ლალი ჩხიკვაძე

• ოქსფორდის უნივერსიტეტის მეცნიერებმა დაადგინეს, რომ 48-დან 70 წლამდე ასაკში თევზის, პარკოსნების და ბოსტნეულის მიღება ხელს უწყობს წონისა და ლამაზი ფიგურის შენარჩუნებას, ხოლო გრძელვადიან პერსპექტივაში, დემენციის რისკის შემცირებას.კვლევის შედეგები გამოქვეყნდა ჟურნალ JAMA Network Open-ში.

მეცნიერების მიერ ჩატარებულ კვლევაში მონაწილეობა მიიღო 512 ბრიტანელმა. 21 წლის განმავლობაში მეცნიერები აკვირდებოდნენ მოხალისეების კვების რაციონს და ზომავდნენ მათი წელისა და თეძოების გარშემოწერილობას. ამასთან ერთად, აღირიცხებოდა მონაწილეთა შორის დემენციის ყველაშემთხვევა.

შედეგებმა აჩვენა, რომ მოხალისეები, რომლებიც ხშირად იღებდნენ თევზს, ზეითუნის ზეთს, ბოსტნეულს, ხილსა და პარკოსნებს, გამოირჩეოდნენ მაღალი კოგნიტური უნარებით. კვების ამ რეჟიმის შედეგად გაუმჯობესდა კავშირი მარცხენა ჰიპოკამპსა და კეფის წილს შორის – ტვინის იმ ნაწილებს შორის, რომლებიც პასუხისმგებელნი არიან ინფორმაციის დამუშავებასა და მეხსიერებაზე.

მეცნიერებმა ასევე აღნიშნეს, რომ ჯანსაღი კვების ყველაზე ძლიერი სასარგებლო ეფექტი შეინიშნება, თუ მისი დაცვა იწყება 48-დან 70 წლამდე ასაკში.

დასახელდა ხორცის ის რაოდენობა, რომელიც გულის ჯანმრთელობისთვის არის საზიანო

გულის ჯანმრთელობისთვის კვირაში სამ ულუფაზე მეტი წითელი ხორცის მიღება არასასურველია.

წითელი ხორცის ჭარბი მოხმარება, ანუ კვირაში სამ ულუფაზე მეტი, მნიშვნელოვნად ზრდის გულ-სისხლძარღვთა დაავადებების რისკს.

• „წითელი ხორცი, განსაკუთრებით ცხიმიანი სახეობები, შეიცავს დიდი რაოდენობით ნაჯერ ცხიმებს, რომლიც ზრდის სისხლში ქოლესტერინის დონეს. ეს კი იწვევს სისხლძარღვების კედლებზე ათეროსკლეროზული ფოლაქების ჩამოყალიბებას და აორმაგებს გულის იშემიური დაავადების, მიოკარდიუმის ინფარქტისა და გულ-სისხლძარღვთა სისტემის სხვა დაავადებების განვითარების რისკს,“ – განმარტავენ სპეციალისტები.

ასევე, სიფრთხილე საჭიროა დამუშავებული ხორც-პროდუქტების, როგორიცაა სოსისი და ძეხვეული, მიღებისას.

გულის ჯანმრთელობის შესანარჩუნებლად მნიშვნელოვანია დაბალანსებული კვების რეჟიმის დაცვა, რომელიც მოიცავს მრავალფეროვან პროდუქტს, მათშორის წითელ ხორცსაც, მაგრამ ზომიერად.

გარდა წითელი ხორცისა, გულ-სისხლძარღვთა სისტემისთვის მავნებელია შაქარი და შაქრის შემცველი პროდუქტები, მათ შორის თაფლი და ხილის ჩირი, როგორიცაა ფინიკი. კიდევ ერთი პროდუქტი, რომლის მიღებაც არაა რეკომენდებული არის ჩიფსები, მარგარინი, ცხიმიანი საკონდიტრო ნაწარმა და ბისკვიტები, რადგან ისინი შეიცავს ბევრ ტრანს ცხიმებს და კანცეროგენულ ნაერთებს.

ასევე, უნდა აღინიშნოს, რომ ალკოჰოლისა და მარილის მიღება დასაშვებია მცირე რაოდენობით, მაგრამ მათი გადაჭარბებული მოხმარება საზიანოა.