მარიამ ფოლადაშვილი

რკინადეფიციტური ანემია რკინის დეფიციტით გამოწვეული დაავადებაა, რომელიც ვითარდება მაშინ, როდესაც ორგანიზმი უფრო მეტ რკინას კარგავს ვიდრე იღებს.

სისხლის წითელი უჯრედები შეიცავს ჰემოგლობინს, რომელიც ჟანგბადით ამარაგებს სხეულის ყველა ნაწილს. როდესაც ერითროციტების რაოდენობა შემცირებულია ან ერითროციტებში ჰემოგლობინის შემცველობა დაქვეითებულია, სისხლს ჟანგბადის საკმარისი რაოდენობა ვეღარ გადააქვს, შესაბამისად ფერხდება ქსოვილების ჟანგბადით მომარაგების პროცესი, რაც მთელ რიგ დარღვევებს იწვევს ორგანიზმში.

რკინადეფიციტის მიზეზი შეიძლება გახდეს:

• რკინით ღარიბი კვების რაციონი;
• კუჭ-ნალავის ტრაქტის დარღვევები;
• შეწოვის პროცესის დარღვევა;
• ორსულობა;
• ლაქტაცია

რკინის დეფიციტის სიმპტომებია:

• სიფერმკრთალე;
• დაღლილობა;
• ცივი ხელები და ფეხები;
• შენელებული ზრდა-განვითარება;
• მადის დაქვეითება;
• გახშირებული სუნთქვა;
• ქცევითი პრობლემები;
• ხშირი ავადობა

რკინადეფიციტის განვითარების პრევენცია

საჭიროა რკინის მარაგის შევსება. ამისთვის კი საუკეთესო გზა რკინით მდიდარი საკვების მიღებაა. ასეთი პროდუქტებია:

• ხორცი;
• თევზი;
• შვრია;
• ისპანახი;
• გოგრის თესლი;
• ბროკოლი

ამას გარდა, საჭიროა C და A ვიტამინების მარაგის შევსებაც, რადგან ეს ელემენტები აუმჯობესებენ რკინის შეწოვას. ასევე რეკომენდებულია რკინის საკვები დანამატის სახით მიღება ექიმის რეკომენდაციით.

ვიტამინდეფიციტური ანემია

ვიტამინდეფიციტური ანემიის მიზეზი ორგანიზმში B12 ვიტამინის ან ფოლიუმის მჟავას დეფიციტია. ამ ტიპის ანემიის გამომწვევი შესაძლოა გახდეს:

• მკაცრი ვეგეტარიანელობა, როდესაც ადამიანი არ იღებს ცხოველური წარმოშობის პროდუქტებს (ხორცს,თევზს, ღვიძლს)
• შეწოვის პროცესის დარღვევა(ცელიაკია, კრონის დაავადება)

ფოლიუმის მჟავის დეფიციტის განვითარების რისკი მაღალია ორსულებში.

სიმპტომები:

• გადაადგილების გაძნელება;
• სუნთქვის გაძნელება;
• დაღლილობა;
• მოყვითალო ფერის კანი ან სიფერმკრთალე;
• დაბნეულობა და გულმავიწყობა;
• თავბრუსხვევა;
• წონის კლება;
• კუნთების სისუსტე

პროფილაქტიკურ ღონისძიებებში შედის B12 ვიტამინისა და ფოლიუმის მჟავის დეფიციტის შევსება როგორც საკვებით, ისე მედიკამენტების სახით.