არარეგულარული ძილი დაკავშირებულია კოგნიტური ფუნქციების დაქვეითებასთან
კვლევის შედეგების მიხედვით, ადამიანებს, რომლებსაც დროთა განმავლობაში ძილის გრაფიკის ყველაზე მეტი ცვალებადობა ჰქონდათ, კვლევის ბოლოს 3-ჯერ მეტად ჰქონდათ კოგნიტური დაქვეითების ალბათობა.
ძილის რეგულარულობა, ძილისა და გაღვიძების დროის თანმიმდევრულობა, მნიშვნელოვანია ზოგადი ჯანმრთელობისთვის.
ძილის ცვალებადობამ შეიძლება გაზარდოს დემენციის რისკი. ასევე შესაძლებელია, რომ დემენციის რისკ-ფაქტორებმა გავლენა მოახდინოს ძილის რეგულარობაზე.
ჯანმრთელობის სხვადასხვა პრობლემის მქონე ადამიანებს შეიძლება ჰქონდეს არარეგულარული ძილი მედიკამენტების, ტკივილისა და სხვა თანმხლები დაავადებების გამო.
ძილის ხანგრძლივობის ხშირმა ცვალებადობამ დროთა განმავლობაში შეიძლება ხელი შეუწყოს კოგნიტურ პრობლემებს, როგორიცაა ცუდი მეხსიერება.
რა არის კარგი ძილის ჰიგიენა?
მიუხედავად იმისა, რომ მოზრდილთა უმეტესობას სჭირდება მინიმუმ შვიდი საათი ძილი ღამით, სამედიცინო საზოგადოებაში არ არსებობს ზუსტი რეკომენდაცია იმის შესახებ, თუ რამდენი საათი ძილი სჭირდება ადამიანს 65 წლის შემდეგ. ხანდაზმულებისთვის ძილის იდეალური რაოდენობა შეიძლება განსხვავდებოდეს მათი ჯანმრთელობის მდგომარეობის, სქესის ან ცხოვრებისეული გარემოებების მიხედვით.
მიუხედავად ამისა, გონივრულია ხანდაზმულებმა გადადგან ნაბიჯები ძილის კარგი ჰიგიენის პრაქტიკაში. ჯანსაღი ძილის ჩვევები მოიცავს რეგულარულ დასვენებას, ასევე დაძინებას და გაღვიძებას ყოველდღე ერთსა და იმავე დროს.
ძილის კარგი ჰიგიენა ასევე შეიძლება მოიცავდეს:
- ბნელ, გრილ და კომფორტულ სივრცეში ძილს;
- ძილის წინ სტიმულატორების თავიდან აცილებას;
- ალკოჰოლის შეზღუდვას;
- ვარჯიშს.
როდესაც საქმე დროთა განმავლობაში ტვინის ჯანმრთელობის გაუმჯობესებას ეხება, ძილი ერთ-ერთი გასათვალისწინებელი ფაქტორია.
ასევე, რეგულარული ვარჯიში, მოწევის თავიდან აცილება, ჯანსაღი წონის შენარჩუნება, გულის ჯანმრთელობა, არტერიული წნევის კონტროლი და სოციალური ჩართულობა მნიშვნელოვანია ფსიქიკური და ფიზიკური ჯანმრთელობისთვის.
