რჩევები
თვალები
თვალების გარშემო მუქი რგოლები სამი მიზეზით შეიძლება გაჩნდეს:
1. არასაკმარისი და არასრულფასოვანი ძილის გამო;
2. ასაკის მატებასთან ერთად კანი თხელდება და გამჭვირვალე ხდება, ამიტომ მის ქვეშ განლაგებული სისხლძარღვები უფრო შესამჩნევია;
3. ზოგ ადამიანს სისხლძარღვები ბუნებრივად კანის ზედაპირთან ახლოს აქვს განლაგებული.
თუ თვალების გარშემო რგოლები მოულოდნელად გაგიჩნდათ, მაშინ უნდა იცოდეთ, რომ ეს შეიძლება ალერგიის ერთ-ერთი სიმპტომი იყოს. თვალების ირგვლივ კანის შეშუპება კი ორგანიზმიდან სითხის გამოყოფის პროცესის დარღვევაზე მეტყველებს. ასეთ შემთხვევაში შეეცადეთ ნაკლებად ცხიმიანი და მარილიანი კერძები ჭამოთ. უარი თქვით შებოლილ და შემწვარ საკვებზე. არასდროს მოისრისოთ თვალები ხელით, რადგან ეს შეიძლება ორგანიზმში ინფექციის შეტანის მიზეზი გახდეს. თუ თვალები გექავებათ, დაიბანეთ ისინი ჩაის სუსტი ნაყენით.
ფრჩხილები
ფრჩხილების ზედაპირის გადამკვეთი თხელი, განივი ხაზები ან ნახეთქები მიუთითებენ, რომ ახლახან იავადმყოფეთ.
ფრჩხილებზე თეთრი ლაქების გაჩენა დაზიანების ნიშანია და არა კალციუმის ნაკლებობის, როგორც ეს ხალხშია გავრცელებული. აი, ფრჩხილების აშრევება კი ნამდვილად კალციუმის დეფიციტზე მეტყველებს. თუმცა ამ შემთხვევაშიც არსებობს მიზეზთა სხვა ვარიანტები: მაგალითად, ხელების წყალში დიდხანს ყოფნა ან ჭურჭლის უხარისხო სარეცხი საშუალებების გამოყენება. თუ ფრჩხილები ფერმკრთალია და შიგნითაა შეზნექილი, მაშინ, სავარაუდოდ, არ გყოფნით რკინა. ფრჩხილების გარშემო კანის შეწითლებასა და შესივებას იწვევს ინფექცია.
აუცილებელია, რომ ხელები ყოველთვის მშრალი და სუფთა იყოს. სახლის საქმეების შესრულებისას გამოიყენეთ რეზინის ხელთათმანები. დღეში ორჯერ სუფთა ხელებზე წაისვით კრემი. პერიოდულად მიიღეთ ვიტამინები ან ყოველდღიურად იკვებეთ სეზონის შესაფერისი ხილითა და ბოსტნეულით.
ხელები
შეისწავლეთ თითების ანაბეჭდები. ამისათვის დაფქვით ფანქრის გული, ჩაყავით მასში თითების ბალიშები და შემდეგ ეს დასვრილი თითები დააჭირეთ თეთრ ქაღალდს. ანაბეჭდები მზადაა. თუ მარტივი, რკალისებრი ხაზები ჭარბობს, მაშინ, სავარაუდოდ, ჯანმრთელი ხართ. თუ ხაზები რთული, დაკლაკნილი და გადახლართულია, უნდა შეიმოწმოთ არტერიული წნევა. აი, კიდევ ერთი ტესტი - დაასხით ჭიქაში ძალიან ცივი წყალი და დაიჭირეთ იგი ხელში 30 წამით, თუ თითების წვერები გათეთრდება ან გალურჯდება, მაშინ თქვენ დარღვეული გაქვთ სისხლის მიმოქცევა. ხელის თითებზე ტემპერატურის მკვეთრ დაცემას (ცივი თითები) იწვევს თითების (ხელის და ფეხის), ფრჩხილების, ცხვირისა და ყურების სისხლით მომმარაგებელი სისხლძარღვების სპაზმი. შედეგად, ამ მიდამოებში არ მიედინება საკმარისი რაოდენობით სისხლი და აქ ტემპერატურა ეცემა. შეძლებისდაგვარად ერიდეთ ტემპერატურის მკვეთ დაცემას, წელიწადის ცივ პერიოდში ჩაიცვით ხელთათმანები. თუ ეწევით, დაუყონებლივ დაანებეთ თავი: ნიკოტინი უარყოფითად აისახება სისხლის მიმოქცევაზე.
