აქვთ. ისინი ამას მხოლოდ და მხოლოდ ერთი რამის გამო გაურბიან - ქირურგის დანის ქვეშ დაწოლის ეშინიათ.
- ყველაზე ძველი პლასტიკური ოპერაცია რინოპლასტიკაა. ამ ოპერაციას ძველ ინდოეთში ჯერ კიდევ 5 ათასი წლის წინათ ატარებდნენ.
- ყველაზე ახალგაზრდა ოპერაცია ჰიმენოპლასტიკაა - მანიპულაცია, რომელიც დეფლორირებული საქალწულე აპკის მთლიანობის აღდგენას ისახავს მიზნად. პირველად ჰიმენოპლასტიკა 1962 წელს განახორციელა იტალიელმა გინეკოლოგმა ბერნულმა, რომლის პაციენტიც მისივე ქალიშვილი გახლდათ. ჰიმენოპლასტიკური ოპერაციების რიცხვით არაბეთისა და ახლო აღმოსავლეთის ქვეყნები ლიდერობენ.
- XXI საუკუნის არანაკლებ პოპულარული ოპერაციაა ფალოპლასტიკა - სასქესო ორგანოს ქირურგიული პროთეზირება. ამ ოპერაციის ფუძემდებლები რუსი მეცნიერები არიან. 1936 წელს ქალაქ როსტოვში ქირურგმა ბოგორაზმა პაციენტს, რომელსაც სასქესო ორგანო ამპუტირებული ჰქონდა, მისი სრული რეკონსტრუქცია ჩაუტარა. პირველმა მანვე მოახდინა იმპლანტანტის პროთეზირება ერექციული დისფუნქციის მკურნალობის მიზნით.
- ადამიანის სხეულს შეუძლია ზედიზედ 7 პლასტიკურ ოპერაციას გაუძლოს. ამასთან, ყოველი მომდევნო ოპერაციის დროს ხარისხი თანდათან იკლებს. სტატისტიკის მიხედვით, ყველაზე ხშირად განმეორებით ოპერაციებს იტარებენ მამაკაცები, რომლებიც უკმაყოფილონი არიან პირველი რინოპლასტიკის (ცხვირის ფორმის კორექცია) შედეგით.
- წარმატებული პლასტიკური ქირურგის წლიური ხელფასი ამერიკის შეერთებულ შტატებში 1 მილიონი დოლარია. იმავე რეიტინგის ქირურგისა საფრანგეთში - ორჯერ ნაკლები.
- მსოფლიოში პირველი პლასტიკური ქირურგიული ოპერაცია ჩვენს წელთაღრიცხვამდე რამდენიმე ათასი წლის წინ ჩატარდა. თანამედროვე ეგვიპტელმა არქეოლოგებმა აღმოაჩინეს ფარაონის მუმია, რომელსაც სიცოცხლეში მარცხენა ფეხზე დიდი თითის ნაცვლად მიკერებული ჰქონდა კანისა და ხისგან კონსტრუირებული პროთეზი. აღსანიშნავია, რომ მან მშვენივრად გაუძლო ათასწლეულებს.
- დღეს ქალები ყველაზე ხშირად მკერდის ფორმასა და ზომას ხელოვნური იმპლანტანტების საშუალებით იცვლიან, თუმცა გამორიცხული არ არის, მალე ეს მიდგომა სრულიად შეიცვალოს. ავსტრალიელმა მეცნიერებმა აღმოაჩინეს ახალი მეთოდი, რომელიც ჯერჯერობით ცხოველებზე გამოცდის სტადიაზეა. მათ ვირთხის სარძევე ჯირკვლიდან აღებული ცოცხალი უჯრედები სინჯარაში სპეციალურ ნიადაგზე გადაიტანეს და ბუნებრივი იმპლანტანტის გამოზრდა მოახერხეს, ამასთან, ისეთისა, რომელიც იმუნოლოგიურად აბსოლუტურად თავსებადი აღმოაჩნდა ორგანიზმისთვის. მეცნიერები ექსპერიმენტის სხვა დეტალებს ჯერჯერობით საიდუმლოდ ინახავენ, რადგან მიაჩნიათ, რომ თუ მსგავსი იმპლანტანტის გამოზრდა ადამიანის სხვა ორგანოებისთვისაც მოხერხდა, ეს პლასტიკურ რეკონსტრუქციაში რევოლუციურ გარდატეხას მოახდენს.