რისთვის ესაჭიროება ორგანიზმს ალფა-ლიპოის მჟავა
ის მონაწილეობს არაერთ ქიმიურ რეაქციაში, განამტკიცებს ჯანმრთელობას და აუმჯობესებს შეგრძნებას.
რა რაოდენობით ესაჭიროება ის ორგანიზმს და როგორ შევივსოთ მისი დეფიციტი?
ჯანმრთელი ორგანიზმი დამოუკიდებლად გამოიმუშავებს ამ მჟავას საკმარის რაოდენობას და სრულად ფარავს ენერგიაზე საკუთარ მოთხოვნილებებს. აღნიშნული მჟავას გამომუშავება მცირდება ორგანიზმში მიმდინარე სხვადასხვა სახის დარღვევის დროს, ისეთი დაავადებების არსებობისას, როგორებიცაა შაქრიანი დიაბეტი, გულის პათოლოგიები, ღვიძლის ციროზი. ლიპოის მჟავას სინთეზი ორგანიზმში ასაკთან ერთად მცირდება. ჯანმრთელობის განსამტკიცებლად და სიცოცხლის გასახანგრძლივებლად აუცილებელია ალფა-ლიპოის მჟავათი მდიდარი პროდუქტების ჩართვა საკვებ რაციონში.
რა ფუნქცია აქვს ალფა-ლიპოის მჟავას?
1) აჩქარებს კანის ჭრილობების შეხორცებას, განსაკუთრებით მზის სხივების ხანგრძლივი ზემოქმედების შედეგად განვითარებული ჭრილობებისას;
2) აქვეითებს გლუკოზის დონეს სისხლში, აუმჯობესებს სისხლის მიმოქცევას და ორგანიზმის მგრძნობელობას ინსულინისადმი, ამცირებს „ცუდი“ ქოლესტერინისა და ტრიგლიცერიდების დონეს, აფერხებს სისხლძარღვთა კედლის დაზიანებას და გართულებათა აღმოცენებას;
3) აუმჯობესებს ნივთიერებათა ცვლის პროცესებს, რის შედეგადაც ორგანიზმი ენერგის წყაროს სახით იყენებს შაქარსა და ცხიმებს. გარდა ამისა, ლიპოის მჟავა აფერხებს იმ ცილის სინთეზს (წარმოებას) ორგანიზმში, რომელიც გაცხიმოვნებას უკავშირდება;
4) ლიპოის მჟავა მძლავრი ანტიოქსიდანტია, რომელიც ანეიტრალებს მავნე თავისუფალ რადიკალებს. ის თრგუნავს ჟანგბადის გარკვეულ აქტიურ ფორმებს (უჯრედთა დამჟანგავს), ააქტივებს კოენზიმ Q10-ს (რომელიც აფერხებს დაბერების პროცესს) და გლუტათიონს (რომელიც იცავს ორგანიზმს ჟანგვითი პროცესებისაგან);
5) აქვეითებს ჟანგვით სტრესს მხედველობის ორგანოებში, აუმჯობესებს მდგომარეობას კატარაქტისა და გლაუკომის დროს;
6) აცხრობს მწვავე ანთებით რეაქციებს ორგანიზმში, განსაკუთრებით - შაქრიანი დიაბეტისა და გაფანტული სკლეროზის დროს.
ალფა-ლიპოის მჟავას შემცველი პროდუქტები
აღნიშნულ მჟავას საკმარისი რაოდენობით შეიცავს:
- ხორცი;
- თევზი და ზღვის პროდუქტები;
- უმი ბოსტნეული;
- ნიგოზი და მცენარეთა თესლები;
- მცენარეული ზეთი.