როგორ მოვუაროთ თმას ორსულობის დროს
ორსულობის დროს ქალის ორგანიზმში მიმდინარეობს გლობალური ჰორმონული გარდაქმნები, რომლის წყალობითაც, კერძოდ, ესტროგენების დიდი რაოდენობით გამოყოფის გამო, თმა უფრო ხშირდება და შესაძლებელია უკეთესად და სწრაფადაც იზრდებოდეს. ბევრი აღნიშნავს, რომ თმა იძენს ბრწყინვალებას და ლამაზ, ხავერდის მსგავს შეფერილობას. ორგანიზმში ჰორმონული ცვლილებები მოქმედებს თმის ზრდისა და ცვენის ტემპზე, ამიტომ თუ ჩვეულებრივად დღეში 50-დან 80 თმის ღერი ცვივა, ორსულობისას ეს დანაკარგი რამდენჯერმე მცირდება (ორსულობის შემდეგ ეს რაოდენობა საწყის ნიშნულს დაუბრუნდება). თუმცა ეს ყველა ორსულის შემთხვევაში არ აღინიშნება. ზოგჯერ სიტუაცია სრულიად საპირისპიროდაც შეიძლება გამოვლინდეს.
ორსულობა და თმის შეღებვა
ხშირად ორსულობის დროს სპეციალისტები თმის შეღებვას არ გვირჩევენ იმ მოტივით, რომ შეღებვისათვის გამოყენებული ქიმიური ხსნარები თავის თმიან ნაწილზე მოხვედრისას შეიძლება მოხვდეს კანქვეშა სისხლძარღვოვან ქსელში და შემდეგ ნაყოფშიც. თუმცა ძალიან ბევრი ქალი მთელ მსოფლიოში ორსულობისას თმას იღებავს და აჩენს ჯანმრთელ ბავშვს.
ქიმიური ნივთიერებების ნაყოფში მოხვედრის ფაქტი ჰიპოთეზაა. ექიმების მეცნიერული მიდგომა, რომლებიც არ ურჩევენ თმის შეღებვას ორსულობის დროს, ის არის, რომ ორსული გაფრთხილებული იყოს შესაძლო რისკის შესახებ. ზოგიერთი ექიმი ამტკიცებს, რომ მნიშვნელოვანია, თმა არ შევიღებოთ ორსულობის პირველ ტრიმესტრში, როდესაც მიმდინარეობს ნაყოფის ორგანოებისა და ქსოვილების ინტენსიური განვითარება.
რა სიფთხილე უნდა გამოვიჩინოთ შეღებვისას
ზოგჯერ ორსულობისას შეღებვა არ არის დასაშვები. ყველაფერი დამოკიდებულია ორსულის მდგომარეობასა და ორსულობის მიმდინარეობაზე. თუ ქალს აღენიშნება აქტიური ტოქსიკოზი და ქიმიური სუნები მისთვის აუტანელია, შეღებვისაგან თავი უნდა შევიკაოთ.
საღებავის სუნზე გამოხატული რეაქციის არარსებობისას თმის შეღებვა მაინც კარგად განიავებულ ოთახში უნდა მოხდეს.
ორგანიზმში ჰორმონული ძვრების გამო გარკვეული ცვლილებები აღინიშნება თმის სტრუქტურაში და შეღებვის შედეგი შეიძლება გაუთვალისწინებელი აღმოჩნდეს. ეს შეიძლება იმ შემთხვევაშიც კი მოხდეს, როდესაც ჩვეულ საღებავს ვიყენებთ. ეს ძირითადად ხდება თმის მუქი ტონით შეღებვისას.
თმის გაღიავებისას, მნიშვნელოვანია, დიდხანს არ გავიჩეროთ თავზე საღებავი, რადგანაც ამან შეიძლება წნევის მატება გამოიწვიოს.
თუ მაინც გეშინიათ ორსულობის დროს თმის შეღებვის, შეგიძლიათ გამოიყენოთ ბუნებრივი საღებავები.
თმის დასაბანად მხოლოდ ხარისხიანი შამპუნები უნდა იხმაროთ, თმის მოსავლელად კი მხოლოდ ბუნებრივი და ნატურალური კომპონენტებისგან შემდგარი საშუალებები.
ორსულობის დროს ქერტლის საწინააღმდეგო საშუალებების გამოყენებას ექიმები რეკომენდაციას არ უწევენ. თუმცა ქერტლის საწინააღმდეგო საშუალებებში შემავალ ქიმიურ ნაერთებსა და ნაყოფზე უარყოფით ზემოქმედებას შორის კავშირი არ აღმოჩენილა.
ქერტლის საწინააღმდეგო საშუალებები იყოფა – კოსმეტიკურად და სამკურნალოდ. თუ პირველი უბრალოდ ნიღბავს პრობლემას, ამცირებს კანის ზედმეტ აქერცვლას თავზე, მეორე – პრობლემის გადაჭრისა და კანის გამოჯანმრთელების გზაა, ანუ შემადგენლობით უფრო ძლიერმოქმედია.
ორსულობა და ქიმიური დახვევა
ორსულობის დროს შეიძლება ქიმიური დახვევაც, მაგრამ ხშირად თმა ჩვეულ ფორმას არ იღებს და დახვევაც არ გამოდის. ეს უკავშირდება თმის მდგომარეობის ცვლილებას ორსულობის დროს. თმა უფრო ძლიერი ხდება და ნაკლებად რეაგირებს გარეგან დამაზიანებელ ფაქტორებზე. ჰორმონების ზემოქმედებით თმა ხშირად მოულოდნელად რეაგირებს ქიმიურ დახვევაზე.
აფრიკული ნაწნავები და თმის დაგრძელება ორსულობის დროს
ორსულობის დროს ორივეს გაკეთება შესაძლებელია.
ძალიან სასარგებლოა თავის თმიანი ნაწილის მასაჟი. მასაჟი უნდა მოხდეს თმის დახრისა და ცხიმოვანი ჯირკვლების გამომყოფი სადინარების მიმართულებით. ეს გააუმჯობესებს კანის ცხიმის გამოდენას და თმის მთელ სიგრძეზე მის განაწილებას.
მასაჟი უნდა დაიწყოს თავის გვერდითი მხრიდან და დამთავრდეს თხემით, 15 წუთის განმავლობაში. მასაჟი სასიამოვნო უნდა იყოს და არავითარ შემთხვევაში – მტკივნეული. მასაჟის ჩატარება შესაძლებელია სამასაჟე სავარცხელ-ჯაგრისითაც.
ორსულობის დროს განსაკუთრებით სათუთად უნდა მოვეპყროთ თმას. ამიტომ ლითონის სავარცხლები შეცვალეთ ხის ან ნატურალური ჯაგრულებიანი სავარცხლებით.
კანისა და თმის მოვლის საშუალებების შერჩევისას ყურადღება მიაქციეთ გამწვავებულ რეაქციებს სუნებზე, ასევე გაითვალისწინეთ სპეციალისტისა და ექიმის რეკომენდაციები.
ყურადღებით გაეცანით თქვენ მიერ შერჩეული თითოეული საშუალების შემადგენლობას.