ლალი ჩხიკვაძე

ყველაზე პასუხსაგებ მომენტში ის შეიძლება ზედმეტად დავამოკლოთ და შევიტრუსოთ კიდეც. ამ შემთხვევაში ყველაფერი უნდა გავაკეთოთ, რათა თმას მივცეთ მოვლილი, ჯანსაღი შესახედაობა და წინამოც რაც შეიძლება სწრაფად წამოვიზარდოთ. ამისთვის თვალი უნდა გადავავლოთ ჩვენს რაციონს, ყოველდღიურ მენიუში ჩავრთოთ სპილენძით, კალციუმით, გოგირდითა და თუთიით გამდიდრებული საკვები. თმის ზრდას ხელს უწყობს B6, B12, E, A, H,C ვიტამინები.

1. A ვიტამინს დიდი რაოდენობით შეიცავს კვერცხი, სტაფილო, ზვიგენის ღვიძლი.
2. C ვიტამინს შეიცავს ციტრუსები, ბულგარული წიწაკა და კომბოსტო.
3. H ვიტამინი არის ბრინჯში, ლუდის საფუარსა და შვრიაში.
4. E ვიტამინი შედის არარაფინირებული მცენარეული ზეთის შემადგენლობაში.

თუ თმისთვის განკუთვნილ ბიოლოგიურად აქტიურ დანამატებსა და ვიტამინების კომპლექსს იღებთ, გულდასმით დაიცავით დოზირება.

• თავის მასაჟი

დაიზილეთ თავის კანი, თან გამოიყენეთ თმის ზრდის გამააქტიურებელი საშუალებები (ბალზამი, ზეთი, სპრეი, ნაყენი). ამის გაკეთება საჭიროა რეგულარულად, განსაკუთრებით - იმ ადგილის, სადაც წინამო იზრდება. ასეთი მასაჟი კეთდება სავარცხლით ან სპეციალური მასაჟორით. თუ მასაჟორს იყენებთ, იგი ნატურალური მასალისგან უნდა იყოს დამზადებული.

თუ ყოველდღე დაიხვევთ წინამოს ცხელი მაშით ან გაისწორებთ უთოთი, იგი ნელა გაიზრდება. წინამო სწრაფად რომ გაიზარდოს და იმავდროულად შეინარჩუნოს ჯანსაღი შესახედაობა, რაც შეიძლება იშვიათად უნდა ვისარგებლოთ დავარცხნისთვის საჭირო სპეციალური ხელსაწყოებით, რომლებიც აზიანებს თმას.

იშვიათად გამოიყენეთ რეზინი, თმის დამჭერი საშუალებები - ისინი ხელს უშლიან თმის ბოლქვამდე სისხლის დენას და ანელებენ თმის ზრდას. სანამ თმა არ გაიზრდება, ერიდეთ შეღებვასა და ქიმიურ დახვევას - ესეც მავნებელია თმისთვის. ნუ გაიკეთებთ ლამინირებას - ეს პროცედურა, მართალია, იცავს თმას მავნე გარეგანი ფაქტორებისაგან, მაგრამ ანელებს მის ზრდას.

თვალი გადაავლეთ თმის მოვლის საშუალებებს. არსებობს ისეთი საშუალებები, რომლებიც ხელს უწყობს თმის ზრდას. ეს შეიძლება იყოს ნიღაბი, ბალზამი, შამპუნი, თმის ზრდის მასტიმულირებელი შრატი.

შეარჩიეთ თმის ისეთი კოსმეტიკა, რომლის შემადგენლობაშიც შედის ნატურალური კომპონენტები. არსებობს პროფესიული კოსმეტიკური საშუალებებიც, რომელთა გამოყენება შინაც შესაძლებელია. ეცადეთ, დაიცვათ თმა მავნე გარეგანი ფაქტორებისგან. შეარჩიეთ შესაბამისი საშუალებები და გამოიყენეთ ისინი რეგულარულად. დაუცველი თმა გაცილებით სწრაფად კარგავს ტენს, რაც მისი ზრდის შენელებას იწვევს.

• თმის ზრდის დამაჩქარებელი ხალხური საშუალებები

დღეში 2-ჯერ დაიზილეთ თავის კანი აბუსალათინის ან ქაცვის ზეთით. მასაჟი უნდა გაგრძელდეს 3-დან 10 წუთამდე. ამ პროცედურის შედეგად თავის კანში ჩქარდება ცვლის პროცესები და ძლიერდება სისხლის ცირკულაცია.

კარგია არყის ხის ფოთლებისა და ღვიის ტოტების ნაყენი. აიღეთ თანაბარი რაოდენობით, აურიეთ ერთმანეთში, 1 სუფრის კოვზ ნარევს დაასხით 1 ლიტრი წყალი და გადაივლეთ თმაზე.

აიღეთ 7 სუფრის კოვზი ოროვანდის ფესვის ნახარში, 5 სუფრის კოვზი ხახვის წვენი და 4 სუფრის კოვზი კონიაკი. გულდასმით აურიეთ და შეიზილეთ თმის ძირებში. გაიჩერეთ 2 საათი და ჩამოიბანეთ თბილი წყლითა და შამპუნით.

არსებობს უამრავი მეთოდი წინამოს ზრდის დასაჩქარებლად, მაგრამ უნდა გავითვალისწინოთ, რომ ისინი თმის ზრდას თვეში 0,5-1 სმ-ით თუ დააჩქარებს.

სასწაულს მათგან ნუ ელით, მოიკრიბეთ მოთმინება, რადგან წინამოს გაზრდა ორ დღეში შეუძლებელია. თუ წვეულებისთვის საჩქაროდ დაგჭირდათ საგანგებო ვარცხნილობა, გამოიყენეთ ხელოვნური თმა, ვიდრე საკუთარი წამოგეზრდებათ.