ჩემი მშვენიერი ლედი
დღეს ქალები საფუძვლიან განათლებას იღებენ და არათუ მამაკაცებივით მუშაობენ, არამედ ზოგჯერ მათზე წარმატებულ კარიერასაც კი იკეთებენ. მიუხედავად ამისა, ჩვენ უწინდებურად ვცდილობთ, ჩავახშოთ ჩვენი გოგონების ცნობისმოყვარეობა და სამყაროს შეცნობის წყურვილი. "იტკენ!", "დაისვრები!", "ასე თამაში გოგოს არ შეეფერება!" - გავიძახით და ყველაფერს ვაკეთებთ, რომ გოგონა უსუსურ არსებად აღვზარდოთ. მას არ ვასწავლით თავის დაცვას კონკურენტულ გარემოში, რაც ბავშვობაში ქვიშის მოედნით თუ ეზოთი შემოიფარგლება. რა თქმა უნდა, ეს არ არის მოწოდება, გოგონებს (ან ბიჭებს!) ქცევის ნორმების დარღვევის უფლება მივცეთ. უბრალოდ, თამაშის დროს ქალ-ვაჟისთვის განსხვავებული აკრძალვები არ უნდა შემოვიღოთ. ყოველთვის, როცა კი თქვენს პატარა ქალბატონს შენიშვნას მისცემთ, დაფიქრდით, გაქვთ თუ არა საამისო საფუძველი. ყურადღება უნდა მივაქციოთ გოგონას ჩაცმულობასაც. ეზოში სათამაშოდ თუ მიგყავთ, ჯობს, ისეთი ტანსაცმელი ეცვას, რომლის გაჭუჭყიანებისაც არ გეშინიათ. პატარა ქალბატონი უნდა დარბოდეს, სასრიალოზე ძვრებოდეს და სრიალებდეს, ხის ტოტებს აგროვებდეს და ქვიშის "ნამცხვრებს" "აცხობდეს". ოღონდ შინ დაბრუნებისას ბავშვმა ტანსაცმელი უმალვე უნდა გამოიცვალოს. "ქალური" ჩაცმულობა დღესასწაულისთვის შემოინახეთ. ბავშვი, რომელიც საზეიმოდ არის გამოწკეპილი და ამის გამო ეზოში თამაშისა ეშინია, აღფრთოვანებას კი არა, თანაგრძნობას იწვევს.
მომავალი დიასახლისი
როგორც წესი, მცირე ასაკიდანვე ამჟღავნებს ინტერესს ოჯახური საქმიანობის მიმართ. ძალიან უყვარს დედასთან ერთად სამზარეულოში ფუსფუსი, ყვავილების მორწყვა, მტვრის გადაწმენდა... ძალიან მნიშვნელოვანია, რომ გოგონას პირველი მისწრაფებები კი არ ჩავახშოთ, არამედ, პირიქით, სტიმული მივცეთ და ბავშვს ნება დავრთოთ, აქტიური მონაწილეობა მიიღოს ოჯახურ საქმიანობაში. მერე რა, რომ პატარა დიასახლისს ჯერ არაფერი გამოსდის და დიდისთვის გაცილებით იოლი იქნება, თუ სამზარეულოში მარტო იფუსფუსებს - თუ შვილს დახმარების სურვილი აქვს, თავიდან ნუ მოიცილებთ, ნუ ეტყვით, შენი სათამაშოებით ითამაშეო. სპეციალისტები აღნიშნავენ, რომ თუ პატარა გოგონას მუდმივად ჩავუხშობთ დიასახლისობის სურვილს, შემდგომ დიდი ძალისხმევა დაგვჭირდება, რომ მას საკუთარი თავის მომსახურების სურვილი გავუღვივოთ. ამასთან ერთად ძალიან მნიშვნელოვანია, გოგონა ხედავდეს და გრძნობდეს, რომ ოჯახური საქმიანობა ქალების პრეროგატივა არ არის. კარგი იქნება, თუ გარკვეულ სამუშაოს მამა და ძმაც შეასრულებენ. სპეციალისტების რეკომენდაციების თანახმად, არც ის არის მიზანშეწონილი, გოგონას მომავლისთვის ძირითად საქმიანობად სამზარეულოში ფუსფუსი დავუსახოთ. ასე შესაძლოა მან მართლაც დაიჯეროს, რომ სწავლა ან პროფესიული წარმატება სულაც არ არის საჭირო. მართალია, გოგონა ბავშვობიდანვე უნდა იყოს საოჯახო საქმიანობის აქტიური მონაწილე, მაგრამ მისი მნიშვნელობის გადაჭარბებით შეფასებაც არ არის საჭირო.
