ჰიპოგლიკემია - სიმპტომები და პრევენცია
ჰიპოგლიკემია მდგომარეობაა, როცა სისხლში შაქრის დონე დაშვებულ ზღვრულ მაჩვენებელზე დაბალია. ჯანმრთელობის ამგვარი პრობლემა დაუყოვნებლივ უნდა აღმოიფხვრას.
ჰიპოგლიკემიის განვითარებაზე შემდეგი სიმპტომები მიუთითებს:
- სისუსტე;
- შიმშილის შეგრძნება;
- გაბრუება ან თავბრუსხვევა;
- გულისცემის გახშირება;
- სიცივისა და ოფლიანობის შეგრძნება;
- ნერვიულობა;
- ტრემორები;
- ოფლიანობა;
- გაღიზიანება;
- დაბნეულობა;
- ძილიანობა;
- არათანმიმდევრული მეტყველება;
- მხედველობის დაბინდვა;
მძიმე შემთხვევებში, ცნობიერების დაკარგვა, კრუნჩხვები და კომა.
შაქრის დაბალი დონისას ორგანიზმში ,,საგანგაშო სიგნალი“ ირთვება. ტვინი, რომლის ფუნქციონირებაც გლუკოზაზეა დამოკიდებული, შაქრის ნაკლებობისადმი განსაკუთრებით მგრძნობიარეა. ჰიპოგლიკემიის პირველი ნიშნები შფოთვითი აშლილობის სიმპტომის მსგავსია, რადგან სისხლში შაქრის დონის დაცემა ავტონომიურ ნერვულ სისტემას ასტიმულირებს,ამ დროს გამოიყოფა ადრენალინი, რომელიც, თავის მხრივ, ასტიმულირებს ღვიძლს, რათა მეტი შაქარი გამოიმუშაოს.
ჰიპოგლიკემია შესაძლოა განუვითარდეს იმ პირებს, ვინც გლუკოზის დონის შესამცირებლად ინსულინს მოიხმარს, ამას გარდა, ჰიპოგლიკემია შეიძლება გამოიწვიოს გადამეტებულმა ფიზიკურმა დატვირთვამ, ნახშირწყლების არასაკმარისი შემცველობის საკვებმა, კვების გამოტოვებამ ან დაგვიანებამ, ალკოჰოლის ჭარბმა მოხმარებამ.
პრევენცია:
- თუ მოიხმართ ინსულინს ჰიპოგლიკემიის განვითარების რისკის შემცირებაში დაგეხმარებათ სისხლში გლუკოზის დონის კონტროლი- ეს საშუალებას მოგცემთ დაგეგმოთ რა სახის, რა რაოდენობის საკვები უნდა მიიღოთ, როგორი უნდა იყოს ფიზიკური დატვირთვის ხარისხი;
- აუცილებელია რეგულარული კვება - საკვები საკმარისი რაოდენობის ნახშირწყლებს უნდა შეიცავდეს;
როდესაც ჰიპოგლიკემიის ნიშნებს შეამჩნევთ სწრაფად მიიღეთ შაქრის შემცველი სასმელი ან საკვები, რათა სისხლს გლუკოზა მიეწოდოს. ამ დროს 180 მგ ხილის წვენი, ერთი ჭიქა რძე ან ნებისმიერი სახის კანფეტი სისხლში შაქრის დონის ასაწევად საკმარისი იქნება.