როგორ გავზარდოთ ნამდვილი მამაკაცი
ყურადღება მიაქციეთ, როგორ ექცევა მამა ვაჟს, რა საკითხებს აგვარებენ ერთობლივად, რაში ვერ თანხმდებიან. დედებისგან განსხვავებით, მამები შვილებს ბევრი რამის ნებას აძლევენ, არ უშლიან: "აქ არ აძვრე, იქ არ წახვიდეო". პირიქით, ზოგჯერ კიდეც ახალისებენ ბიჭუნების ცნობისმოყვარეობას და სირთულეთა გადალახვაში ეხმარებიან. რასაკვირველია, ეს მამაკაცური ქცევის მხოლოდ მაგალითია. ყველა მამა როდია ასეთი, ამიტომ მარტოხელა დედები და ძლიერი ქალები, რომლებიც ყველაფრის საკუთარი ხელით კეთებას არიან მიჩვეულნი, ბავშვების აღზრდასაც თავიანთ თავზე იღებენ, მაგრამ ყოველთვის ვერ ართმევენ თავს. ბიჭისგან ნამდვილი მამაკაცი რომ დადგეს, საჭიროა წიგნებისა და ფილმების გონივრულად გამოყენებაც: ხშირად უნდა ვაჩვენოთ და წავუკითხოთ ისეთი ნაწარმოებები, სადაც ღირსეული ადამიანების ამბავია მოთხრობილი. უმჯობესია, თქვენი შვილის კერპები რაინდები, მუშკეტერები და უსამართლობასთან მებრძოლი სხვა გმირები იყვნენ და არა თანამედროვე ბოევიკებისა თუ კომიქსების საეჭვო პერსონაჟები.
* დაე, ბიჭუნამ თავი მამაკაცად იგრძნოს. 3-4 წლიდან ბიჭუნას მხოლოდ ბიჭური სათამაშოები უყიდეთ. სასურველია, ისინი მშვიდი ფერისა იყოს - მკვეთრი, კვასკვასა ფერები გოგონების პრეროგატივაა. 5-6 წლიდან ბიჭუნას პატარ-პატარა დავალებები მიეცით. მაგალითად, დააჭერინეთ ჩაქუჩი და შესთავაზეთ, მამას ლურსმნის ჩაჭედებაში დაეხმაროს. რაც უფრო ადრე დაიწყებს ბიჭუნა უფროსი მამაკაცების დახმარებას, მით უკეთესი. ეს აამაღლებს მის თვითშეფასებას, ბიჭუნა იგრძნობს, რომ საჭიროა. სკოლამდელ და სკოლის ასაკში ბიჭს უნდა ჩავუნერგოთ პატივისცემა გოგონების მიმართ, ავუხსნათ, რომ გოგონები წინ უნდა გაუშვას, დაეხმაროს. მოზარდ ასაკში ვაჟიშვილს მეტი თავისუფლება მიანიჭეთ. ნება მიეცით, თავად აირჩიოს მეგობრები და მიიღოს გადაწყვეტილებები. ის უფრო მალე ისწავლის, რომ საკუთარ საქციელზე პასუხი თავად უნდა აგოს და დამოუკიდებელ პიროვნებად ჩამოყალიბდება.
* დროდადრო შეაქეთ. ყოველთვის, როცა ბავშვი რაიმე დაბრკოლებას გადალახავს, შეაქეთ, თანაც აქცენტი მის ვაჟკაცობაზე გააკეთეთ: "ყოჩაღ! აი, ასე იქცევიან ნამდვილი მამაკაცები!" საზოგადოდ, ხშირად აქეთ ბიჭუნა, უთხარით, რა ძლიერი, მამაცი, გულადი და გამბედავია. ერთი წლის ბიჭუნასაც კი ქვეცნობიერ დონეზე უკვე ესმის, რას ნიშნავს ვაჟკაცობა. როგორც არ უნდა უნდოდეს დედას, იყოს ძლიერი, ბავშვის აღზრდისას ნუ დაივიწყებს, რომ ის პირველ რიგში ქალია. საჭიროა, ვაჟმა მასში მოსიყვარულე, ნაზი, ალერსიანი, ზოგჯერ სუსტი არსება დაინახოს, რათა ისწავლოს თანაგრძნობა და თანადგომა, გულახდილობა, დედის დახმარება. ეს მას ძლიერი, თავდაჯერებული მამაკაცის თვისებების შეძენაში დაეხმარება.
რა არ უნდა გააკეთოთ ბიჭუნას აღზრდისას
* არ ჩაახშოთ მისი ინიციატივა. ზოგჯერ ქუჩაში გაიგონებთ დედის უხეშ მიმართვას ბიჭუნასადმი: "საით მიძვრები?! ვის ვუთხარი, არ წახვიდე იქით! ნუ ღრიალებ, თავად ხარ დამნაშავე!" გასაგებია, რომ დედები ფრთხილობენ, ეშინიათ, შვილებმა რამე არ იტკინონ, უსიამოვნებაში არ გაეხვიონ, მაგრამ ეს სიფრთხილე ზოგჯერ ბავშვის ინიციატივას ახშობს, ართმევს მას ბავშვობით ტკბობის საშუალებას. იმისთვის, რომ ბიჭუნამ საკადრისი პასუხი გასცეს მოჩხუბარს, გადალახოს სირთულეები და გაიგოს, რატომ არის ესა თუ ის ქცევა სახიფათო, საჭიროა მასთან საუბარი, მასთან ერთად თამაში.
* მეტისმეტად ნუ გაათამამებთ. ცხადია, შეცდომაა ბავშვის ზედმეტად გათამამებაც. მცდარია ასეთი მიდგომა: "ჩემს ბიჭს უნდა ჰქონდეს ყველაფერი, რაც მე მაკლდა". ასეთი მშობლები ისწრაფვიან, ბავშვების მაგივრად თავად მიიღონ გადაწყვეტილება, რითაც თრგუნავენ შვილის ინდივიდუალურობას და დამოუკიდებელი ცხოვრების უნარს.
* ნუ აღზრდით შვილს დოგმებით. არ შეიძლება, ბავშვი აღიზარდოს მკაცრად განსაზღვრული დოგმებით, როგორც ამას ზოგიერთი დედა აკეთებს. ჭამა - მკაცრად განსაზღვრულ დროს, დასაძინებლად დაწოლა - ერთსა და იმავე საათზე, გართობა მხოლოდ იმ თამაშებით, რომლებიც დედას მოსწონს, ბავშვის ტირილის იგნორირება, ჭირვეულობის მკაცრად დასჯა... ასეთი ბიჭუნა გულჩათხრობილ, უპრინციპო მამაკაცად გაიზრდება და შესაძლოა, სამუდამოდ შეიძულოს ქალთა მოდგმა. დაიცავით ოქროს შუალედი, რათა თქვენი ბიჭუნა აღიზარდოს თავისი ქვეყნის ღირსეულ მოქალაქედ და თავად შეძლოს კარგი შვილების აღზრდა.