რა გავლენა აქვს სუნთქვით ვარჯიშებს ჯანმრთელობაზე
ქრონიკული სტრესი დაკავშირებულია გულის დაავადებებთან, მაღალ არტერიულ წნევასთან, დიაბეტთან. არსებობს გარკვეული მტკიცებულებები, რომ ღრმა სუნთქვა შეიძლება ეფექტური იყოს მრავალი ქრონიკული მდგომარეობის გასაუმჯობესებლად. მნიშვნელოვანია აღინიშნოს, რომ სუნთქვის ვარჯიშები არის დამატებითი თერაპია. ღრმა სუნთქვამ არ უნდა შეცვალოს სხვა მედიკამენტები ან ჩარევები, რომლებსაც თქვენი ექიმი გირჩევთ.
სუნთქვითი ვარჯიშები გამოიყენება:
სტრესის შესამცირებლად და კონცენტრაციის გასაუმჯობესებლად - როდესაც სტრესის ქვეშ ხართ, სიმპათიკური ნერვული სისტემა სტიმულირდება, რაც ასოცირდება სტრესთან დაკავშირებულ სიმპტომებთან, როგორიცაა აჩქარებული სუნთქვა, გულისცემის გახშირება, გაღიზიანება, მომატებული არტერიული წნევა, შფოთვა და სხეულის დაძაბულობა,ხოლო ღრმა სუნთქვას შეუძლია გაგაზავნოს ორგანიზმში მოდუნების სიგნალი.
ღრმად სუნთქვისას აქტიურდება პარასიმპატიკური ნერვული სისტემა, რაც გეხმარებათ დამშვიდებაში. ამის შემდეგ, თავს უკეთ გრძნობთ და რაციონალურად აზროვნების უნარიც უმჯობესდება. როგორც ვარჯიში ან მედიტაცია, ღრმა სუნთქვა სასარგებლოა, თუ მას ყოველდღიურ პრაქტიკად განიხილავთ და უკეთესი შედეგი გექნებათ, თუ რეგულარულად ჩაატარებთ სუნთქვით ვარჯიშებს.
კვლევებმა აჩვენა, რომ ღრმა სუნთქვა შეიძლება სასარგებლო იყოს ჯანმრთელობის რამდენიმე მდგომარეობისთვის, ვინაიდან:
ამცირებს არტერიულ წნევას
ასთმისა და ფილტვების ქრონიკული ობსტრუქციული დაავადების მქონე ადამიანებში აუმჯობესებს ცხოვრების ხარისხს - სუნთქვის ვარჯიშები ეხმარება ადამიანებს, რომლებსაც აქვთ ფილტვების დაავადებები, როგორიცაა ასთმა და ფქოდ-ი, მართონ თავიანთი დაავადების ზოგიერთი სიმპტომი.
მსუბუქი და ზომიერი ასთმის მქონე ადამიანებში სუნთქვითი ვარჯიშები შეიძლება დაეხმაროს ჰიპერვენტილაციის სიმპტომებს, დიაფრაგმული სუნთქვა - უფრო ნელი, ღრმა სუნთქვა, ხშირად გამოიყენება ფქოდ-ით დაავადებულ პირებში რეაბილიტაციისთვის. ღრმა სუნთქვა ხელს უწყობს ჟანგბადის დონის გაუმჯობესებას. მიუხედავად იმისა, რომ სუნთქვის პრაქტიკა საკმაოდ მარტივი ჩანს, ამერიკის ფილტვების ასოციაცია გვაფრთხილებს, რომ ვარჯიშების სრულყოფას შეიძლება დრო დასჭირდეს. დაიწყეთ ნელა და არ სცადოთ ღრმა სუნთქვა, როცა სუნთქვის გაძნელება გაქვთ.
ხელს უწყობს დეპრესიის და შფოთვის სიმპტომების მართვას
ქრონიკულმა სტრესმა შეიძლება გამოიწვიოს სუნთქვის ნორმალური რიტმის დარღვევა და, თავის მხრივ, ხელი შეუწყოს შფოთვას და ფსიქიკური ჯანმრთელობის გაუარესებას.
გააზრებული სუნთქვის ვარჯიშების გაკეთება კი ხელს უწყობს სასუნთქი სისტემის ხელახალ ბალანსირებას, რამაც შეიძლება გამოიწვიოს ადამიანის გრძნობისა და აზროვნების გაუმჯობესება.
ამცირებს დაძაბულობის თავის ტკივილს
ღრმა სუნთქვითი ვარჯიშები ადუნებს სიმპათიკურ ნერვულ სისტემას, რაც, თავის მხრივ, დაგეხმარებათ სხეულის მოდუნებაში და კუნთების დაძაბულობის შემცირებაში,ამან შეიძლება ხელი შეუწყოს ისეთი მდგომარეობის გაუმჯობესებას, როგორიცაა თავის ტკივილი. რეგულარულად ვარჯიში სასარგებლოა განსაკუთრებით მაშინ, როდესაც ის შერწყმულია პრევენციულ და მედიკამენტურ მკურნალობასთან.
აუმჯობესებს საჭმლის მომნელებელი სისტემის ფუნქციონირებას
დიაფრაგმის ფიზიოლოგიურმა მოძრაობებმა შეიძლება ხელი შეუწყოს საჭმლის მომნელებელ ტრაქტში დაძაბულობის მოხსნას, გასტროეზოფაგური რეფლუქსის სიმპტომების შემსუბუქებას, დიარეის მოხსნას. ღრმა სუნთქვა აუმჯობესებს ამ სიმპტომებს, რადგან დაძაბულობამ შეიძლება ხელი შეუშალოს ნორმალურ მონელებას.
2020 წელს გამოქვეყნებულმა, გაღიზიანებული ნაწლავის სინდრომის მქონე მოზრდილების მცირე კვლევამ აჩვენა, რომ კუნთების რელაქსაციისა და დიაფრაგმული სუნთქვის ვარჯიშების დახმარებით, უმჯობესდება გაღიზიანებული ნაწლავის სინდრომის სიმპტომები.