სანამ გვიან არ არის
ბრეკეტები სხვადასხვა ფორმისა და მასალისაა. ფასიც სხვადასხვა აქვს. მათ ინდივიდუალურად შეურჩევენ თითოეულ პაციენტს. ბრეკეტები არსებობს ჩვეულებრივი, ანუ გარედან დასამაგრებელი, და ლინგვალური, რომლებიც კბილების შიგნითა ზედაპირზე მაგრდება. მასალად იყენებენ ლითონსაც (ფოლადს, მოოქრულ მეტალს), პლასტმასასაც და ფაიფურსაც. პლასტმასისა და ფაიფურის ბრეკეტები გაცილებით ესთეტიკურია და ასეც უწოდებენ. მთავარი კი ის არის, რომ ფულსა და ძალისხმევასთან ერთად აუცილებელია დიდი პასუხისმგებლობა. ექიმის ყველა რეკომენდაციის ზედმიწევნით შესრულებისა და პირადი ჰიგიენის დაცვის გარეშე სასურველ შედეგს ვერ მიიღებთ. მზად იყავით იმისთვისაც, რომ ბრეკეტებით მოგიწევთ სიარული არა 1-2 თვე, არამედ შესაძლოა წელიწადნახევარიც კი, ამიტომ ამისთვის წინასწარ უნდა შეიქმნათ განწყობა.
ღამღამობით მიბუჟდება მტევნები. დღისით გამივლის ხოლმე. დიდხანს ჯდომის შემდეგ სავარძლიდან ადგომა მიჭირს. რისი ბრალია ეს? რას მირჩევთ?
ეს შესაძლოა კისრის ოსტეოქონდროზის ბრალი იყოს. გირჩევთ, მიმართოთ სპეციალისტს - ნევროლოგს, ჩაიტაროთ ელექტრონეირომიოგრაფია და სხვა საჭირო გამოკვლევები.
გამუდმებით მტკივა მუცლის ქვედა ნაწილი. ჩავიტარე ულტრაბგერითი გამოკვლევა - საკვერცხეები ნორმალურ მდგომარეობაშია, მაგრამ ექიმმა ნაწლავთან დაკავშირებული რაღაც პრობლემა აღმოაჩინა. შეიძლება, ამის გამო მქონდეს უსიამოვნო შეგრძნებები?
სავსებით შესაძლებელია. გირჩევთ, მიმართოთ გასტროენტეროლოგს, ჩაიტაროთ მუცლის ღრუს ულტრაბგერითი გამოკვლევა და სხვა აუცილებელი ანალიზები. ტკივილი მუცლის ღრუში საკმაოდ რთული პრობლემაა. ამაში სათანადოდ მხოლოდ სპეციალისტი გაერკვევა. გასტროენტეროლოგმა შესაძლოა უროლოგთან გაგაგზავნოთ, რათა შარდის ბუშტის ანთება (ცისტიტი) გამოირიცხოს.
ბოლო ხანს თვალები მეცრემლება, ხშირად - ქუჩაში, მზიან დღეს. რისი ბრალი შეიძლება იყოს ეს?
ცრემლდენა შეიძლება გამოიწვიოს ალერგიამ, კონიუნქტივიტმა, აგრეთვე - სამუშაოს სპეციფიკამ და ქრონიკულმა სტრესმაც კი. გამორიცხული არ არის, გქონდეთ საცრემლე მილების ანთება, საცრემლე ტომრის ანთება, საცრემლე არხების შევიწროება. გირჩევთ, დროულად მიმართოთ ოფთალმოლოგს. თვალი საკმაოდ ფაქიზი ორგანოა და მასთან ხუმრობა არ შეიძლება.
დამეწყო ხელ-ფეხის ქავილი. ძლიერი არ არის, მაგრამ უსიამოვნოა. ალერგია არასოდეს მქონია. რისი ბრალი უნდა იყოს ეს?
უპირველეს ყოვლისა, გირჩევთ მიმართოთ ექიმ დერმატოლოგს და გამორიცხოთ მუნი. ნუ იფიქრებთ, რომ ეს დაავადება წარსულს ჩაბარდა. მასზე საუბარი სასიამოვნო არ არის, მაგრამ დღეს ის ხშირად გვახსენებს თავს. ბევრი რამ არის დამოკიდებული პირად ჰიგიენაზე, თუმცა მუნი შეიძლება ძალიან სუფთა ადამიანსაც გადაედოს, მაგალითად, საზოგადოებრივ ტრანსპორტში და კარის სახელურიდანაც კი. ამ დაავადების დამახასიათებელი სიმპტომია ქავილი, რომელიც განსაკუთრებით ძლიერდება საღამოობით და ღამით. მუნი დღეს ადვილად იკურნება. თუ ეს დიაგნოზი არ დადასტურდა, სპეციალისტი მიაგნებს ალერგიული რეაქციის მიზეზს და დანიშნავს მკურნალობას. დაუკვირდით ნერვებსაც - ზოგჯერ ქავილი სტრესით ან ქრონიკული გადაღლით არის გამოწვეული.