რჩევები დიასახლისებს
მიზანშეწონილია ოთხჯერადი კვება, დღიური ულუფის ოდენობა კი დამოკიდებულია ადამიანის ასაკზე, წონაზე, სიმაღლეზე, კლიმატურ პირობებზე, სამუშაოს ხასიათზე. სასურველია, რაციონში ჭარბობდეს ხილი და ბოსტნეული. ვახშამი უნდა იყოს მსუბუქი. უნდა ვივახშმოთ დაძინებამდე არანაკლებ 2 საათით ადრე. სასურველია, კვირის და, მით უმეტეს, დღის რაციონში ერთი და იგივე კერძი არ მეორდებოდეს - თუ კერძს ხშირად მივირთმევთ, რაც უნდა გემრიელი იყოს, მალე მოგვბეზრდება. კერძი სასურველია სუფრაზე მიტანის წინ მოვამზადოთ. გაცხელებისას წვნიანს უფუჭდება გემო, კარგავს სასარგებლო თვისებებს.
ვიტამინები
ვიტამინები ნივთიერებებია, რომლებსაც საკვები შეიცავს. ამ ნივთიერებებს ადამიანის ჯანმრთელობისთვის უდიდესი მნიშვნელობა აქვს - მათ გარეშე სიცოცხლე შეუძლებელია. ვიტამინების ნაკლებობის დროს ორგანიზმი სუსტდება და დაავადებათა მიმართ უფრო მგრძნობიარე ხდება, ხოლო ძლიერი დეფიციტი თვითონვე წარმოადგენს დაავადებას. ამიტომ უნდა ვეცადოთ, კერძის მომზადებისას მაქსიმალურად შევინარჩუნოთ პროდუქტებში არსებული ვიტამინები. ამისთვის:
- წვნიანის მომზადებისას ბოსტნეული წყალთან ერთად კი არ წამოადუღოთ, არამედ მდუღარეში ჩაყარეთ.
- ხილ-ბოსტნეული რაც შეიძლება თხლად გათალეთ, რათა ვიტამინები ნაფცქვენს არ გააყოლოთ - ისინი უმთავრესად ზედა ფენაშია თავმოყრილი. უმჯობესია, კანიანად მოიხარშოს და შემდეგ გაიფცქვნას.
- მოსახრაკი ბოსტნეული მდუღარე ცხიმში ჩაყარეთ და სწრაფად მოურიეთ. ცხიმოვანი გარსი მას ჟანგბადის შეხებისგან დაიცავს და ვიტამინებს შეუნარჩუნებს.
ხარისხიანი პროდუქტი
ხარისხიანი საქონლის ხორცი წითელი ფერისაა, აქვს ოდნავ მოყვითალო ქონი. მუქი ხორცი ყვითელი ქონით მაგარი და უგემურია. ხბოს ხორცი კარგია, თუ მას აქვს ღია წითელი ფერი და საკმაო ქონი.
ცხვრის ხორცი საქონლის ხორცზე ბაცია. მოთეთრო ან მოშავო ხორცი დაავადებულ ცხვარს აქვს.
ღორის ხორცი უნდა იყოს მოთეთრო-მოვარდისფრო, ჰქონდეს თეთრი და მაგარი ქონი. თუ კანი სქელი და მაგარია, ხოლო მასა და ქონს შორის მოლურჯო ხაზი მოჩანს, ღორი ბებერი ყოფილა, ხორცი კი მაგარი და უგემური იქნება. თევზს არ უნდა ჰქონდეს ჩაცვენილი თვალები და ლაყუჩები, ლორწოვანი და ამობურცული კანი.
სხვადასხვა
- თუ ამოლესილ ლობიოს აკეთებთ, წითელი ფერისას გირჩევთ, მოსახრაკად კი გურული ლობიო
სჯობს. - კარტოფილი შესამოწმებლად შუაზე გაჭერით და ნაჭრები ერთმანეთზე წაუსვით. თუ აქაფდა, კარტოფილი ხარისხიანია.
- რძე შესამოწმებლად ჩაასხით გამჭვირვალე ქილაში, ქილის უკან ანთებული სანთელი დადგით და ქილაში გაიხედეთ. თუ სანთელი გამოჩნდა, რძე წყალნარევია.
- თუ კარტოფილს ცხიმში წვავთ, უმჯობესია, თავიდან მაღალ ცეცხლზე შემოდგათ და შემდგომ თანდათან დაუწიოთ.
- ბოსტნეული უშუალოდ ქვაბში ჩაყრის წინ გათალეთ და დაჭერით. თუ დრო ვერ გამოზომეთ, მაშინ გათლილი კარტოფილი ცივ წყალში შეინახეთ, სხვა ბოსტნეული - თავდახურულ ჭურჭელში.
- როდესაც გაზქურა ანთია, ბინაში ტოქსიკური ნივთიერებების შემცველობა საგრძნობლად იზრდება. ელექტროგამწოვი მხოლოდ ნაწილობრივ ასუფთავებს ჰაერს. უკეთესია, ვიდრე გაზი ანთია, სარკმელი ღია იყოს. უკიდურეს შემთხვევაში, სამზარეულო დღეში 2-3-ჯერ მაინც გაანიავეთ.