თავისუფალი დრო
ვერ უარვყოფთ, რომ არსებობს ჩამოყალიბებული აზრი იმის თაობაზე, სად უნდა ვატაროთ გოგონა გაკვეთილების შემდეგ. ტრადიციულად, ითვლება, რომ ცეკვაზე, მუსიკაზე ან ტანვარჯიშზე. რა თქმა უნდა, ამაში არის რაციონალური მარცვალი - ცეკვა ავითარებს პლასტიკას, გრაციას, მოძრაობის კოორდინაციას... ცეკვა ესთეტიკურია, თანაც პატარა ქალბატონს ცეკვისას ლამაზი კოსტიუმები აცვია... თუმცა სპეციალისტები გვირჩევენ, "ქალური" გატაცებებით არ შემოვიფარგლოთ - გვახსოვდეს, რომ არანაკლებ მნიშვნელოვანია მომავალი დედის ინტელექტისა და აზროვნების ჰორიზონტის ჩამოყალიბება, მისი მრავალმხრივი განვითარება.
რა ვითამაშოთ?
გოგონების სათამაშოებს შორის, რასაკვირველია, თოჯინები ლიდერობენ. მათი დანიშნულება მრავალგვარია: როცა ჩვილი ბავშვის მსგავსი თოჯინათი თამაშობს, გოგონა დედის როლის რეპეტიციას გადის. ის თავის პატარას ეტლით ასეირნებს, აჭმევს, აცმევს, აბანავებს. ერთი სიტყვით, იმეორებს ყველაფერს, რაც თავად მას გადახდა ცოტა ხნის წინათ და ახლა, შესაძლოა, იმავე საქმიანობით დედაა დაკავებული, რადგან მეორე პატარა ჰყავს. ვერ უარვყოფთ, რომ თოჯინა გოგონასთვის ერთ-ერთი სოციალურად ყველაზე მნიშვნელოვანი სათამაშოა. მოგეხსენებათ, არსებობენ "მოზრდილი თოჯინებიც". მათი კლასიკური მაგალითია ბარბი. ასეთი თოჯინებიც აუცილებელია გოგონებისთვის, რადგანაც ხელს უწყობენ ქალურობის გაღვივებას და ბავშვებს "დიდობანას" თამაშის საშუალებას აძლევენ. თუ მოზრდილი თოჯინას გვერდით "მამაკაცი" თოჯინაც დგას, ბავშვს ეძლევა საშუალება, სახლობანა ითამაშოს. ხშირად ასეთ თამაშში გოგონებთან ერთად ბიჭებიც ერთვებიან და სიამოვნებით ახმოვანებენ მამაკაცს. მეორე ადგილი საყოფაცხოვრებო ტექნიკას უჭირავს. გოგონებს ხიბლავთ სათამაშოები, რომლებიც ასეთი ტექნიკის ასლია: ჭურჭელი, უთო, მტვერსასრუტი, სარეცხი მანქანა, ჩაიდანი, ბლენდერი - ერთი სიტყვით, ყველაფერი, რაც ოჯახში გაქვთ. ზოგიერთ პატარა ქალბატონს კი ხელსაქმესთან დაკავშირებული ნივთები - საკერავი მანქანა თუ საქსოვი ჩხირები იტაცებს. სპეციალისტებს მიაჩნიათ, რომ არ იქნება სწორი, ასეთი სათამაშოებით შემოვიფარგლოთ. დღესაც კი, მიუხედავად იმისა, რომ მრავალი ქალი თავად ზის საჭესთან, პატარა გოგონას, რომელიც სათამაშო მანქანას ითხოვს, ეუბნებიან, რომ ეს ბიჭების სათამაშოა. ალბათ არც ეს უარია სამართლიანი - თამაში ხომ მომავალი ცხოვრების მოდელია, ეს მოდელი კი რეალობას უნდა ასახავდეს.
