მუცლის ტკივილი ბავშვებში - როდის არის აუცილებელი ექიმთან ვიზიტი
მუცლის ტკივილის ხშირი მიზეზი ბავშვებში არის კვების რეჟიმის მკვეთრი დარღვევით გამოწვეული დისკომფორტი, აგრეთვე ჰელმინთოზი (ჭიებით ინვაზია) ,რაც არ წარმოადგენს სიცოცხლისთვის საშიშ მდგომარეობას.
თუ ტკივილის მიზეზი კვებითი დარღვევებია, სასურველია გამოვტოვოთ კვება, დავაწვინოთ ბავშვი კომფორტულად, დავტვირთოთ სითხით.
მცირე ასაკის ბავშვებში მუცლის ტკივილზე მიუთითებს ჭირვეულობა, საკვებზე უარის თქმა, აირების გამოყოფის გაძნელება, მუცლის შებერილობა.
ხშირ შემთხვევაში, მუცლის ტკივილი ხანმოკლე და არაინტენსიურია, თუ ტკივილი არ არის მეტად შემაწუხებელი და ბავშვის ზოგადი მდგომარეობა ნორმალურია, ამ დროს ექიმთან გადაუდებელი ვიზიტი საჭირო არ არის.
მუცლის ტკივილის გამო აუცილებელია ექიმს მივმართოთ, თუ:
- ტკივილი ხანგამოშვებითი ან მუდმივად გრძელდება საათზე მეტ ხანს და იწვევს ბავშვის ფიზიკური აქტივობის და გუნება-განწყობის საგრძნობ დარღვევას;
- მუცლის ტკივილს, თუნდაც ხანმოკლეს და არაშემაწუხებელს, თან ახლავს ღებინების ერთი შემთხვევაც კი მოყავისფრო მასებით;
- თუ მუცლის ტკივილი გრძელდება 6 საათზე უფრო მეტ ხანს - ეს დიდი ალბათობით შეიძლება იყოს მწვავე პათოლოგიის ნიშანი (მაგალითად,მწვავე აპენდიციტი).