ცხოვრება სიამოვნებისთვის - როგორ დავიმშვიდოთ ნერვები
რატომ ირჩევს დეპრესია ქალებს?
დეპრესიას უმეტესად მშვენიერი სქესი უჩივის. ქალებს დეპრესიული აშლილობა 3-ჯერ ხშირად ემართებათ, ვიდრე მამაკაცებს. როგორც ჩანს, ეს ქალის ფიზიოლოგიის ბრალია. დეპრესიის განვითარება ნივთიერებათა ცვლის თავისებურებებით არის განპირობებული. ქალები მამაკაცებზე ხშირად განიცდიან ჰორმონულ გარდაქმნებს, რომლებიც გავლენას ახდენს მთელი ორგანიზმის მუშაობაზე, მათ შორის - ფსიქოლოგიაზეც. სწორედ ფიზიოლოგიის ბრალია წმინდა ქალური აშლილობები: მენსტრუაციამდელი, მშობიარობის შემდგომი და კლიმაქსური პერიოდის დეპრესია. ფიზიოლოგიასთან ერთად მნიშვნელოვანია ემოციურობაც. ცნობილია, რომ ქალები გაცილებით უფრო ძლიერად რეაგირებენ გამღიზიანებლებზე, რაც თანდათანობით არყევს ფსიქიკას. მეორე მხრივ, ქალების უმრავლესობა აღზრდისა და სოციალური ნორმების გამო სამარცხვინოდ მიიჩნევს მრისხანების აშკარა გამომჟღავნებას და მას ცრემლებით და დეპრესიის სხვა ტიპური სიმპტომებით გამოხატავს. დაბოლოს, დეპრესია უმწეობის იმ განცდისგან თავის დაცვის საშუალებაა, რომელიც უჩნდება ქალს სამსახურებრივი თუ პირადი სირთულეების დროს. საოცარია, მაგრამ ქალებში დეპრესიული მდგომარეობა პიკს 30-40 წლის ასაკში აღწევს - იმ პერიოდში, რომელსაც სამართლიანად მიიჩნევენ პიროვნების გაფურჩქვნის ხანად. მეცნიერები ამტკიცებენ, რომ ეს რამდენიმე ფაქტორით შეიძლება აიხსნას. ჯერ ერთი, ეს არის რეპროდუქციული ასაკი, ხოლო ორსულობა და ბავშვის გაჩენა, როგორც აღვნიშნეთ, იწვევს ჰორმონულ გარდაქმნებს, რომლებიც, თავის მხრივ, უგუნებობას განაპირობებს. მეორე - ამ პერიოდში ქალები ხშირად ეყრებიან ქმრებს, რაც ასევე მძიმე განცდებთან არის დაკავშირებული. მესამე - 30-40 წლის ასაკში სუსტი სქესი თავდაუზოგავად მუშაობს კარიერული ზრდისთვის და საკუთარ თავზე გამოცდის საქმიანი ცხოვრების რიტმის ყველა სიკეთეს. გამოდის, რომ თუ ქალი ხარ, დეპრესია გარდაუვალია? სულაც არა. იმისთვის, რომ მინიმუმამდე დაიყვანოთ ნერვული აშლილობის განვითარების ალბათობა, მისდიეთ ცხოვრების აქტიურ წესს, უარს ნუ იტყვით დასვენებაზე და ნუ მოგერიდებათ დახმარების თხოვნა. დასამშვიდებლად ზოგი ფანქარს ღეჭავს, ზოგი ისტერიულად სცემს ბოლთას, ზოგი ათამდე ითვლის, ზოგი კი თავის აგრესიას ახლობლებს ატეხს თავზე. ასეთ დროს ნერვების დასაწყნარებელი საშუალება უნდა მოიძებნოს. ზოგჯერ ეფექტურია სამკურნალო საშუალებებიც. ყველაზე ცნობილი მათ შორის, ცხადია, კატაბალახას ნაყენია. უფრო ძლიერმოქმედ პრეპარატებს იღებენ კურსობრივად. მათ აქვთ უკუჩვენებაც, ამიტომ მხოლოდ სპეციალისტმა უნდა დანიშნოს. მაგრამ ვიდრე აფთიაქში შეიხედავდეთ, მოდი, უწამლოდ დამშვიდება სცადეთ. დამამშვიდებელ გავლენას ახდენს ნელა მდინარე წყლის ყურება. იყიდება კიდეც ხელოვნური მინიშადრევნები, სურათები მოძრავი ჩანჩქერებით და სხვა. თუ ეს არ გშველით, მიიღეთ კონტრასტული შხაპი. დამშვიდებაში დაგეხმარებათ ხელის თითების მოძრაობაც. ცნობილია, რომ თითის ბოლოებზე უამრავი ნერვული დაბოლოებაა თავმოყრილი. ზოგიერთს შველის ქსოვაც. დაბოლოს, შეიცვალეთ ცხოვრების წესი, რადგან ზედმეტი ნევროზულობა არასწორი რეჟიმისა და დაბალი თვითშეფასების უშუალო შედეგია. ის, ვინც ფიზიკურად ძლიერია, სწორად იკვებება და იცავს შრომისა და დასვენების რეჟიმს, ნაკლებად არის მიდრეკილი დეპრესიისკენ. თუ, ამასთან ერთად, იმოგზაურებთ, ივლით ლაშქრობაში, შეხვდებით საინტერესო ადამიანებს, დადებითი ემოციებით აივსებით, რაც სულიერი კომფორტის საწინდარი იქნება. როდესაც იმის შეგრძნება გაგიჩნდებათ, რომ რთულ სიტუაციას თავს ვეღარ ართმევთ, ნუ მოგერიდებათ ახლობლებისთვის ამის თქმის, ნუ ჩაიკეტებით საკუთარ თავში. საყვარელი ადამიანების მხარდაჭერასა და ყურადღებას სასწაულის მოხდენა შეუძლია. ხშირად გაიღიმეთ და პრობლემებს იუმორით შეხედეთ. ამ შემთხვევაში ნერვების დასაწყნარებლად დამატებითი ძალისხმევა აღარ დაგჭირდებათ.