გარდერობი
რა ჩავაცვათ პატარა ლედის, ტრადიციული ფუშფუშებიანი და ბაფთებიანი კაბები თუ თანამედროვე მოდური ტანსაცმელი? ამ შეკითხვაზე პასუხის გაცემა რთულია. როგორც ზრდასრულ ქალს ვერ მივაწვდით მზა რეცეპტს, ასევე ბავშვის შესახებაც შეუძლებელია მზა რეკომენდაციის გაცემა. ყველა ადამიანს, განურჩევლად ასაკისა, თავისი სტილი აქვს. თუ გრძნობთ, რომ ბავშვს ჯერ კიდევ არ აღელვებს საკუთარი ჩაცმულობა, შეგიძლიათ, ტანსაცმელი საკუთარი გემოვნებით შეურჩიოთ, იმ დროისთვის კი, როცა პატარა გოგონას ჩაცმულობის თაობაზე პირადი შეხედულება გაუჩნდება, აუცილებლად გაითვალისწინეთ მისი აზრი. მხედველობაში მიიღეთ ერთი გარემოებაც: ნებისმიერ შემთხვევაში უნდა იზრუნოთ იმისთვის, რომ ბავშვს გემოვნება ჩამოუყალიბდეს. ეს უნდა იყოს მთავარი პრინციპი მაშინაც, როცა თავად უპირატესობას პრაქტიკულ სპორტულ ან ნახევრად სპორტულ სტილს ანიჭებთ და შვილსაც ასე აცმევთ. განურჩევლად იმისა, სად ყიდულობთ ტანსაცმელს - ბაზრობაზე, მაღაზიაში თუ ფეშენებელურ სავაჭრო ცენტრში, განსაკუთრებული ყურადღება მიაქციეთ ტანსაცმლის ფერთა გამას. სამოსს უნდა ეხამებოდეს თმის აქსესუარებიც.
მთავარია, იყო ის, ვინც ხარ
თანამედროვე ქალები მკვეთრად განსხვავდებიან ერთმანეთისგან. მათ აქვთ განსხვავებული პროფესია, შეხედულება ცხოვრებაზე, ოჯახზე... ერთ-ერთი მწერლის სიტყვების თანახმად, განსხვავება სქესის შიგნით უფრო დიდია, ვიდრე სქესთა შორის. განსხვავებულია ბედნიერების გაგებაც. ამიტომ ბავშვის აღზრდისას, უწინარეს ყოვლისა, უნდა ვეცადოთ, ის კარგ ადამიანად და საინტერესო პროვნებად ჩამოყალიბდეს.
წარმატების 5 პირობა
ფსიქოლოგების აზრით, გოგონას შესაძლებლობების სრულფასოვან განვითარებას ხელს უწყობს:
* აღზრდის ისეთი სტილი, რომელიც მკაცრი სქესობრივი ჩარჩოებისგან თავისუფლებას გულისხმობს;
* საკუთარი თავის რწმენა და დამოუკიდებლობა;
* მშობლების (განსაკუთრებით მამის) ინტერესი და ყურადღება გოგონას წარმატებების მიმართ;
* გოგონას ნაცნობობა პროფესიულად რეალიზებულ, საინტერესო ქალებთან;
* სხვადასხვა სფეროში საკუთარი თავის რეალიზაციის შესაძლებლობა.