მარიამ ფოლადაშვილი

ცხიმების სინთეზი კანქვეშა შემაერთებელ ქსოვილში მიმდინარეობს ცხიმოვანი უჯრედების საშუალებით. ისინი ცხიმის მარაგს ინახავენ და უჯრედებს ნივთიერებათა ცვლისთვის საჭირო ენერგიით ამარაგებენ. ცხიმოვანი ნაწილაკები წვრილ სისხლძარღვებს უკავშირდება, რომელთა საშუალებითაც დაშლის პროდუქტები სისხლში ხვდება. ცხიმოვანი ქსოვილის უჯრედების ფუნქციონირებაზე ჰორმონების გარკვეული ჯგუფი ახდენს გავლენას. როდესაც მათი ფუნქცია ირღვევა, ცხიმები უჯრედების ნაცვლად უჯრედშორის სითხეში გროვდება და ხელს უშლის სისხლისა და ლიმფის მოძრაობას. ფერხდება უჯრედშორისი სითხის დინება და გამოყოფილი სითხის დიდი ნაწილი ორგანიზმში რჩება, რაც შეშუპებას იწვევს. დროთა განმავლობაში კი პროცესები თანდათან ღრმავდება, ცხიმოვანი უჯრედების მოცულობა იზრდება. გამკვრივებული ცხიმის უჯრედები შემაერთებელი ქსოვილის ბოჭკოებს აწვება, კანი მოშვებული და არათანაბარი ხდება.

ცელულიტის განვითარებას ხელს უწყობს შემდეგი ფაქტორები:

• ჭარბი წონა - არასწორმა კვებამ,სწრაფი კვების პროდუქტები მოხმარების სიჭარბემ და მცენარეული საკვების სიმცირემ, შესაძლოა ცელულიტი გაამწვავოს;
• ჰორმონული დარღვევა;
• უმოძრაობა - ის აფერხებს სისხლის მიმოქცევას და დროთა განმავლობაში კუნთოვან ქსოვილს ცხიმოვანი ქსოვილი ანაცვლებს;
• სტრესი - სტრესის ჰორმონები აფერხებს ნივთიერებათა ცვლას და ხელს უწყობს ჭარბი ცხიმის დაგროვებას;
• ნიკოტინი - ხელს უწყობს სისხლის მოძრაობის შენელებას, რაც ხელს უწყობს ცელულიტის განვითარებას;

ასევე, ცელულიტი შესაძლოა გენეტიკური ფაქტორითაც იყოს განპირობებული.

ცელულიტის სამკურნალოდ გამოიყენება გარეგანი გამოყენების პრეპარატები, გელები, კრემები, ექსტრაქტები. ასევე მკურნალობის სხვა მეთოდებია: ლიმფოდრენაჟი (ლიმფის მიმოქცევის გააქტიურება დენის იმპულსური წყაროს საშუალებით), მიოსტიმულაცია (კუნთების ქსოვილის გამაგრება და სისხლის მიმოქცევის გაუმჯობესება ცვალებადი ელექტროიმპულსების საშუალებით), ულტრაბგერითი თერაპია(ულტრაბგერითი ტალღების მეშვეობით ცხიმოვანი უჯრედების დაშლა),თერმოთერაპია და კრიოთერაპია(სითბოსა და სიცივის ზემოქმედება ხელს უწყობს მიკროცირკულაციის გაუმჯობესებას და კანის ელასტიკურობის ამაღლებას) და სხვა.

იმისათვის,რომ ცელულიტის მოშორებას ხელი შევუწყოთ და ნაკლებად შესამჩნევი გავხადოთ ის, საჭიროა კუნთებისა და შემაერთებელი ქსოვილის გაძლიერება, სისხლის მიმოქცევისა და ნივთიერებათა ცვლის გაუმჯობესება, ნორმალური წონის შენარჩუნება და კანის ტონუსის ამაღლება.

• იკვებეთ დაბალანსებულად - ყოველდღიური რაციონი მდიდარი უნდა იყოს ხილით, ბოსტეულით, ბურღულით, რძის ნაწარმით, ხორცით(უმჯობესია მოხარშული) და თევზით. მიიღეთ C ვიტამინის შემცველი საკვები. თავი შეიკავეთ სწრაფი კვების პროდუქტების, ძეხვეულის, კონსერვების, შაქარის, ნაჯერ ცხიმებისა და ტკბილეულის მიღებისგან. მოიწესრიგეთ კვების რეჟიმიც;
• გაზარდეთ ფიზიკური აქტივობა - რეგულარული ვარჯიში ხელს უწყობს სისხლის მიმოქცევის გააქტიურებას;
• მიიღეთ რაც შეიძლება მეტი წყალი - დღეში 2-2,5 ლიტრი. ის მონაწილეობს ნივთიერებათა ცვლაში, წმენდს ორგანიზმს და კანს მავნე ნივთიერებების გამოყოფაში ეხმარება;
• მოერიდეთ ჭარბ მზესა და ნიკოტინს - ნიკოტინი სისხლძარღვებს ავიწროებს და სისხლი შემაერთებელ ქსოვილში კარგად ვეღარ მოძრაობს. ულტრაიისფერი სხივები კი აზიანებს ელასტინისა და კოლაგენის ბოჭკოებს, შესაბამისად, შემაერთებელი ქსოვილი სიმტკიცეს კარგავს;
• მიიღეთ ზღვის მარილის აბაზანები - ხელს უწყობს სისხლის მიმოქცევის გაძლიერებასა და ნივთიერებათა ცვლის გააქტიურებას