დასვენება პატარასთან ერთად
ეს ფაქტორები კარგია ორგანიზმის გასაკაჟებლად, იმუნიტეტის მოსაძლიერებლად, მადის მოსამატებლად. მაგრამ როგორ მოვემზადოთ მგზავრობისთვის, რომ პატარამ არ მოიწყინოს და არ გადაიღალოს, რა წავიღოთ თან? ამ და სხვა კითხვებზე პედიატრი ნინო მეზვრიშვილი გვიპასუხებს:
- ბავშვებისთვის, რომლებიც ხშირად ცივდებიან და საზოგადოდ, იმუნიტეტი აქვთ დაქვეითებული, საუკეთესოა მთის კლიმატური კურორტები. ზღვის დონიდან დაშორების მიხედვით განასხვავებენ მაღალ, საშუალო და დაბალ მთის კურორტებს. მაღალი მთის კურორტებზე ჰავა საუკეთესოა ორგანიზმის გასაკაჟებლად. ასეთია ბახმარო. იგი ზღვის ახლოს მდებარეობს, ამიტომ მისი ჰავა ზღვის კლიმატით არის შეზავებული.
ბახმარო ზაფხულის კურორტად ითვლება. მისი ჰავა კარგია ხანგრძლივი, მძიმე ავადმყოფობის შემდეგ, გამოჯანმრთელებისას. საშუალო მთის კურორტებია წაღვერი, ცემი, ბაკურიანი, მანგლისი, კოჯორი, აბასთუმანი, ტბა, ფასანაური. მათ გარს არტყია ტყის მასივები, რომლებიც ჰაერს ოზონით ამდიდრებს. ეს კურორტები საუკეთესოა ზამთარში არდადეგების გასატარებლად. დაბალი მთის კურორტები განსაკუთრებით კარგია მცირეწლოვანი ბავშვებისთვის. აქ ჰავა გარდამავალია ბარსა და მთას შორის, ორგანიზმზე ძლიერ ზემოქმედებას ახდენს და არც შეგუების, აკლიმატიზაციის პროცესია რთული, ამიტომ იქ თამამად შეგიძლიათ წლამდე ასაკის პატარების წაყვანა. ასეთია ბორჯომი, სურამი, ქვიშხეთი, ახალდაბა, საირმე.
- რას გვირჩევთ, როგორ შევაგუოთ პატარა ახალ, უცხო კლიმატურ გარემოს?
- ახალი გარემო პირობებთან შეგუების პროცესი თითქმის ყველა ბავშვისთვის ერთნაირია. ამას ჩვენ აკლიმატიზაციას ვუწოდებთ. ის სხვადასხვაგვარად ვლინდება, თუმცა ძირითადი ნიშნები ერთნაირია:
* სუბფებრილური სიცხე;
* ჭირვეულობა;
* მოუსვენრობა;
* უძილობა;
* უმადობა.
გირჩევთ, აკლიმატიზაციის გასაადვილებლად კურორტზე რაც შეიძლება მეტი ხანი დაყოთ, არანაკლებ 10-14 დღისა. ხშირად ბავშვი შეგუებას ვერ ასწრებს ახალ გარემოსთან, რომ უკვე გამომგზავრების დრო დგება, მისი პატარა ორგანიზმი კი დასვენების ნაცვლად სტრესს განიცდის. მშრალ, ცივ ჰაერს ბავშვი თანდათან უნდა შევაგუოთ. შინიდან გაიყვანეთ შუადღისას, 12-დან 15 საათამდე, თავდაპირველად - 30 წუთით, 3 დღის შემდეგ - უფრო მეტი ხნით, ერთი კვირის შემდეგ კი უკვე შეიძლება, სუფთა ჰაერზე, თოვლში, მთელი დღე გაატაროთ და მხოლოდ კვების დროს შეხვიდეთ სახლში. კიდევ ერთი: გაითვალისწინეთ ისიც, რომ მთის კურორტებზე მზე სახის კანს წვავს როგორც უშუალო ზემოქმედებით, ასევე თოვლიდან არეკლილი სხივებით.
- რა ჩავალაგოთ სამედიცინო ჩანთაში?
- მგზავრობის თადარიგი საოჯახო აფთიაქის ჩალაგებით უნდა დავიწყოთ. მასში უნდა ჩავაწყოთ ბამბა, დოლბანდი, ლეიკოპლასტირი, ფურაცილინის ხსნარი, ბრილიანტის მწვანე, სიცხის დამწევი და ტკივილგამაყუჩებელი საშუალებები (პარაცეტამოლი, იბუპროფენი), ფხვნილი ელექტროლიტების ხსნარის მოსამზადებლად (რეჰიდრონი), ანტიჰისტამინური (ალერგიის საწინააღმდეგო) საშუალებები, თერმომეტრი. ეს ის საშუალებებია, რომლებიც პირველი სამედიცინო დახმარებისთვის დაგჭირდებათ.
- დაგვრჩა კიდევ ერთი და არცთუ უმნიშვნელო პრობლემა: როგორ მოვემზადოთ ხანგრძლივი მგზავრობისთვის?
