როგორ გვეხმარებიან შინაური ცხოველები ფიზიკური და ემოციური ჯანმრთელობის შენარჩუნებაში
რომ ცხოველები საჭიროებენ მოვლას, გასეირნებას, გართობას, მკურნალობას და ჩვენს თავისუფალ დროს. სახლში შინაური ცხოველის ყოლა დიდი პასუხისმგებლობაა, მაგრამ, ფსიქოლოგების განცხადებით, სწორედ ცხოველების წყალობით შეიძლება ვასწავლოთ ბავშვს პასუხისმგებლობის გრძნობა, სიყვარული, ზრუნვა, განცდა და სიხარულის გაზიარება.
საზოგადოდ, შინაურ ცხოველებს ბევრი საზრუნავი მოაქვთ, მაგრამ მათი სარგებელი გაცილებით დიდია. ისინი აუმჯობესებენ ჩვენს ცხოვრებას.
ცხოველებთან ურთიერთობა ადამიანს სულიერად ამდიდრებს და დაავადებებისგანაც კი კურნავს.
ძაღლის ყოველდღიური გასეირნება ან კატასთან თამაში შესანიშნავი ფიზკულტურაა. ცხოველებთან ურთიერთობა კარგი საშუალებაა სტრესის შესამცირებლად და თავიდან ასარიდებლად. მათზე ზრუნვა, უბრალოდ, არ ტოვებს დროს ცუდი ფიქრებისათვის. საკმარისია, ხელი გადავუსვათ კრუტუნა კატას და ნერვული დაძაბულობაც ქრება. ცხოველებთან ყოველთვის შეიძლება ვიწუწუნოთ ცხოვრებაზე და გული გადავუშალოთ მათ. ისინი საათობით გვისმენენ, არ გვაწყვეტინებენ საუბარს და სულელურ რჩევებსაც არ გვაძლევენ. ცხოველების ამგვარი თერაპია სასიამოვნო და სასარგებლოა, არ გააჩნია მავნე გვერდითი ეფექტები.
ექიმების დამხმარე ცხოველებიდან საუკეთესოა ძაღლი, მეორე ადგილზე კი კატაა. მართალია, შინაური ცხოველების სამკურნალო-პროფილაქტიკური როლი ჯეროვნად არაა შეფასებული, მაინც დაბეჯითებით შეიძლება თქმა, რომ ძაღლი თავიანთ პატრონს უფრო ადამიანურს, პატივისმცემელს, მშვიდს ხდის. ძაღლი ცოცხალი ხიდია ახალ მეგობრებთან.
ჩვენს ოთხფეხა მეგობრებზე რეგულარული ზრუნვა აძლიერებს იმუნურ სისტემას და აქვეითებს არტერიულ წნევას. ცნობილია, რომ კატებს შეუძლიათ ტკივილის შემსუბუქება. რბილი და ფუმფულა შინაური ცხოველები ხსნიან უძილობას და ამცირებენ ნევროლოგიური დაავადებების გამოვლინებას.
ძაღლების მუდმივად გასეირნება აძლიერებს კუნთებსა და სახსრებს, რომ აღარაფერი ვთქვათ ადამიანის ჯანმრთელობისთვის სუფთა ჰაერზე სეირნობის სარგებელზე.
ყველა შინაური ცხოველი მოქმედებს პატრონის ნერვულ სისტემაზე – აძლიერებს მას, ამცირებს გაღიზიანებას და აღგზნებას. მაგალითად, კატის დამოუკიდებელი ხასიათი ადამიანს სძენს სიმშვიდესა და წონასწორობას. საკუთარ ოთხფეხა მეგობრებზე ზრუნვით ადამიანები ხდებიან უფრო თავდაჯერებულები, თავისუფლდებიან კომპლექსებისა და ჩაკეტილობისგან, იძენენ ახალ ნაცნობებს.
ამიტომ არასოდეს არის გვიან ცხოველის სახლში მოყვანა და მასთან ურთიერთობის სიხარულის შეცნობა. შინაური ცხოველები დადებითად მოქმედებენ ჩვენზე, აუმჯობესებენ განწყობას, აქვეითებენ სტრესს, ამცირებენ ტკივილს და დაავადებებთან გამკლავებაში გვეხმარებიან. მათზე ზრუნვა, მოვლა გვასწავლის სიყვარულს, პატივისცემას, მეგობრობასა და თანაგრძნობას. ეს კი ნებისმიერ ასაკშია სასარგებლო.