მარიკა დვალი

მით უფრო, რომ დედაქალაქის მოსახლეობის ძირითადი ნაწილი უსახურ კორპუსებში ცხოვრობს და მრავალსართულიანი სახლების ფანჯრებიდან ლამაზი სკვერების ნაცვლად გარაჟებსა და მანქანებს ხედავს... ამიტომ გირჩევთ, საკუთარი ბინა მაინც მორთოთ მცენარეებით. ჩვენცა და ჩვენი სტუმრებიც პირველად ბინის შესასვლელში ვხვდებით. დაგვეთანხმებით, რომ ფართო და ნათელი ჰოლი, რომელსაც მოვლილი მცენარეებიც ამშვენებს, ძალიან ლამაზია. თუმცა ბინების უმრავლესობას ვიწრო და ბნელი შესასვლელი აქვს. ასეთ შემთხვევაში სჯობს, ჩრდილის მოყვარული მცენარეები შევარჩიოთ და ჰოლში, დასაკიდ კალათებში მოვათავსოთ. მიუხედავად ამისა, ხელოვნური განათება მაინც დაგჭირდებათ. შეგიძლიათ, გამოიყენოთ ჩვეულებრივი ლუმინესცენტური ნათურები, მაგრამ უმჯობესია, შეიძინოთ სპეციალური ფიტოლამპა, რომელიც დღეში 6-8 საათს უნდა იყოს ჩართული. იყიდება სპეციალური სანათებიც, რომლებზეც ქოთნებია ჩამოკიდებული.

სასტუმრო ოთახში ყველაზე ლამაზი მცენარეები უნდა მოათავსოთ, ოღონდ პატარა ოთახის ყვავილებით გადატვირთვა არ ღირს. თუ ოთახი დიდია, მცენარეები შეგიძლიათ რამდენიმე ადგილას კუნძულებივით ჩადგათ: ერთ კუთხეში - 3, მეორეში - 4-5... ამასთანავე, სასურველია, მცენარეებიც და ქოთნებიც სხვადასხვა სიმაღლისა იყოს. სანათის ახლოს შეგიძლიათ ფლორარიუმი მოაწყოთ: აიღოთ სხვადასხვა ზომის შუშის ჭურჭელი (შეიძლება აკვარიუმიც), ჩარგოთ ტენის მოყვარული მცენარეები, შემდეგ ნიადაგი მორთოთ ლამაზი ქვებით, ხავსით, ნიჟარებით...

უკანასკნელ ხანს განსაკუთრებული პოპულარობით სარგებლობს ბონსაი - სხვადასხვა ფორმის მინიატურული მცენარეები. მათ დიდ ბრტყელ ჭურჭელში რგავენ, ნიადაგს კი ქვებით და აღმოსავლური სტილის მინიატურული მცენარეებით ამკობენ. რაც უფრო ხანდაზმულია და უცნაური ფორმისაა მცენარე, მით უფრო ძვირფასია ბონსაი. გაითვალისწინეთ: მისი მოვლა სპეციალურ ცოდნას მოითხოვს, ამიტომ წინასწარ გაეცანით სპეციალურ ლიტერატურას.

კარგა ხანია მეფობს მცდარი შეხედულება, რომ საწოლ ოთახში ყვავილებს არაფერი ესაქმებათ. მართალია, არ გირჩევთ, საძინებელი ორანჟერეად აქციოთ, მაგრამ ორიოდე მწვანეფოთოლა ქოთნის მცენარე ნერვულ სისტემაზე უდავოდ დადებითად იმოქმედებს, კაშკაშაყვავილებიანი მცენარეები კი სჯობს სხვა ოთახებისთვის შემოვინახოთ. საწოლის გვერდით მდგარ ტუმბოს გაალამაზებს ცოცხალი ყვავილებისგან შექმნილი კომპოზიცია. თუ ჭურჭელს, რომელშიც ყვავილებია მოთავსებული, საწოლის გადასაფარებლის მსგავს ნაჭერს ან ქაღალდს შემოვახვევთ, კომპოზიცია კიდევ უფრო მომხიბლავი გამოჩნდება.

საძინებელში შეგიძლიათ მეორე სიცოცხლე მიანიჭოთ უკვე მობეზრებულ ყვავილებს, მაგალითად, ტრადესკანციას (ჭორიკანას). ეს ყვავილები ჩარგეთ სხვადასხვა ზომისა და ფორმის შუშის ჭურჭელში, ხოლო მათ ფსკერზე მოათავსეთ ქვები, ქვიშა, ნიჟარები, მარმარილოს ნატეხები. თქვენი დეკორატიული ლარნაკი განსაკუთრებით ეფექტური იქნება, თუ ფერებს ისე შეარჩევთ, რომ ინტერიერს შეესაბამებოდეს.

სამზარეულოს პრიალაფოთლება ტენის მოყვარული მცენარეები შეეფერება - სამზარეულოს სპეციფიკიდან გამომდინარე, ფოთლების გაწმენდა ხშირად მოგიწევთ.

ყვავილი შეგიძლიათ დააბინაოთ არა მარტო ფანჯრის რაფაზე, არამედ სასადილო მაგიდასა და კედლებზეც. სხვათა შორის, ფოტოდიზაინერების აზრით, სულაც არ არის აუცილებელი სასადილოში დეკორატიული მცენარეები, თამამად შეგიძლიათ, ინტერიერი ქოთანში ჩარგული ოხრახუშით ან ქინძით გაალამაზოთ. იქნებ ძალიანაც გინდათ, მცენარეებით სააბაზანო ოთახიც მორთოთ, მაგრამ თუ მას ფანჯარა არ აქვს, არაფერი გამოგივათ. ერთადერთი, რაც შეგიძლიათ თაროზე მოათავსოთ, ისიც რამდენიმე დღით, პატარა თაიგულია. სამაგიეროდ, დიდი, ფართოფანჯრებიანი სააბაზანო ოთახი შეგიძლიათ თბილ ტროპიკებს დაამსგავსოთ. სააბაზანოსთვის იდეალურია ძახველი, რომლის ქოთანიც შეგიძლიათ პირდაპირ იატაკზე დადგათ. ძალიან ლამაზი იქნება ქოთანი, რომლის ფერიც კაფელის და მეტლახის ფერს იმეორებს.

ბავშვების ოთახი ყვავილებით არ უნდა გადატვირთოთ. იდეალურია ერთი დიდი, ხისებრი მცენარე ოთახის კუთხეში და პატარა ქოთანი მაგიდაზე ან ფანჯრის რაფაზე. კომპიუტერის ახლოს შეგიძლიათ მოათავსოთ კაქტუსების კომპოზიცია. ოთახი გახალისდება, თუ ქოთანს ფარდების ან კედლების შესაფერისი სურათებით მორთავთ. მას, ვისაც დიდი და ფართო ლოჯია აქვს, მინიორანჟერეის მოწყობაც შეუძლია. კარგი განათება და ხელსაყრელი მიკროკლიმატი ნამდვილი სამოთხეა ძახველისთვის, ფიკუსისა და მრავალი პატარა მცენარისთვის - აზალიებისთვის, იებისთვის...