სახლის დალაგება ისევე აბინძურებს ჰაერს, როგორც გამონაბოლქვი
სასიამოვნო სურნელის მქონე სარეცხი საშუალებებით იატაკების გაწმენდისას, სახლის ატმოსფეროში იმდენივე ტოქსიკური ნაწილაკი წარმოიქმნება, რამდენიც ტრანსპორტით გადატვირთულ ქუჩებში.
განსაკუთრებით საშიში ჯანმრთელობისთვის წიწვოვანი და ციტრუსის არომატის სარეცხი საშუალებებია. ისინი შეიცავენ ორგანულ ნაერთებს- მონოტერპენებს, რომელიც რეაქციაში შედის ჰაერში არსებულ ოზონთან და წარმოქმნის ტოქსიკურ აეროზილებს. ეს უკანასკნელი სასუნთქ გზებში ღრმად აღწევს და იწვევს სასუნთქი ორგანოების და გულ-სისხლძარღვთა სისტემის დაავადებების განვითარებას.
ამერიკელმა მკვლევარებმა ჩაატარეს ექსპერიმენტი და დააკვირდნენ რა ხდება ოთახის ჰაერში სარეცხი საშუალებებით იატაკის მოხეხვის დროს. ექსპერიმენტი ჩატარდა 50მ3 მოცულობის ოთახში. მეცნიერები 12-14 წუთის განმავლობაში წმენდნენ იატაკს სარეცხი საშუალებით და შემდეგ საათნახევრის განმავლობაში აკვირდებოდნენ ოთახის ატმოსფერიში ქიმიურ პროცესებს.
მკვლევარებმა დაადგინეს, რომ მონოტერპენები აქტიურად შედიან რეაქციაში ოზონთან და რამდენიმე წუთში ტოქსიკური მოლეკულების შემცველობა ჰაერში ძალიან მაღალ ნიშნულამდე აღწევს. კომპიუტერულმა მოდელირებამ აჩვენა, რომ ახლად გაწმენდილ ოთახში მყოფი ადამიანი საშუალოდ, ყოველ წუთში შეისუნთქავს 1-10 მილიარდ ნანონაწილაკს. ატმოსფეროს დაბინძურების დაახლოებით იგივე დონე აღინიშნება ტიპური ამერიკული ან ევროპული ქალაქის ავტოტრანსპორტით გადატვირთულ ქუჩაში.
ამასთან ვენტილაციით ჰაერის გასუფთავება ვერ მოხერხდა. როგორც მკვლევარები აცხადებენ, აღნიშნულ შემთხვევაში ჩვეულებრივ განივებას აქვს ბნელი მხარე: ფანჯრების გაღებით ჩვენ ვზრდით ოთახის ჰაერში ოზონის დონეს. ამიტომ ისინი გვირჩევენ სახლის დალაგება განვახორციელოთ დილით ადრე ან საღამოს, მზის ჩასვლის შემდეგ, როდესაც ატმოსფეროში ოზონის დონე ქვეითდება. ასევე უარი ვთქვათ სარეცხ საშუალებებზე წიწვების ან ციტრუსების სურნელით.