- განურჩევლად ტრანსპორტის სახეობისა, თუ დასასვენებლად მთის კურორტზე მიემგზავრებით, პატარების უმრავლესობას ეწყება დისკომფორტი: ბოყინი, სლოკინი, გულისრევა, პირღებინება, მუცლის ტკივილი. თადარიგი მგზავრობამდე ერთი დღით დრე უნდა დაიჭიროთ. ბავშვს დაალევინეთ პრეპარატი, რომელიც ამ სიმპტომებს აქრობს. პრეპარატსა და მის დოზას პედიატრი შეგირჩევთ. უშუალოდ მგზავრობის წინ ბავშვს ნუ აჭმევთ, გამგზავრებამდე ერთი საათით ადრე გამოკვებეთ.
- მაგრამ თუ ხანგრძლივი მგზავრობა გველის?
- უმჯობესია, ბავშვს გზაში ნაყიდი არაფერი დაალევინოთ და აჭამოთ. თან წაიღეთ წყლით სავსე ბოთლი, შინ მომზადებული ბუტერბროდი, მარილიანი კრეკერი (ბავშვს მანქანამ რომ არ აწყინოს), პურის ორცხობილა, ყველი, ხილი. თუ ბავშვს საჭმელს მაინც უყიდით, ერიდეთ კრემიან ნამცხვარს, ცივ ხორცს, თევზს, ცივ კვერცხს, მაიონეზით ან არაჟნით მომზადებულ სალათებს - ეს პროდუქტები ბაქტერიების წყაროა, მით უმეტეს, თუ არაჰიგიენურ პირობებშია მომზადებული და მაცივარში არ ინახება. უკეთესია, აირჩიოთ ცხელი კერძი, ხილი, რომელსაც თვითონვე გაფცქვნით. მგზავრობისას ნუ დაივიწყებთ ბავშვის საყვარელ სათამაშოებს, რომლებთან ერთადაც იგი დასაძინებლად წვება. სამი წლისა და უფრო მოზრდილ ბავშვს შეიძლება სათამაშოებისთვის ცალკე ჩანთა ან პატარა ჩემოდანიც გამოვუყოთ, რომელსაც თვითონვე ჩაალაგებს. თან წაიღეთ ორი დიდი პლედი, ერთი - ლეიბზე გადასაფარებლად, რომელზეც ბავშვი დაიძინებს, მეორე - სასტუმროს ნომერში ხალიჩაზე გადასაფარებლად, რათა ბავშვი ზედ თამამად დასვათ, და საწოლზე გადასაფარებლად, სადაც ბავშვს გამოუცვლით, ჩააცმევთ. თან წაიღეთ ღამის ქოთანიც, რომელსაც ბავშვი მიჩვეულია. თუ მანქანით მიემგზავრებით, კარგი იქნება, შეისვენოთ ხოლმე არა მარტო საუზმის, სადილის ან ვახშმის დროს, არამედ შუალედებშიც. მიეცით ბავშვს საშუალება, ირბინოს და მუხლი გამართოს. თუ თქვენი პატარა ჯერ ისევ დახოხავს, მანქანის თავისუფალი სივრცე წინა და უკანა დასაჯდომებს შორის ბარგით ამოავსეთ და ზედ რაიმე რბილი ქსოვილი გადააფარეთ. ეს საცოცავად და დასაძინებლად მშვენიერი ადგილი იქნება. თუ ბავშვს ფეხზე დგომა უნდა, მანქანის იატაკზე დააყენეთ და არა სავარძელზე. მანქანით, თვითმფრინავით ან მატარებლით მგზავრობისას ძალიან მოხერხებულია სპეციალური საწოლი, ჩანთა, კალათა. ბავშვს ამ საწოლით გაუღვიძებლად გადაიყვანთ და გადმოიყვანთ. დედისთვისაც ასე ჯობს, თუმცა ზოგჯერ შეიძლება საწოლის მუხლებზე დადგმაც კი მოუწიოს, მაგალითად, კვების დროს. ჩვილის საკვებად საბავშვო კონსერვები წაიღეთ - ისინი შეგიძლიათ პირდაპირ ქილიდან აჭამოთ. აუცილებელი არ არის, ბავშვს გზაშიც ისეთივე სრულყოფილი კვება ჰქონდეს, როგორიც შინ აქვს. თან წაიღეთ მხოლოდ საჭირო რაოდენობის საკვები, რომელიც მას განსაკუთრებით უყვარს და რომელსაც კარგად ინელებს. ჩვეულებრივ, ბავშვი გზაში უფრო ნაკლებს ჭამს, ვიდრე შინ. თუ მან ბევრად ნაკლები ჭამა, მაშინაც ნუ დაატანთ ძალას. დაე, რამდენიც სურს, იმდენი ჭამოს - ალბათ, მგზავრობისას მცირე ულუფა უფრო სიამოვნებს. ოღონდ საჭმელი უფრო ხშირად უნდა მისცეთ. დაბოლოს, გამგზავრებამდე კონსულტაციისთვის აუცილებლად მიმართეთ თქვენს პედიატრს. კეთილ მგზავრობასა და სასიამოვნო დასვენებას გისურვებთ.
