თინათინ ქორიძე

ძილი დამოკიდებულია შემდეგ ფაქტორებზე: ენერგეტიკულ დანახარჯზე. რაც უფრო მეტად დაიღლება ბავშვი, მით უფრო მეტად ეძინება; წინა ძილის ხანგრძლივობასა და სიღრმეზე; ძილის წინ მიღებულ საკვებზე - კარგად დანაყრებულს ტკბილად გეძინება.

ძილს ხელს უშლის:

• ტკივილი;
• ტემპერატურის მომატება;
• ხველა;
• გულისრევა;
• საძინებელი ოთახის ჰაერი.

შებრუნებული რეჟიმი დაავადებაა, მაგრამ არა ფიზიკური, არამედ სოციალური. ვითარებას ერთი რამ ართულებს: ექიმებს მისი საწინააღმდეგო წამალი არ გააჩნიათ. დამამშვიდებელი საშუალებები, ნაყენები, ბალახეულის ჩაი რეალურად საქმეს ვერ შველის. სიტუაციაში თქვენ თვითონ უნდა გაერკვეთ და გამოსავალი სხვების დაუხმარებლად იპოვოთ.

გააანალიზეთ მიზეზები, რომლებიც ხელს უშლის ბავშვს დაძინებაში. თუ ეს ჯანმრთელობის მდგომარეობის ცვლილებასთან არის დაკავშირებული, მიმართეთ პედიატრს. ის გირჩევთ, როგორ მოიქცეთ დღის განმავლობაში, რომ ღამით ბავშვი უსიამოვნო შეგრძნებებმა არ შეაწუხოს.

დაიმახსოვრეთ: ღამის ძილის დარღვევის ყველაზე ხშირი მიზეზია საწოლი ოთახის გამომშრალი და თბილი ჰაერი.

• ეცადეთ, პატარას დღის განმავლობაში ძილი ოდნავ დააკლდეს. წლამდე ბავშვმა დილის 6-დან ღამის 22 საათამდე 2-4-ჯერ უნდა იძინოს, თქვენ კი გირჩევთ, ერთი ძილი გამოტოვოთ, ოღონდ არა წინას გახანგრძლივების ხარჯზე. მაგალითად, თუ ბავშვს სძინავს დღეში სამჯერ 2-2 საათის განმავლობაში, უნდა დააძინოთ ორჯერ, მაგრამ არა 3 საათს. თუ ძილი მოერია, ეცადეთ, აქტიურად გაართოთ. მაქსიმალურად გაუხანგრძლივეთ დრო მომდევნო დაძინებამდე და გააღვიძეთ 2 საათის შემდეგ.
• დღის განმავლობაში რაც შეიძლება მეტი ენერგია დაახარჯვინეთ - ასეირნეთ, ათამაშეთ, ავარჯიშეთ. არ დაივიწყოთ ისიც, რომ ბავშვი დიდ ენერგიას ხარჯავს სხეულის ტემპერატურის შესანარჩუნებლად, ამიტომ ეცადეთ, მეტისმეტად თბილად არ ჩააცვათ. ნურც ოთახს გაათბობთ მეტისმეტად. სეირნობისას ისე გამოაწყვეთ, ხელ-ფეხი და თავი იოლად ამოძრაოს.
• საწოლი ოთახი წინასწარ მოამზადეთ - გაანიავეთ, დაალაგეთ სველი წესით. ძილისთვის იდეალურია 18-20 გრადუსი ტემპერატურა და 60-70% სინოტივე.
• მოაწესრიგეთ კვების რეჟიმი. ეცადეთ, ბავშვს აჭამოთ 23-დან 24 საათამდე. თუ დამატებით საკვებს აძლევთ, კარგი იქნება, ბოლო ულუფა უფრო ნოყიერი იყოს (მაგალითად, ბურღულის რძიანი ფაფა), ხოლო თუ ბუნებრივ კვებაზე ან ხელოვნურ ნარევებზეა, ეცადეთ, ბოლოს წინა ულუფა 18-20 გრამით ნაკლები იყოს, რათა ბოლო უფრო მადიანად მიირთვას.
• კარგი იქნება, თუ ძილის წინ დიდ აბაზანაში აბანავებთ. სასურველია, წყალი ჩვეულებრივზე 1-2 გრადუსით გრილი იყოს. გაუკეთეთ წყალში მასაჟი, ავარჯიშეთ - ეს საუკეთესო საშუალებაა ენერგიის დასახარჯავად. გარდა ამისა, მადაც მოემატება და ძილის წინ მშობლებთან ურთიერთობითაც ისიამოვნებს.

შებრუნებული რეჟიმის დაავადების მკურნალობის მთელი სირთულე თვით ოჯახია - დედისა თუ ბებიების დამოკიდებულება პატარა ანგელოზის მიმართ უნდა შეიცვალოს: როგორ შეიძლება, ბავშვი გიყვარდეს და სანახევროდ მშიერი დატოვო, არ დააძინო, დროზე ადრე გააღვიძო... ისინი მზად არიან, წლობით არ მოხუჭონ თვალი და უსასრულოდ გაიხანგრძლივონ პრობლემა, რომელიც 2-3 დღეში შეიძლება მოგვარდეს.