10 არგუმენტი ცხოვრების ჯანსაღი წესის სასარგებლოდ
27.02.2011
ახალი წელი დაიწყო და მინდა, ყველაფერი ცუდი გასულ წელს გავატანო. მინდა, ცხოვრების ჯანსაღ წესს მივდიო, იქნებ გამომივიდეს. 36 წლის ვარ. რას მირჩევთ?
გადაწყვეტილება, რომ ცხოვრების ჯანსაღ წესს მისდიოთ - უკვე მნიშვნელოვანი ნაბიჯია, მით უმეტეს, თქვენს ასაკში ქალმა განსაკუთრებული ყურადღება უნდა მიაქციოს საკუთარ თავს, ჯანმრთელობას, წონას. ამ პერიოდში ყურადღებას მოითხოვს ჰორმონული სისტემა, კანი, საყრდენ-მამოძრავებელი სისტემა, დარეგულირდეს ნივთიერებათა ცვლა და ა.შ.
აი, არგუმენტები, რომლებიც ამ გადაწყვეტილების სასარგებლოდ მეტყველებს.
- ადრეულ სტადიებში ყველაზე მძიმე დაავადებებიც კი იკურნება. არსებობს ასაკობრივი საზღვრები, რომელთა შემდეგაც მაღალია განსაზღვრულ სნეულებათა განვითარების რისკი. მაგალითად, ქალებმა 35 წლის შემდეგ განსაკუთრებული ყურადღება უნდა მიაქციონ მკერდს და წელიწადში ორჯერ გაიარონ კონსულტაცია მამოლოგთან.
- როცა რამე გტკივათ, არც საყვარელი ადამიანის ზარი გახარებთ, მეგობართან შეხვედრაც მძიმე ტვირთად გეჩვენებათ, სამსახურში კი კოლეგების თითოეულ სიტყვას ისე აღიქვამთ, როგორც ჩაქუჩის დარტყმას. დადასტურებულია: მხოლოდ ფიზიკური კომფორტის მდგომარეობაში შეუძლია ადამიანს, მიიღოს ნამდვილი სიამოვნება ცხოვრებისგან.
- იმისთვის, რომ ჯანმრთელი ბავშვი გააჩინოთ, აუცილებელია, გაუფრთხილდეთ საკუთარ თავს: არასოდეს დაჯდეთ ცივ ზედაპირზე, არ მოსწიოთ, ნუ მიეძალებით ალკოჰოლს. ძალიან მნიშვნელოვანია ფსიქოლოგიური ჯანმრთელობაც. ძლიერი ნერვები ბავშვების აღზრდისას აუცილებელია.
- თუ გსურთ, მშობლიურ სახლში მუდამ სიმშვიდე და სიხარული იყოს, მშობლები კარგად და უშფოთველად გრძნობდნენ თავს - უწინარეს ყოვლისა, თქვენ უნდა იყოთ კარგად. აბა, წარმოიდგინეთ, როგორ განიცდიან, როცა თქვენ ავადმყოფობთ!
- საიდან გირჩევნიათ უყუროთ სამყაროს პენსიაზე გასვლის შემდეგ: სამზარეულოს ფანჯრიდან თუ თვითმფრინავის ილუმინატორიდან? სიბერეში ცხოვრების აქტიურ წესს მხოლოდ ის შეინარჩუნებს, ვინც ახალგაზრდობიდანვე ზრუნავს საკუთარ თავზე.
- ჯანმრთელობა დღეს მოდური, პრეზენტაბელური და რესპექტაბელურია. ტყუილად როდი მალავენ პრეზიდენტები თავიანთ ავადმყოფობას! როცა კარგ ფორმაში ხარ, ყველაფერი გამოგდის!
- ფრანგი ქალები დარწმუნებულნი არიან: სუფთა და ჯანმრთელი თმა - უკვე მშვენიერი ვარცხნილობაა, ჯანმრთელ კანს არ სჭირდება კოსმეტიკის სქელი ფენა, ხოლო მოხდენილ ტანს - ბანდაჟი და კორსეტი. თუ ჯანმრთელი ხარ - ეს იმას ნიშნავს, რომ ლამაზი ხარ!
- წინათ გოგონები და ყმაწვილები ერთმანეთს თეატრებში, მუზეუმებსა და ბიბლიოთეკებში ეცნობოდნენ. ახლა ეს სპორტკლუბებში ხდება, რადგან მამაკაცის გულს ვერ მოიგებ, თუ სპორტს არ მისდევ და სპორტდაბაზებს არ სწყალობ!
- გახსოვთ დარვინის თეორია ბუნებრივი გადარჩევის შესახებ? მის სასარგებლოდ მეტყველ ფაქტებს ჩვენ ყოველდღიურად ვაწყდებით. იმისათვის, რომ მუდამ მწყობრში ვიყოთ, უნდა ვიყოთ ჯანმრთელნი!
- რა საწყენია, როცა სიცხიანი, მწოლიარე ვხვდებით ახალ წელს! საერთოდ, ავადმყოფობა ხშირდ გვატყდება თავს უდროო დროს. იყავით ჯანმრთელი, რათა არ გამოტოვოთ ცხოვრების საუკეთესო მომენტები. აუცილებლად მოიშუშეთ ძველი ჭრილობები - და წინ, სასიხარულო მოვლენების შესახვედრად!
