ცხოვრების ჯანსაღი და აქტიური წესი
მოძრაობის წყალობით გარეგნობა იხვეწება, სხეული უფრო ეფექტური, დინამიკური და ენერგიით აღსავსე ხდება. მოძრაობა მოქმედებს გულ-სისხლძარღვთა სისტემაზე. რამდენიმეკვირიანი ვარჯიშის შემდეგ ადამიანი გაცილებით ძლიერი ხდება. უმჯობესდება გულის ვასკულიზაცია, რაც გულის შეტევის რისკს ამცირებს, რეგულარული ვარჯიში მოქმედებს სისხლში ქოლესტერინის დონეზე, რაც ასევე ამცირებს გულის დაავადებების განვითარების რისკს.
ყოველდღიური ვარჯიში მოქმედებს კუნთებსა და ჩონჩხზეც. იზრდება კუნთური ძალა, რაც ტანდეგობის დეფექტების განვითარებას ეწინააღმდეგება. ვარჯიში მნიშვნელოვანია ოსტეოპოროზის პროფილქტიკისთვისაც, რადგანაც მოძრაობის წყალობით ძვლები უფრო მკვრივდება.
რეგულარული ვარჯიში ზრდის ფილტვების მოცულობას და აძლიერებს სასუნთქ კუნთებს. ვარჯიში ცუდი ემოციებისა და დაძაბულობის იდეალური წამალია.
ყოველდღიური ვარჯიშისას ვეჩვევით რეგულარობას. ჩვენ არა მარტო კუნთებს ვავარჯიშებთ, არამედ ნებისყოფასაც.
სიარული
ჯანმრთელობის გასაუმჯობესებელი შესანიშნავი, ყველასათვის ხელმისაწვდომი, მარტივი, უფასო, საინტერესო და რაც მთავარია, სასარგებლო საშუალებაა სიარული.
გულის სიჯანსაღისთვის
ფეხით სიარულისას უმჯობესდება სისხლის მიმოქცევა. მოძრაობისას გულის შეკუმშვების გახშირება აქვეითებს წნევას და ავარჯიშებს გულს. კვლევების მონაცემებით, ადამიანებს, რომლებიც ყოველდღიურად 30 წუთის განმავლობაში სეირნობენ, ინსულტის რისკი უმცირდებათ 20%-ით, ხოლო სწრაფი სიარულისას – 40%-ით.
ძლიერი ძვლებისა და ჯანსაღი სახსრებისთვის
სიარული ამცირებს და აჩერებს კიდეც ძვლის მასის დაკარგვას ოსტეოპოროზის დროს. კვლევებით დადასტურებულია, რომ პოსტმენოპაუზის პერიოდში ყოველდღიური 30-წუთიანი სეირნობა ბარძაყის ყელის მოტეხილობის რისკს 40%-ით ამცირებს.
სიარულისას სახსრები მუდმივად მოძრაობს, უმჯობესდება მათი სისხლით მომარაგება, რაც განსაკუთრებით სასარგებლოა საყრდენ-მამოძრავებელი აპარატის დაავადების მქონე ადამიანებისთვის.
სიცოცხლის გახანგრძლივებისთვის
კვლევები აჩვენებს, რომ 50-60 წლის ასაკის ადამიანებს შორის, რომლებიც რეგულარულად ვარჯიშობენ, შემდგომი რვა წლის განმავლობაში სიკვდილის რისკი 35%-ით დაბალია.
კარგი განწყობისთვის
სეირნობისას განწყობა უმჯობესდება. სიარული ხელს უწყობს ენდორფინების – „სიხარულის ჰორმონების“ – გამომუშავებას, რომელთაც ასევე აქვთ ტკივილგამაყუჩებელი ეფექტი.
კარგი აღნაგობისთვის
სიარულისას აქტიურდება ფეხის, მუცლისა და ხელის კუნთებიც კი, თუ გამოვიყენებთ ჯოხებს. სწრაფი, 30-წუთიანი სიარულისას შეიძლება 200 კილოკალორიის დახარჯვა, რაც სასარგებლოა წონის კონტროლისა და სიმსუქნის პროფილაქტიკისათვის.
მშვიდი ძილისთვის
50-75 წლის ასაკში ადამიანები, რომლებიც ყოველ დილას, სულ მცირე, 1 საათი სეირნობენ, თავს აღწევენ უძილობას.
