საზაფხულო რჩევები
დავისვენო და გავირუჯო ისე, რომ ჯანმრთელობას ზიანი არ მივაყენო? მინდა, დაბრუნებისას კარგად გამოვიყურებოდე.
მზე, ჰაერი და წყალი ჩვენი საუკეთესო მეგობრები არიან. რაც უფრო შორს ვართ დიდი ქალაქისგან, მით უფრო სუფთაა წყალი და ჰაერი, მაგრამ მზის აქტივობა უცვლელი რჩება, ზღვა კი ყველგან მლაშეა.
- იზრუნეთ თმაზე. წინააღმდეგ შემთხვევაში მზისა და ზღვის წყლის ზემოქმედებით დაზიანებული თმა შემოდგომაზე შესაჭრელი გაგიხდებათ.
- ჩვეულებრივი შამპუნის ნაცვლად დამცავი ფაქტორის შემცველი გამოიყენეთ. ბალზამი და თმისათვის განკუთვნილი ყველა დანარჩენი საშუალებაც (ფიქსატორი, ლაქი) - ასეთივე.
- ნუ გაჩერდებით მზეზე თავშიშველი. დაიხურეთ პანამა, სომბრერო, წაიკარით ხილაბანდი.
- ნუ იბანავებთ ზღვაში თმაგაშლილი. თმა შეიკარით და დაიმაგრეთ.
- ზღვაში ბანაობის შემდეგ აუცილებლად გადაივლეთ თმაზე სუფთა წყალი.
- ნამზეური მხოლოდ მაშინ არის მომხიბვლელი, როცა მას თან არ ახლავს დამწვრობა და მტკივნეული შეგრძნებები, ამიტომ გარუჯვისას აუცილებლად წაისვით მზისგან დამცავი კრემი, მზის აბაზანის შემდეგ კი კანის დამარბილებელი და დამატენიანებელი საშუალებები, განსაკუთრებით - მგრძნობიარე ადგილებზე.
- მზისგან დამცავი კრემის წასმისას ნუ დაივიწყებთ საჯდომს - აქ კანი ყველაზე სწრაფად იწვება.
ნამდვილი სიცხის დადგომისთანავე თავს იჩენს სერიოზული პრობლემა - ოფლის სუნი. იმაზე, რომ დილა-საღამოს შხაპი აუცილებელია, ლაპარაკიც ზედმეტია. გარდა ამისა, აუცილებლად გამოიყენეთ დეზოდორანტი. ყურადღება მიაქციეთ ეპილაციას: თმიანი საფარველი უფრო მეტად ინარჩუნებს ოფლის სუნს. არსებობს სპეციალური დეზოდორანტები, რომლებიც თმის ზრდის პროცესს ანელებს.
სხეულის პილინგის დროს აუცილებლად დაიმუშავეთ ფეხისგულები, განსაკუთრებით - ქუსლები, მერე კი წაისვით მკვებავი კრემი. თუ პილინგი არ გაიკეთეთ და გარქოვანებული კანი არ მოიცილეთ, ნატიფი პედიკიურიც კი ვერ გიშველით!
ასევე არაესთეტიკურია მოუვლელი იდაყვებიც: კანი გამომშრალია, მუქი და უხეში, ზოგჯერ იქერცლება კიდეც... ჯობს, საქმე აქამდე არ მიიყვანოთ, მაგრამ თუ პრობლემებმა მაინც იჩინა თავი, ისარგებლეთ მარტივი რეცეპტით: იდაყვების დასარბილებლად გამოიყენეთ ცხელი აბაზანები (ზეითუნის ზეთს დაუმატეთ რამდენიმე წვეთი ლიმონის წვენი), გასათეთრებლად კი ლიმონის "ფინჯნებში" ჩაყავით.
გარუჯვის შემდეგ ბევრი კოსმეტიკას ივიწყებს. მართლაც, ბრინჯაოსფერი კანი შეუღებავადაც ეფექტურია, თუმცა ზოგჯერ სიტუაცია მაინც მოითხოვს მაკიაჟს. ასეთ დროს აქტუალურია მბზინავი საშუალებები მოციმციმე ეფექტით, ასევე - ავტონამზეური კანის ერთგვაროვანი ტონალობის მისაღწევად. აქცენტი უნდა გაკეთდეს თვალებზე, შეგიძლიათ, არ გამოიყენოთ ფანქარი, ისარგებლოთ მხოლოდ თვალის ჩრდილით.
პუდრი კანისფერი ან ოდნავ მუქი უნდა იყოს.
ტუჩებზე ძალიან თხლად და ფაქიზად წაისვით ოქროსფერი ან ბრინჯაოსფერი მოციმციმე საცხი.
სიცხეში გული ყოველთვის გამაგრილებელი სასმელებისკენ მიგვიწევს. რით მოვიკლათ წყურვილი?
რა თქმა უნდა, ყველაფერს წყალი სჯობს. უფრო უკეთესია მინერალური. ის აღუდგენს ორგანიზმს არა მარტო დაკარგულ სითხეს, არამედ მარილებსაც, რომლებიც ოფლთან ერთად გამოდის. გაზიანი სასმელი წყურვილს მხოლოდ იმ შემთხვევაში მოგიკლავთ, თუ აქვს მომჟავო-მოტკბო გემო და დამზადებულია ნატურალური შაქრით. შაქრის შემცვლელები და სხვა დანამატები პირში თავისებურ გემოს ტოვებენ, რის გამოც კვლავ გიჩნდებათ დალევის სურვილი. აი, აქ კი ზომიერება გმართებთ. საქმე ის არის, რომ გაზიანი და შუშხუნა სასმელები შეიცავს ნივთიერებებს, რომლებიც ორგანიზმიდან გამოაძევებს კალციუმს. გარდა ამისა, სითხის ჭარბი მიღება ტვირთავს გულსა და თირკმელებს.
თუ დილით ფინჯან ჩაის დალევთ (სურვილისამებრ, შავს ან მწვანეს), წყურვილი სადილობამდე აღარ შეგაწუხებთ. გარდა ამისა, ჩაიში შემავალი ნივთიერებები სწევს ორგანიზმის ტონუსს, ამაგრებს ნერვულ და იმუნურ სისტემას.