ვინ დაშლის მორთულ ნაძვის ხეს
გადაღლილი ქალებისთვის ძნელი ხდება თავიდან აიცილონ სტრესი და ზედმეტი კონფლიქტები. როგორ შეიძლება გავექცეთ ამას?მხიარულებაც დამღლელია. ბევრი ქალი საზეიმო სამზადისს რამდენიმე თვით ადრეც კი იწყებს. ყველა გრანდიოზული გეგმა, ყველაზე სასიამოვნო მოლოდინი მასთან არის დაკავშირებული. სადღესასწაულო ორი კვირის ოჯახურ წრეში, ახლობლებთან გატარების პერსპექტივა საკმაოდ მიმზიდველად გამოიყურება. ბოლოს და ბოლოს, შესაძლებელი გახდება ახლობლებთან დიდხანს ყოფნა, გულითადი საუბარი, განტვირთვა და მხიარულება, სტუმრად წასვლა, თეატრში, საახალწლო წარმოდგენებზე, კონცერტებზე დასწრება.
მოკლედ, წინასწარ იქმნება სამხიარულო განწყობა, ყურადღებისა თუ სიურპრიზებისათვის მომზადება. სამწუხაროდ, ყველასთვის ღიმილის ჩუქება ზედიზედ მრავალი დღის განმავლობაში არც ისე ადვილი საქმეა. მით უმეტეს, ქალებისთვის, რომლებიც სადღესასწაულო დღეების ტვირთის გამო გადაღლილი და დაძაბული არიან. გარდაუვალია ისეთი სიტუაციები, როცა ქალები ცდილობენ არ მიაქციონ ყურადღება ახლობელი ადამიანის არაკორექტულ ქცევას, თვალი დახუჭონ მის ჩვევებსა თუ უცნაურობებზე, რათა არ გააფუჭონ სადღესასწაულო განწყობილება. შედეგად კი მატულობს დაძაბულობა, რომელმაც შეიძლება ერთხელაც იფეთქოს. გარდა ამისა, ორგანიზმი ყველანაირად ცდილობს შეინარჩუნოს წონასწორობა ყველაფერში. ხანგრძლივ სიხარულს აუცილებლად შეცვლის სევდა ან გაღიზიანება. ასე რომ, ნუ შეაჩერებთ მომდგარ ცრემლს, რომელიც განვლილი წლის მოგონებებს უკავშირდება, ასევე, მოძებნეთ დრო მარტო დასარჩენად. ნეგატიური განცდები და მარტოობა მცირე დოზით დაგეხმარებათ დადებითი ემოციების შემდგომი ულუფების მიღებაში.
-
ორომტრიალი
ცხოვრება თავისი რიტმით მიდის, ყველას თავისი საქმე და მოვალეობა აქვს, თითქოს ავტომატურად არის ჩართული თითოეული ქალი ამ საზრუნავში. ჩვეულებრივ დღეებში ახლობლებს ზოგჯერ ორი-სამი საათით თუ ხვდები და გავიწყდება კიდეც, რომ ქმარს ბევრი ლაპარაკი არ უყვარს, ხშირად ჯიუტად დუმს. დედას პირიქით - ხანგრძლივი სატელეფონო საუბარი იტაცებს, მამა კი გამუდმებით ახალ ჟურნალ-გაზეთებს დაეძებს. სადღესასწაულო დღეებში კი მთელი სიმწვავით იჩენს თავს ოჯახის თითოეული წევრის ფსიქოლოგიური ტიპი, ზოგი "ტოროლაა", ზოგი კი "ჭოტი", ყველას სხვადასხვა დროს უჩნდება სხვადასხვა მოთხოვნილების დაკმაყოფილების სურვილი, რის გამოც ერთობლივი დასვენება საფრთხის ქვეშაა.