კარგი მეხსიერებისთვის
კვლევამ აჩვენა, რომ ასაკთან დაკავშირებული მეხსიერების გაუარესება იმათ შორის უფრო ნაკლები იყო, ვინც ბევრს დადიოდა ფეხით.
10 000 ნაბიჯი დღეში
სინამდვილეში, კილომეტრებისა და ნაბიჯების რაოდენობის უნივერსალური ნორმა არ არსებობს. რამდენიც გვსიამოვნებს, იმდენი უნდა ვიაროთ. თითოეულ ადამიანს თავისი ნორმა აქვს.
სიარული თუ სირბილი
სიარული უფრო უსაფრთხოა. სიარულსა და სირბილს შორის ძირითადი განსხვავება ისაა, რომ სიარულისას ერთი ფეხი ყოველთვის მიწაზეა. სირბილის დროს ადამიანი რამდენიმე წამით სწყდება მიწას და ჰაერშია. ამის შემდეგ ეშვება მიწაზე. მიწაზე ყოველი დაშვებისას მორბენალი სხეულს წონაზე 3-ჯერ მეტ დატვირთვას ანიჭებს. სიარულისას ტრავმის რისკი ნაკლებია, ვიდრე სირბილისას.
ცურვა
ცურვის დროს ნივთიერებათა ცვლა 50-75%-ით ჩქარდება. ეს სპორტის ყველაზე ეფექტური სახეა ჯანმრთელობის, განწყობის გასაუმჯობესებლად და გასახდომად.
ცურვისას ადამიანი ავარჯიშებს სასუნთქ, ნერვულ, გულ-სისხძარღვთა, კუნთოვან სისტემას, იხსნება სტრესი და ემოციური დატვირთვა.
ცურვისას მუშაობს კუნთების თითქმის ყველა ჯგუფი. ბრასით ცურვისას ვარჯიშდება ბარძაყის, თეძოს, წვივის კუნთები. კროლის სტილით ცურვისას დატვირთვა თანაბრად ნაწილდება.
ცურვისას ვითარდება გულმკერდი, ფილტვები, კუნთები იჭიმება, სხეული ხდება ელასტიკური და მოქნილი, ძლიერდება სახსრები, ხერხემალი. ცურვა სკოლიოზის, კოქსართროზისა და საყრდენ-მამოძრავებელი აპარატის დაავადებების პროფილაქტიკის საუკეთესო საშუალებაა. წყალში კუნთები დუნდება და ძლიერდება. ფორმირდება საიმედო კორსეტი, რომელიც მალებს შეცილების და სახსრებს მორყევის საშუალებას არ აძლევს.
ვითარდება კოორდინაცია
უმჯობესდება ფსიქოლოგიური მდგომარეობა. წყალი ტაქტილურად ზემოქმედებს სხეულზე, ამშვიდებს მას და ეს სიგნალები გადაეცემა ტვინს.
აქტიურდება კუნთების, სახსრების აღდგენა, რაც განსაკუთრებით მნიშვნელოვანია ტრავმის შემდგომი რეაბილიტაციისათვის.
ცურვისას იწვება დიდი რაოდენობით კალორია.
როდისაა ცურვა უკუნაჩვენები:
- ინფექციური დაავადებები;
- ქრონიკული დაავადებების გამწვავება;
- კანის საფარველის მთლიანობის დარღვევა;
- სხეულის მომატებული ტემპერატურა;
- ზედმეტად გადაღლა;
- ტუბერკულოზი.
სად სჯობს ვარჯიში?
სადაც მოგვესურვება, იქ შეიძლება ვივარჯიშოთ. სპორტულ დარბაზში, სახლში, ქუჩაში, ვირბინოთ, ვისეირნოთ ველოსიპედით. ვარჯიში უნდა იყოს სასურველი და არა იძულებითი.
სპორტულ დარბაზში ვარჯიში შესაძლებელია პირადი მწვრთნელის ხელმძღვანელობით, რომელიც შეგვირჩევს ასაკისა და სხვა პარამეტრების გათვალისწინებით შესაბამისი ვარჯიშის სისტემას.
მთავარია სისტემატური ვარჯიში, სადაც არ უნდა იყოს, რადგანაც ეს დადებითად მოქმედებს ჩვენი ორგანიზმის ფუნქციონირებაზე, აჯანსაღებს სხეულსა და განწყობას.