შეიმსუბუქეთ მძიმე ხვედრი - მკურნალი.გე

ეკა ჭავჭავაძე

სამსახურის დადებითი მხარეები:

ქალს შეუძლია, თავი საყვარელ საქმეს მიუძღვნას და ამით უდიდესი სიამოვნება მიიღოს, დაიმსახუროს დაფასება და ავტორიტეტი, იყოს ფინანსურად დამოუკიდებელი, ჰქონდეს ახალი ნაცნობობისა და კავშირების გაბმის საშუალება. იზრდება მისი თვალთახედვის არეალი და კარიერულ კიბეზე ზევით მიიწევს.

სამსახურის უარყოფითი მხარეები:

თავის მოსავლელად ნაკლები დრო რჩება, ოჯახზე სათანადოდ ვერ ზრუნავს, მოიკოჭლებს შვილების აღზრდაში. მუდმივად თანამშრომელთა შორის ყოფნა აკარგვინებს ძველ მეგობრებს. ქალი ემსგავსება რბოლის შემდგომ დაქანცულ ბედაურს, რომლის ჯანმრთელობაც საგრძნობლად ირყევა. ქმარს ავიწყდება, როგორ გამოიყურებოდა მისი მეუღლე რამდენიმე წლის წინათ.

დიასახლისობის დადებითი მხარეები:

საშუალება აქვს, მოუაროს სახლს, ნამდვილად მყუდრო სავანედ აქციოს. სათანადოდ აღზარდოს შვილები, მეტი ყურადღება დაუთმოს გარეგნობასა და ჯანმრთელობას, იაროს თეატრსა და კინოში, შეხვდეს მეგობრებს და არ იჩქაროს შინ დაბრუნება მეორე დღეს სამსახურში დაგვიანების შიშით.

დიასახლისობის უარყოფითი მხარეები:

დროის სიჭარბის გამო ზოგჯერ არ იცის, რა აკეთოს. საოჯახო საქმიანობა ყოველდღიურ ჩვევად ექცევა და აღარ ახსოვს, ოდესღაც გაცილებით მნიშვნელოვან საქმეებსაც მშვენივრად რომ ართმევდა თავს. მუდმივად ენატრება ქმარი, დიდხანს განიცდის ოჯახურ კონფლიქტებს. ფინანსურად მთლიანად ქმარზეა დამოკიდებული. საყოფაცხოვრებო ტრავმატიზმის ალბათობა იმდენად დიდია, რომ პროფესიასთან დაკავშირებული რისკის მიხედვით დიასახლისები მეხანძრეებისა და პოლიციელების გვერდით აღმოჩნდნენ, ამიტომ გვსურს, რამდენიმე საგულისხმო რჩევა მივცეთ:

"ცხოვრებაში მთავარი საქმე ცხოვრებაა" - დაიმახსოვრეთ ეს და ამით იხელმძღვანელეთ. ოჯახის მოვლა საჭიროა, მაგრამ მიმოიხედეთ - რამდენი საინტერესო რამ ხდება ირგვლივ. იდეალური გამოსავალია, იმ საქმეს მოჰკიდოთ ხელი, რომლითაც ოდესღაც იყავით გატაცებული. დაუთმეთ მას ცოტაოდენი დრო, რა იცით, იქნებ ეს გატაცება პროფესიადაც კი გექცეთ და სიამოვნებასთან ერთად, ფინანსური დამოუკიდებლობაც მოგიტანოთ.

ოჯახის წევრებზე ფიქრისას თავი არ დაივიწყოთ - ხშირად დიასახლისი საკუთარ მეს კარგავს და დროთა განმავლობაში ოჯახური ინტერიერის განუყოფელ ნაწილად იქცევა, სტრუქტურად, რომლის ერთადერთი ფუნქცია ოჯახის წევრთა ინტერესების გათვალისწინება, მათი მოვლა-პატრონობაა.

ყოველდღე გამოძებნეთ დრო თავის მოსავლელად, სიამოვნების მომგვრელი საქმეების საკეთებლად. დაე, ოჯახის წევრები მიხვდნენ, რომ დედასა და ცოლსაც აქვს ინტერესები, მისწრაფებანი, რომ არ შეიძლება მისი შეწუხება მაშინ, როდესაც პირადი საქმით არის დაკავებული.