ღრძილები
წითელი და შეშუპებული ღრძილები, რომლებზეც მსუბუქი ზეწოლა იწვევს სისხლდენას, შეიძლება სერიოზულ დაავადებაზე მიუთითებდეს. დაზიანებული ღრძილებიდან ბაქტერიები ხვდებიან სისხლში და შემდეგ მთელ ორგანიზმს ედებიან. დადგენილია კავშირი დაავადებულ ღრძილებსა და გულის შეტევას შორის.
ღრძილების დაავადების სამკურნალოდ აუცილებლად უნდა მიმართოთ სტომატოლოგს.
შეიმოწმეთ სისხლში ქოლესტერინის დონე
გუგების გარშემო წვრილი თეთრი ხაზები სისხლში ქოლესტერინის დონის მატებაზე მეტყველებს. ქოლესტერინემიის კიდევ ერთი გამაფრთხილებელი ნიშანია - ქუთუთოებსა და თვალების გარშემო მცირე ზომის ყვითელი ლაქების გაჩენა.
თუ ზემოთ აღნიშნული სიმპტომები გაქვთ, მაშინ უნდა გადახედოთ დიეტას: მაქსიმალურად შეამცირეთ ცხიმიანი, შებოლილი და შემწვარი საკვების მიღება, კვების რაციონი გაამდიდრეთ მარცვლეულით, პარკოსნებით, ბოსტნეულითა და ხილით.
კანი
თუ კანი გაგიფერმკრთალდათ, გაუხეშდა და ხშირად გექერცლებათ, ეს შეიძლება ფარისებრი ჯირკვლის დისფუნქციას უკავშირდებოდეს. ამ უკანასკნელს კიდევ ახასიათებს: წონის სწრაფი მატება, აპათია. თუ კანი გექერცლებათ, ფეხებზე კი წითელი ლაქები გაგიჩნდათ - სავარაუდოდ, ფარისებრი ჯირკვალი ჰიპერაქტიურია. ამ შემთხვევაში აუცილებლად უნდა მიმართოთ ოჯახის ექიმს ან ენდოკრინოლოგს.
ტესტი მოქნილობაზე
თუ თქვენს სხეულს შენარჩუნებული აქვს მოქნილობა, ე.ი. მყეს-იოგოვანი აპარატი და სახსრები კარგად მუშაობენ და შესაბამისად, მათი და კუნთების დაზიანების რისკი მინიმალურია. დაჯექით იატაკზე, გაასწორეთ ფეხები და შეეცადეთ ხელებით მისწვდეთ ფეხის თითების წვერებს. რაც უფრო იოლად გააკეთებთ ამას, მით უკეთეს ფორმაში გაქვთ სხეული.
სხეული რომ უფრო მოქნილი გქონდეთ, ამაში იოგას ვარჯიშები დაგეხმარებათ. დადგენილია, რომ დღეში მინიმალური, 5-წუთიანი ვარჯიშიც კი მნიშვნელოვნად ამაღლებს კუნთების ტონუსს.
2. ხელისგულების წერტილოვანი მასაჟი (აკუპუნქტურა)
ბუნებამ ყველას გვიბოძა 4 პატარა „კლინიკა“ - 2 მტევნებსა და 2 ტერფებზე. მათი მუშაობის პრინციპის ცოდნა ბევრ პრობლემასთან გამკლავებაში დაგვეხმარება (მწვავე თავის ტკივილიდან, სერიოზული დაავადებების ქრონიკულ სიმპტომებამდე).
