როგორი უნდა იყოს ანტიბიოტიკების მიღებისას კვების რაციონი
ისევე როგორც ყველა სხვა წამალი, ანტიბიოტიკებიც იწვევს თანამდევ მოვლენებს: გამონაყარს, დიარეას, ღებინებას, ფართო სპექტრის ანტიბიოტიკები ხშირად იმ ბაქტერიებსაც ანადგურებს, რომლებსაც სარგებლობა მოაქვს ჩვენი ორგანიზმისთვის და ამით არღვევს ნაწლავთა მიკროფლორის ბუნებრივ ბალანსს.
გასათვალისწინებელია, რომ კვების რაციონი გავლენას ახდენს ანტიბიოტიკების მოქმედებაზე. ზოგიერთი საკვები ხელს უშლის მის შეწოვას, ზოგიერთი კი თანმდევ მოვლენებს აძლიერებს.
ნაწლავური მიკროფლორის ბალანსის დარღვევა მუცლის შებერილობით და დიარეით გამოვლინდება. ეს სიმპტომები ყველაზე ხშირად ბავშვებს აწუხებთ. პრობიოტიკები სამედიცინო პრეპარატებია, რომლებიც, ამცირებს აღნიშნული მოვლენების განვითარების რისკს.
პრობიოტიკებიც შეიძლება მოწყვლადნი აღმოჩნდნენ ანტიბიოტიკების მიმართ, ამიტომ ანტიბიოტიკებისა და პრობიოტიკების მიღებათა შორის საჭიროა რამდენიმესაათიანი შუალედის დაცვა. პრობიოტიკების მიღება შესაძლოა ანტიბიოტიკების კურსის დასრულების შემდეგაც გაგრძელდეს.
სასარგებლო ბაქტერიების კარგი წყაროა ფერმენტირებული საკვები: იოგურტი, ზოგიერთი სახეობის ყველი, მაწონი, კეფირი. მათში დიდი რაოდენობითაა სასარგებლო ბაქტერიები.
კვლევებით დადგენილია, რომ როდესაც რაციონი ფერმენტირებულ საკვებს შეიცავს, ადამიანის ნაწლავური მიკროფლორა მდიდრდება ლაქტობაცილებითა და ბიფიდობაქტერიებით, დაავადების გამომწვევი ბაქტერიების რაოდენობა კი იკლებს.
სასარგებლო ბაქტერიები ხელს უწყობენ K ვიტამინის წარმოქმნასაც, რომელიც სისხლის ნორმალური შედედებისთვის არის აუცილებელი. K ვიტამინით მდიდარია ყვავილოვანი კომბოსტო, ისპანახი, კომბოსტო.
პრებიოტიკები კი ნაწლავებში მობინადრე ბაქტერიების საკვებს წარმოადგენს. პრებიოტიკებს ბოჭკოთი მდიდარი საკვები შეიცავს. ბოჭკოთი მდიდარია მსხვილმარცვლეული პროდუქტები, თხილეული, ლობიო, ოსპი, კენკრა, ბროკოლი, ბარდა, ბანანი. საკვები ბოჭკოს შემცველი პროდუქტები ზოგიერთი მავნე სახეობის ბაქტერიის გამრავლებასაც უშლის ხელს.
გასათვალისწინებელია, რომ საკვები ბოჭკო ანელებს კუჭის დაცლას. შედეგად იკლებს მედიკამენტის შეწოვის სიჩქარეც, ამიტომ ანტიბიოტიკებით მკურნალობის პროცესში მიზანშეწონილია, დროებით ამოიღოთ რაციონიდან ბოჭკოს მაღალი შემცველობის საკვები და განაახლოთ მათი მიღება ანტიბიოტიკების კურსის დასრულების შემდეგ.
პრებიოტიკის როლს ასრულებს კაკაოში შემავალი ანტიოქსიდანტი პოლიფენოლი. ის ხელს უწყობს ნაწლავებში ბიფიდობაქტერიებისა და ლაქტობაცილების გამრავლებას, ამასთანავე, ამცირებს ზოგიერთი მავნე ბაქტერიის გამრავლებას.
აღსანიშნავია, რომ პრებიოტიკებით მდიდარი საკვების დიდი რაოდენობით მიღებისას შესაძლოა განვითარდეს მეტეორიზმი, ამიტომ საკვებ რაციონში პრებიოტიკების დამატება მიზანშეწონილია ეტაპობრივად, ნელ-ნელა, რათა ნაწლავების მიკროფლორა მას უკეთ შეეგუოს.
ანტიბიოტიკებთან ერთად არ არის სასურველი გრეიპფრუტისა და მისი წვენის მიღება, ვინაიდან მათში შემავალი ქიმიური ნაერთები ხელს უშლის წამლის დაშლისთვის აუცილებელი ფერმენტების მოქმედებას. როდესაც ეს ფერმენტები სათანადოდ ვერ ასრულებენ თავიანთ ფუნქციას, ანტიბიოტიკი უფრო მეტხანს ყოვნდება ორგანიზმში და სისხლში მისმა დონემ შესაძლოა მკვეთრად მოიმატოს, რაც ჯანმრთელობისთვის საფრთხის შემცველია.
ასევე არ არის მიზანშეწონილი ანტიბიოტიკთან ერთად სხვა ხილის წვენის ან რძის მიღება, ვინაიდან მათ შეუძლიათ, ხელი შეუშალონ წამლის ნორმალური შეწოვის პროცესს.
ანტიბიოტიკების მიღებასთან ერთად არ არის სასურველი ალკოჰოლის მოხმარება.