დაყავი და იბატონე - გონიერი ქალი ყოველთვის გამოძებნის საქმეს, რომელიც ძვირფასი მეუღლისა და შვილების საკეთებელია, თავად კი მხოლოდ მეთვალყურის როლს შეასრულებს. სათანადო თხოვნით, გვერწმუნეთ, შვილებიც და ქმარიც დიდი სიამოვნებით გააკეთებენ მათდამი მინდობილ საშინაო საქმეებს. თქვენ კი ამ დროს დაისვენეთ და დატკბით საკუთარი ძალაუფლებით.

კვლავ ლამაზი და მიმზიდველი ვარ - დააკვირდით, რით დაბრძანდებით სახლში: ძველი ხალათით ან სვიტერით, რომლის გადაგდებაც დაგენანათ, რადგან შინ მისი ჩაცმა შეიძლება. ოჯახის წევრები თანდათან ეჩვევიან ძველმანებში გამოწყობილ დედასა და ცოლს, მეუღლეს თვალი გაცილებით მოვლილი ქალისკენ გაურბის... ნებისმიერი დიასახლისი, უპირველეს ყოვლისა, ქალია და მისგან გახამებულ პერანგებსა და გატკიცინებულ შარვლებთან ერთად ამასაც ითხოვენ.

ვინ ხართ?

დაფიქრებულხართ ოდესმე, ვინ ხართ, ნამდვილი ქალი თუ ჭეშმარიტად ნამდვილი ქალი? რა განსხვავებაა მათ შორის?

• ნამდვილ ქალზე ნებისმიერი ტანსაცმელი თვალისმომჭრელად გამოიყურება, ჭეშმარიტად ნამდვილი ქალი კი ამ სამოსშია თვალისმომჭრელი.
• ნამდვილი ქალი ჭკვიანია და ცდილობს დამალოს ეს. ჭეშმარიტად ნამდვილი ქალი კი ჭკვიანია და არც ამის გამხელას ერიდება.
• ნამდვილი ქალი, თუკი დიეტას იცავს, სტუმრად დესერტზე უარს იტყვის, ჭეშმარიტად ნამდვილი ქალი კი ამჯობინებს მიირთვას დესერტი და შემდეგ მთელი კვირა იშიმშილოს, ვიდრე აღიაროს, რომ დიეტაზეა.
• ნამდვილი ქალი აუცილებლად დააფასებს მამაკაცთა სასიამოვნო კომპანიას, ჭეშმარიტად ნამდვილი კი შეეცდება, მამაკაცთა სასიამოვნო საზოგადოებამ დააფასოს იგი.
• ნამდვილი ქალი მშვიდად დაელოდება თაყვანისმცემლის ზარს, ჭეშმარიტად ნამდვილი კი თაყვანისმცემელს აიძულებს, მისი ზარის მოლოდინში იყოს.
• ნამდვილ ქალს შეუძლია, დაამარცხოს მოწინააღმდეგე ქალები, ჭეშმარიტად ნამდვილს კი მეტოქეები არ ჰყავს.
• ნამდვილი ქალი არასოდეს გაამხელს, რომ საზოგადოებაში მოწყენილია, ჭეშმარიტად ნამდვილი კი კომპანიაში არასოდეს მოიწყენს - მოწყენამდე ერთი წუთით ადრე მიატოვებს იქაურობას.
• ნამდვილი ქალი მეუღლისთვის საჩუქარია, ჭეშმარიტად ნამდვილი კი მეუღლეს თავისთვის ირჩევს საჩუქრად.
• ნამდვილი ქალი, თუკი ქმარი ეჭვიანობის საბაბს აძლევს, მალულად ეჭვიანობს, ჭეშმარიტად ნამდვილი კი მაშინვე ივიწყებს ქმარს.

როგორ გავხდეთ ჭეშმარიტად ნამდვილი ქალი?

საამისოდ მოდური ჟურნალები არ გამოგადგებათ, რადგან: ნამდვილი ქალი ყურს უგდებს მოდური ჟურნალების რჩევებს, ჭეშმარიტად ნამდვილი ქალისთვის კი მოდა არ არსებობს.