დიდ ძალისხმევას მოითხოვს ოჯახის ყველა წევრის თავმოყრა საოჯახო საუზმეზე, განსაკუთრებით ახალი წლის ღამის შემდეგ, ზოგს ამ დროს უკვე სადილის მირთმევა სურს, ნაბახუსევი მამაკაცები ხომ უამრავ პრობლემას ქმნიან. არის რიგები აბაზანაში თუ საერთო სარგებლობის წერტილებში, გამუდმებულად ხმაურობენ ბავშვები, მით უმეტეს, თუ ისინი მცირე ასაკისანი არიან, მიმდინარეობს ნამდვილი ბრძოლა ტელევიზორის პულტისათვის, ამას თან ერთვის გამუდმებული სატელეფონო ზარები, მილოცვების მიღება, სტუმრიანობა. ახლობელ ადამიანებს ერთმანეთისათვის სიყვარულის გამოსახატავად დრო აღარ რჩებათ,
ყველა ქალს სადღესასწაულო (ვითომდა დასვენების) დღეებში უამრავი საოჯახო საქმე და მოვალეობა ემატება. ჯერ საახალწლო სამზადისისაგან მიღებული დაღლილობა განვლილი არ არის, რომ მას ახალი ემატება. ახალი წლის მოსალოცად მოსული ნაცნობ-მეგობრები, გასარეცხი ჭურჭლის მთები და კერძების განუწყვეტელი მომზადება, სუფრების გაშლა-ალაგება, ბინის დალაგება და ა.შ. - ყველაფერი ხომ დიასახლისის მხრებზე გადადის. აქ კი შესაძლებელია ქალს ნერვებმა, ნებისყოფამ უმტყუნოს და გარდაუვალია კონფლიქტები უფროსებთან თუ ბავშვებთან.
-
გაითვალისწინოს ქალის ფიზიკური და ფსიქოლოგიური მდგომარეობა
იმისათვის, რომ თავიდან ავიცილოთ შესაძლო "დუელები", ყველამ უნდა გაითვალისწინოს ქალის ფიზიკური თუ ფსიქოლოგიური მდგომარეობა, ის გადაღლილია ფიზიკურადაც და ემოციურადაც. ყველა უნდა შეეცადოს შევიდეს მის მდგომარეობაში, ისიც ხომ არის ღირსი დატკბეს დღესასწაულით და მიიღოს მცირე სიამოვნება მაინც. მასაც ხომ აქვს უფლება განიტვირთოს.
იმისათვის, რომ დღესასწაული შინაპატიმრობად არ ექცეს, ქალმა თავის თავზეც უნდა იფიქროს. ამიტომ თუ ერთ დღეს თქვენ მიიღებთ სტუმრებს, მეორე დღეს შეეცადეთ თვითონაც წახვიდეთ სტუმრად. ისე გაანაწილეთ დრო, რომ დღესასწაული, ყველასთვის საყვარელი ახალი წელი, შობა ერთნაირად სასიამოვნო და დაუვიწყარი იყოს ოჯახის თითოეული წევრისათვის.
არდადეგების საახალწლო პროგრამა არ უნდა გახდეს განხეთქილების საგანი. დასვენება ყველას თავისებურად ესმის. ქმარს ახალი წლის დღეების გატარება ტრადიციულად მეგობრებთან ერთად სუფრასთან სურს, მამა სატელევიზიო გადაცემებშია ჩართული, შვილებს თავიანთი გეგმები აქვთ. დედა სამზარეულოში დგას და ახალ ნამცხვარს აცხობს... ასეთ დროს ალბათ არ ღირს სხვას საკუთარი აზრი მოახვიო თავს, უმჯობესია ყველამ ისე დაისვენოს, როგორც თვითონ სურს. გაივლის საახალწლო ორომტრიალი, ყველაფერი თავის ადგილზე დგება, ჩაივლის მხიარულება, ჟრიამული, რჩება სასიამოვნო დაღლილობის განცდა. ოთახის კუთხეში დგას ახალი წლის სიმბოლო - მორთული ნაძვის ხე, რომელსაც პირველი დღეების ბზინვარება თუ ხიბლი დაუკარგავს. ვინ დაშლის მორთულ ნაძვის ხეს, ვინ მიუჩენს მას თავის ადგილს მომავალ ახალ წლამდე? რა თქმა უნდა, დიასახლისი...