არასდროს დაიძინოთ სინათლეში - რას გვაფრთხილებენ იაპონელი მეცნიერები
არ დავიძინოთ ჩართული ტელევიზორის ან ანთებული ნათურის (თუნდაც ღამის ნათურის) ფონზე, რადგან ეს მავნე ჩვევა შესაძლოა ფსიქიკური ჯანმრთელობის სერიოზული შერყევის ფასად დაგვიჯდეს. ნარის სამედიცინო უნივერსიტეტში ჩატარებულმა ექსპერიმენტმა აჩვენა, რომ ძილის დროს სინათლე ადამიანის ორგანიზმზე მავნე ზემოქმედებას ახდენს, კერძოდ, ზრდის უძილობის, ჰიპერტონიის, დეპრესიის რისკს, აუარესებს ძილის ხარისხს, ცვლით პროცესებს და შესაძლოა სუიციდური აზრების წარმოშობაც კი გამოიწვიოს.
სომნოლოგი კენჯი ობაიაში ვარაუდობს, რომ ძილის დროს ორგანიზმზე სინათლის მავნე გავლენა უკავშირდება ძილისა და ღვიძილის მდგომარეობის ცვლას და ორგანიზმში მიმდინარე მრავალ სხვა სასიცოცხლო პროცესზე პასუხისმგებელი ცირკადული რიტმის დარღვევას, თუმცა ეს მხოლოდ ვარაუდია, ძილის დროს სინათლის ნეგატიური მოქმედების ზუსტი მექანიზმი მეცნიერებისთვის უცნობია. გასათვალისწინებელია ისიც, რომ ძილის დროს სინათლე ხელს უშლის მელატონინის ნორმალურ გამომუშავებას, ეს ჰორმონი კი ძილისა და ფსიქიკური პროცესების ხარისხს განაგებს. მეცნიერები გვირჩევენ დავიძინოთ სრულ სიბნელესა და სიჩუმეში, რადგან რაც უფრო მკვეთრია სინათლე ძილის დროს, მით უფრო მეტია დეპრესიისა და სუიციდური მიდრეკილების განვითარების რისკი.
