რომელი საათია?
საათის ცნობის შესასწავლად დიდი კედლის საათიც შეიძლება ვიყიდოთ, მაგრამ ბავშვისთვის პროცესი გაცილებით საინტერესო და სახალისო იქნება, თუ მუყაოსგან ერთად გააკეთებთ სათამაშო საათს. ბავშვმა საათის ცნობა რომ ისწავლოს, კარგად უნდა იცოდეს ციფრები, შეეძლოს მათში ორიენტირება. დრო აბსტრაქტულ ცნებად რომ არ დარჩეს, დაუკავშირეთ იგი დღის რეჟიმს, მიუთითეთ პატარას, როდის დგება, ჭამს, თამაშობს, სეირნობს და იძინებს. ნუ გამოიყენებთ ამ პროცესში რთულ ტერმინებს, ეცადეთ, მხოლოდ ბავშვისთვის გასაგები სიტყვებით ისაუბროთ. იმისთვის, რომ ბავშვმა დროში ორიენტირება და კითხვებზე პასუხის გაცემა შეძლოს, მან უნდა იცოდეს, რა არის აწმყო, წარსული და მომავალი, თუმცა ეს ინფორმაციაც საინტერესო და სახალისო ფორმით უნდა მიიღოს. ბავშვს უნდა ავუხსნათ, რას გვიჩვენებს პატარა ისარი, ავუხსნათ, რომ ერთ საათში სამოცი წუთია, რატომ მოძრაობს უფრო ჩქარა წუთების ისარი და რატომ გარბიან წამები. თუმცა უკანასკნელი ინფორმაცია ბავშვს მხოლოდ მას შემდეგ უნდა მივაწოდოთ, რაც სხვა დანარჩენს გააცნობიერებს. სათამაშო საათზე ბავშვს უნდა ვუჩვენოთ, როგორ გადის დრო, უნდა ვთხოვოთ, დაასახელოს ციფრი, რომელზეც ისარი დგას. არავითარ შემთხვევაში არ უნდა ავჩქარდეთ, რათა პატარა არ დავაფრთხოთ ან არ შევაშინოთ; უნდა მივცეთ ბავშვს ფიქრის საშუალება, დროდადრო დავეხმაროთ, საბოლოოდ კი აუცილებლად შევაქოთ. არავითარ შემთხვევაში არ უნდა გადავაქციოთ ეს ყველაფერი რთულ საგანმანათლებლო პროცესად. ბავშვისთვის საათი სათამაშოდ უნდა დარჩეს, რადგან თამაშის ფორმით მიწოდებული ინფორმაცია უფრო ადვილად აღსაქმელი და დასამახსოვრებელია.