მავნეა თუ არა უზმოზე ყავის დალევა?
მაგრამ იდეამ, რომ უზმოზე ყავამ შეიძლება ზიანი მიაყენოს კუჭ-ნაწლავს, ისეთივე პოპულარობა მოიპოვა, როგორც ამ ინფორმაციისადმი უნდობლობამ.
ჩვენი კუჭი იმაზე ძლიერია ვიდრე ჩანს
კალიფორნიის უნივერსიტეტის ფიზიოლოგიისა და მემბრანული ბიოლოგიის პროფესორის, კიმ ბარეტის თქმით, ჩვენი კუჭი უძლებს ყველანაირ გამღიზიანებელს, მათ შორის ყავას: „კუჭს მრავალი გზა აქვს თავის დასაცავად“. მაგალითად, ის გამოყოფს ლორწოს სქელ ფენას, რომელიც ქმნის ძლიერ ფარს კუჭის ლორწოვან გარსსა და რასაც ჭამთ შორის.
ეს ფარი ასევე იცავს კუჭს საკუთარი ბუნებრივი მჟავე გარემოსგან, რომელიც საჭიროა საკვების გადასამუშავებლად. თქვენ მოგიწევთ ძალიან უხეში ნივთიერების მიღება „კუჭის დაცვა რომ დაირღვეს, რადგან ის მუდმივად მტრულ და დესტრუქციულ გარემოშია“, ამბობს დოქტორი ბარეტი.
რა ხდის ჩვენს კუჭს დაუცველს?
„საყოველთაოდ ცნობილია, რომ გამღიზიანებლები, როგორიცაა ალკოჰოლი, სიგარეტის კვამლი და არასტეროიდული ანთების საწინააღმდეგო საშუალებები, ცვლის ჩვენი კუჭის ბუნებრივ დაცვას და აზიანებს მის ლორწოვან გარსს“, - აცხადებს დოქტორი ბაირონ კრაიერი, დალასის ბეილორის უნივერსიტეტის სამედიცინო ცენტრის შინაგანი მედიცინის დირექტორი.
მიუხედავად იმისა, რომ ზოგიერთმა გამაღიზიანებელმა შეიძლება კუჭი უფრო დაუცველი გახადოს, მრავალმა კვლევამ აჩვენა, რომ ეს ასე არ არის ყავის შემთხვევაში. მაგალითად, 2013 წელს იაპონიაში მცხოვრები 8000-ზე მეტი ადამიანის კვლევამ არ აღმოაჩინა მნიშვნელოვანი კავშირი ყავის მოხმარებასა და კუჭის ან ნაწლავის წყლულს შორის, თუნდაც მათთან, ვინც დღეში სამ ან მეტ ფინჯანს სვამდა.
რა ზიანს აყენებს ყავა ცარიელ კუჭს?
დოქტორ ბარეტის თქმით, უზმოზე ყავის დალევამ ნაკლებად სავარაუდოა, რომ ზიანი მიაყენოს თქვენს კუჭს, მაგრამ თეორიულად შეიძლება გამოიწვიოს გულძმარვა.
გარდა ამისა, ყავა მოქმედებს ნაწლავებზე - მას შეუძლია დააჩქაროს მსხვილი ნაწლავის მუშაობა და გამოიწვიოს ნაწლავის პერისტალტიკა. ყავა ასევე ზრდის გულისცემას და არტერიულ წნევას. ამიტომ, თუ სასმელს გვიან ღამით დალევთ, შესაძლოა ძილის პრობლემა შეიქმნას.
გასტროენტეროლოგი ბაირონ კრაიერი გვირჩევს, ყურადღება მიაქციოთ სიმპტომებს. თუ ყავის დალევის შემდეგ გამუდმებით ამჩნევთ წვის შეგრძნებას მკერდის მიდამოში ან მჟავე გემოს პირში, შეამცირეთ ყავის მიღება. ყავაში მცირე რაოდენობით რძის ან ნაღების დამატება, ან დალევის წინ საკვების მიღება, ასევე შეამცირებს ყავის უარყოფით მოქმედებას.
ექსპერტები გვირჩევენ აკონტროლოთ თქვენი მდგომარეობა - თუ ყავის დალევის შემდეგ გულძმარვა გაწუხებთ, შეამცირეთ მისი მოხმარება. ასევე, ჯანმრთელობის შესაძლო რისკების შესამცირებლად, დაამატეთ მცირე რაოდენობით რძე ან ნაღები თქვენს სასმელს - ან მიირთვით საკვები ყავის დალევამდე.