თუ ყუთებში დაფასოებულ ფინიკს ყიდულობთ, ეტიკეტზე აუცილებლად უნდა იყოს მითითებული კონსერვანტები. თუ ასაწონს ყიდულობთ, შეარჩიეთ რბილი, მაგრამ მშრალი, დაუზიანებელი ნაყოფი. მას მოყვითალო-მოყავისფრო შეფერილობა, ბუნებრივი ბზინვარება და სასიამოვნო სუნი უნდა ჰქონდეს. საკვებად უვარგისია დაზიანებული, უფორმოდ გათხაპნული ფინიკის ჩირი. ფინიკზე ადვილად სახლდებიან ბაქტერიები, ამიტომ ჰაერზე მისი დიდხანს გაჩერება არ შეიძლება.
გარდა ამისა, ჭამამდე ის კარგად უნდა გაირეცხოს, რაც გემოსა და სასარგებლო თვისებებს უკარგავს. უფროსები ხშირად ასაჩუქრებენ ბავშვებს ტკბილეულით - კანფეტებით ან ნამცხვრებით, პედიატრებს კი მიაჩნიათ, რომ ეს ტკბილეული "ცარიელი კალორიებია". აი, ფინიკი გემრიელიც არის და სასარგებლოც. ის შეიძლება დავუმატოთ ხილის სალათს, სხვა დესერტს.
რას შეიცავს ფინიკი?
უხვად რკინას, მაგნიუმს, ფოსფორს, მინერალურ მარილებს, B ჯგუფის ვიტამინებს, კაროტინსა და შეუცვლელ ამინომჟავებსაც კი. მასში ასევე მოიპოვება ცოტაოდენი ფთორი, რომელიც დაზიანებისგან იცავს კბილებს და სელენი, რომელიც აძლიერებს იმუნურ სისტემას და ამცირებს გულ-სისხლძარღვთა დაავადებების განვითარების რისკს. მეცნიერებს მიაჩნიათ, რომ დღეში 10 ცალი ფინიკის ჩირი სავსებით უკმაყოფილებს ორგანიზმს მაგნიუმის, სპილენძისა და გოგირდის მოთხოვნილებას, სანახევროდ - რკინისას და 25%-ით - კალციუმისას. ფინიკი აძლიერებს ორგანიზმს, მატებს ენერგიას, ხელს უწყობს ზრდასა და განვითარებას.
ფინიკის ტკბილი ნაყოფისგან იღებენ ფინიკის თაფლსა და შაქარს (იგი გაცილებით სასარგებლოა, ვიდრე ჭარხლის შაქარი). ყველაფერთან ერთად, ფინიკი მაღალკალორიული პროდუქტია - ერთი ცალის ენერგეტიკული ღირებულება საშუალოდ 25 კილოკალორიას უტოლდება (არც არის გასაკვირი - ჩირის 60-65% ხომ შაქარია, გლუკოზა და ფრუქტოზა), ეს კი ნიშნავს, რომ 10 ცალი ფინიკის პალმის ნაყოფი ერთ ულუფა მსუქანი ხორცის კატლეტს უდრის! გთავაზობთ რამდენიმე რეცეპტს სადღესასწაულო სუფრის გასახალისებლად და გასალამაზებლად.
ეგზოტიკური ასორტი
დაგჭირდებათ:
- 3 ცალი კივი
- 1 ცალი ფორთოხალი
- 2 სადილის კოვზი თეთრი ქიშმიში
- 100 გ ანანასის რბილობი (კუბიკებად დაჭრილი)
- 2 ჩაის კოვზი თაფლი
- 10 ცალი ფინიკის ჩირი
- 1/2 ლიმონის წვენი
- 5 სადილის კოვზი ნაღები
ფინიკის ჩირი გავრეცხოთ, გამოვაცალოთ კურკა და გავჭრათ შუაზე. კუბიკებად დავჭრათ კივი, ფორთოხალი, ანანასი, ავურიოთ ერთმანეთში, მოვაყაროთ ქიშმიში. მიქსერით ავთქვიფოთ ნაღები, თაფლი და ლიმონის წვენი. თეფშის შუაგულში დავდოთ ხილი. ზემოდან მოვასხათ ათქვეფილი მასა. ეს ჩაროზი გემრიელია და სასარგებლო, განსაკუთრებით - ნაზამთრალი ორგანიზმისთვის, ვიდრე ზაფხულის ხილი შემოვა.
