მითები სქელი თმის შესახებ
მითი პირველი - არ შეიძლება თმის დაბანისთანავე დავარცხნა
სველი თმა ფუვდება და ერთმანეთს ეკვრის. თუ ის ასევე გავიშრეთ, აღარ დაგვემორჩილება და ცუდად დადგება. უმჯობესია, დაბანისთანავე დავივარცხნოთ. შეარჩიეთ მსხვილკბილება, თავებმომრგვალებული სავარცხელი. თმის ვარცხნა ძირებიდან დაიწყეთ, ფრთხილად ჩამოუყევით თითოეულ კონას.
მითი მეორე - თუ თმას ხშირად შეიჭრით, თანდათან გახშირდება
სამწუხაროდ, ასე არ არის. რა ხშირადაც არ უნდა შევიჭრათ თმა, თმის ძირების რაოდენობა არ მოიმატებს, შესაბამისად, ვერც თმა გახშირდება.
მითი მესამე - თუ სავარცხელზე თმა რჩება, ცუდის ნიშანია
ჯანმრთელი თმაც ცვივა. ეს ნორმალური პროცესია. დღე-ღამეში ადამიანი თმის ასამდე ღერს კარგავს. ქერათმიანებს თავზე 140 000-მდე თმის ღერი აქვთ, წაბლისფერთმიანებს - 109 000, შავთმიანებს - 102 000, ხოლო წითურებს - 88 000. ასე რომ, დღეში 100 ღერის დაცვენა საშიში არ არის. საგანგაშო ნიშანია, თუ თმა ბღუჯებად ცვივა. გაითვალისწინეთ: თმას ძლიერი ვარცხნაც აზიანებს.
მითი მეოთხე - თავსაბურავი ზიანს აყენებს თმას
გააჩნია, როგორია თავსაბურავი. მჭიდრო ქუდი ხელს უშლის თმის კვებას და შესაძლოა, მავნე გავლენა მოახდინოს თმის ჯანმრთელობაზე. მაგრამ თავსაბურავზე სულ მთლად უარის თქმა არ შეიძლება. მაგალითად, საზაფხულო ქუდები - პანამა, სომბრერო, კეპი და სხვა - თმას მზის ულტრაიისფერი სხივებისგან იცავენ, ზამთრისა კი - სიცივისგან.
მითი მეხუთე - დიეტა თმას არ ვნებს
სრულფასოვანი რაციონი სილამაზის აუცილებელი პირობაა. თუ თმას რაიმე არასასიამოვნო შეატყვეთ, მოამარაგეთ პროტეინებით. ჩართეთ რაციონში ნატურალური პროდუქტები: თევზი, ხორცი, კვერცხი. განსაკუთრებით სასარგებლოა მუქი მწვანე ბოსტნეული და ხილი - მათ შემადგენლობაში შედის თმისთვის აუცილებელი ფოლიუმის მჟავა. მიეძალეთ რეჰანს, ოხრახუშსა და სხვა მწვანილს - ის იმუნიტეტს ამაღლებს.
მითი მეექვსე - თავის მასაჟი ააქტიურებს თმის ზრდას
წარმოდგენა, რომ დავარცხნის დროს სავარცხელი 100-ჯერ უნდა გადავიტაროთ თმაზე, სადავოა. ვარცხნის პროცესი ააქტიურებს ცხიმოვან ჯირკვლებს, რომლებიც პასუხს აგებენ კანის ცხიმის გამომუშავებაზე. შედეგად თმა გაცხიმიანდება, უსიამოვნოდ აბზინდება და წებოვანი გახდება. სავსებით საკმარისია, თმა გულმოდგინედ დავივარცხნოთ ჯაგრისით დილაობით და საღამოობით, ძილის წინ.
მითი მეშვიდე - თმის ხშირი ბანა და ღებვა გამელოტებას იწვევს
თმა უნდა დავიბანოთ არა კვირაში ერთხელ, ორჯერ ან სამჯერ, არამედ მაშინ, როცა გაჭუჭყიანდება. თუ კვირაში 5-7-ჯერ ხართ მიჩვეული თავის ბანას, შეარჩიეთ ყოველდღიური ხმარებისთვის განკუთვნილი შამპუნი. ის არ შეიცავს აგრესიულ გამწმენდ ნივთიერებებს და არ აშრობს თმას. თმის შეღებვის შემდეგ კი მთავარი ამოცანაა დამატენიანებელი, აღმდგენი და დამცავი საშუალებების გამოყენება.
მითი მერვე - ფენი თმას აშრობს
თანამედროვე ფენები უსაფრთხოა. ისინი არ გავნებენ, თუ მუდმივად არ გამოიყენებთ და დამზოგველი რეჟიმით ისარგებლებთ. და მაინც, ეცადეთ, დროდადრო მაინც დაასვენოთ თმა.