თავად განსაჯეთ - მტევანი შედგება ხელისგულისა და 5 თითისგან. ადამიანის სხეულშიც შეიძლება გამოვყოთ ტანი და 5 გამოწეული ნაწილი - თავი კისრით და 4 კიდური. ამგვარად, ცერა თითი - ეს არის თავი და კისერი. მასზეა ასახული ტვინი, მხედველობისა და სმენის ორგანოები. ცერა თითის ხელისგულის მხარე - სახეა, ზურგის მხარე კი -კეფა.
საჩვენებელი და ნეკა თითები - ეს ხელებია. შუა და არათითები კი - ფეხები. მტევნის ხელისგულის მხარე ცერა თითთან დაკავშირებულია გულმკერდის ყაფაზთან, დანარჩენი ნაწილი - მუცლის ღრუსთან. მტევნის ზურგის მხარე - ზურგია, რომელზეც შუა ხაზი შეესაბამება ხერხემალს. იგივე „პროექციებია“ ტერფებზე.
ადამიანის სხეული დაფარულია ურთიერთდაკავშირებული ქსელით. ამის შესახებ ჩვენმა წინაპრებმა მრავალი საუკუნის წინაც იცოდნენ და დაავადებებს ადგენდნენ თვალის გარსისა და ყურის ნიჟარის მდგომარეობის მიხედვით. შეიძლება ითქვას, რომ ყური, თვალები, მტევნები და ტერფები თავისებური პროექციაა, რომელზეც ადამიანის ორგანიზმის კოპირება ხდება.
„ასლები“ მოქმედებენ დისტანციური მართვის სისტემის მსგავსად - როცა რაღაც გტკივა, ამ ადგილას ჯანმრთელი ენერგია „ქრება“ და მისი „გაღვივება-ანთება“ შესაძლებელია მტევნებსა და ტერფებზე დაავადებული ორგანოს შესაბამისი წერტილების მასაჟით (მტევანი და ტერფი მარჯვენა უნდა იყოს თუ მარცხენა, ეს დამოკიდებულია იმაზე, რომელ მხარესაა დაზიანებული ორგანო). სწორედ ესაა მკურნალობის მეთოდი.
როცა ექიმი დაავადებულის მტევანზე ან ტერფზე ამ წერტილს პოულობს, პაციენტი უნებლიე მოძრაობას იწყებს ან ტკივილისგან იშმუშნება.
ასეთ წერტილებზე მექანიკური ზემოქმედება მკურნალობას ეფექტურს ხდის.
მნიშვნელოვანია - თუ ადამიანი „არასწორ“ წერტილს იმასაჟებს, ამას რაიმე ცუდი შედეგი არ მოჰყვება, რაც მკურნალობის ამ მეთოდის უდიდესი ღირსებაა. ყველაზე უარესი, რაც არასწორმა მკურნალობამ შეიძლება გამოიწვიოს, ის არის, რომ არ გაუმჯობესდება ჯანმრთელობის მდგომარეობა. ამგვარი მკურნალობით დაავადების დამძიმება გამორიცხულია.
მტკივნეული წერტილების მასაჟისთვის სპეციალისტები გვირჩევენ სხვადასხვა ზონდის (ლითონის თავმომრგვალებული წკირი), მასაჟორის, ნემსის, მაგნიტისა და სხვათა გამოყენებას. ისინი მკურნალობას კიდევ უფრო ეფექტურს ხდიან. მაგრამ თუ სპეციალური ინსტრუმენტი არ გაქვთ, შეგიძლიათ გამოიყენოთ ასანთის ღერები, ფანქარი ან საკუთარი ფრჩხილებიც კი. წერტილის მასირება 1-2 წუთის განმავლობაში კანზე შეწითლებისა და სითბოს შეგრძნების გაჩენამდე უნდა გაგრძელდეს. შეგიძლიათ გამოიყენოთ თქვენთვის ცნობილი ნებისმიერი სახის მასაჟი - ხელსმა, წრიული მოძრაობა, ზელა, მოთელვა, დარტყმითი ილეთები, ვიბრაცია.
3. ყველაზე ბინძური ადგილები
ყველამ კარგად იცის, რომ ხელების დაბანა აუცილებელია ჭამის წინ, საპირფარეშოდან გამოსვლის შემდეგ, ქუჩიდან შინ მობრუნებისა და განსაკუთრებით - საზოგადოებრივი თავშეყრის ადგილას ყოფნის შემდეგ. არსებობს ბევრი პათოლოგია, რომლებიც ხალხში „ჭუჭყიანი ხელების დაავადების“ სახელწოდებითაა ცნობილი. მათი თავიდან აცილება შესაძლებელია ბავშვობიდან კარგად ცნობილი რჩევის - ჰიგიენის დაცვის გათვალისწინებით (ხელების ხშირი ბანა).
საინტერესოა ის ფაქტი, რომ ჭუჭყი ნაკლებად საშიშია სოფელში, აგარაკზე, ტყეში, ვიდრე დიდ ქალაქებში, სადაც ინფექციების გამავრცელებელი ორგანიზმების ცხოვრებისა და გამრავლებისთვის ხელსაყრელი პირობებია შექმნილი საზოგადოებრივ ტრანსპორტში, მაღაზიებში, რესტორნებში, სკოლებსა და საავადმყოფოებში - ყველგან, სადაც კი დღის განმავლობაში ხალხის დიდი ნაკადი მიედინება.
საინტერესოა ამერიკელი მეცნიერების კვლევა. მათ გააანალიზეს და შეადგინეს ოფისებში ყველაზე ბინძური ადგილების რეიტინგი.
ლიდერობს და ყველაზე საშიში ინფექციის წყაროა საპირფარეშოებში ხელსაბანი ნიჟარები და ონკანების სახელურები. მათ მოსდევს მიკროტალღური ღუმელებისა და მაცივრების სახელურები, მესამე ადგილზეა კომპიუტერის კლავიატურა და მაუსი. ყველაზე ჭუჭყიან და საშიშ ნივთთა სიაში შესულია ყავის მანქანისა და ტელეფონის ღილაკები.
სასტუმროებშიც არის განსაკუთრებულად ბინძური ადგილები. საინტერესო და მოულოდნელია, რომ პირველ ადგილს აქ ტელევიზორის პულტი, ტელეფონის ღილაკები და სინათლის ჩამრთველ-ამომრთველი იკავებს. მაგრამ ეს ნივთები სიბინძურის თვალსაზრისით მნიშვნელოვნად ჩამორჩებიან დამლაგებლის ვედროს, ჯაგრისსა და რეზინის ხელთათმანებს. დამლაგებელი არა მარტო ალაგებს ნომერს, არამედ ერთი ნომრიდან მეორეში ინფექციის გადამტანიცაა.
არც საკუთარ საცხოვრებელ სახლშია ადამიანი დაცული ბაქტერიებისა და მიკროორგანიზმებისაგან. საინტერესოა, რომ ჩვენს სახლში ყველაზე ბინძური ადგილი უნიტაზი კი არაა, არამედ ხის საჭრელი დაფა. ზოგიერთი მეცნიერის მიერ ჩატარებული კვლევის შედეგების მიხედვით, ამ დაფაზე 200-ჯერ მეტი მიკრობია, ვიდრე უნიტაზზე.
სიბინძურის თვალსაზრისით მეორე ადგილს იკავებს სახლის ტელეფონი, კერძოდ კი ყურმილი. ბინძური ნივთების რეიტინგში ასევე შევიდა: ჭურჭლის სარეცხი ღრუბელი, შხაპის კაბინის ფარდა და ნაგვის ვედრო. არ უნდა დაგვავიწყდეს ჭურჭლის სარეცხი და სარეცხი მანქანა, რომელთა კარზეც შეიძლება გაჩნდეს ობი და სოკო.
ბინძურ ადგილთა სიაში შედის ხელისგულებიც და ეს დადასტურდა ამერიკელი მეცნიერების მიერ ჩატარებული კვლევებით. მათ 51 სტუდენტის (102 ხელი) ხელისგულიდან აიღეს მასალა, გამოიკვლიეს და მასში 4,5 ათასი სახის ბაქტერია აღმოაჩინეს.