პირველი თეფში
არავითარ შემთხვევაში არ უნდა გამოვიყენოთ ბავშვის საკვებისთვის ალუმინის ჭურჭელი. დამტკიცებულია, რომ დაძველების პროცესში ალუმინი ძლიერმოქმედ მავნე ნივთიერებებს გამოყოფს. მაღაზიებში ხშირად შევხვდებით ჭურჭელს, რომელიც ძალიან ჰგავს ფაიფურისას. ის პოლიმერული ნაერთისგან - მელამინისგან მზადდება. ასეთი ჭურჭლის შეძენისას დარწმუნებული უნდა ბრძანდებოდეთ, რომ ის ტექნოლოგიური პროცესის სრული დაცვით არის დამზადებული. წინააღმდეგ შემთხვევაში შესაძლოა ფორმალდეჰიდი გამოყოს, ეს ნივთიერება კი არასასურველ ზეგავლენას ახდენს კუჭ-ნაწლავის ტრაქტსა და ცენტრალურ ნერვულ სისტემაზე. პატარა გურმანისთვის ყველაზე შესაფერისი მასალა ჭურჭლისთვის განკუთვნილი სპეციალური პლასტმასაა. მშობლებს მიაჩნიათ, რომ ხე იდეალური მასალაა საბავშვო ჭურჭლისთვის, ვინაიდან ის ეკოლოგიურად სუფთაა. ეს აზრი არ არის მართებული - ხის ფორებში ადვილად შეიძლება ჩარჩეს მიკრობები და ჭუჭყი.
ერთი შეხედვით წვრილმანი
- ბავშვის ჭურჭელი იდეალური უნდა იყოს. მას არც მიკროტალღური ღუმელი უნდა აშინებდეს და არც სარეცხი საშუალებები.
- ნებისმიერი ჭურჭელი უნდა შეესაბამებოდეს სანიტარიულ-ჰიგიენურ სტანდარტს, ამ შესაბამისობას კი სათანადო სერტიფიკატი უნდა ადასტურებდეს. ყურადღება უნდა მიექცეს შეფუთვის ხარისხსაც. ხარისხიანი ჭურჭელი, როგორც წესი, სათანადოდაც არის შეფუთული.
- ბავშვის პირველი თეფში დიდი ზომისა არ უნდა იყოს. იმ პატარებისთვის, რომლებიც ნელა ჭამენ, სპეციალური ორმაგძირიანი თეფში უნდა შევიძინოთ. ორ ძირს შორის სივრცეა, რომელშიც ცხელი წყალი უნდა ჩავასხათ. შედეგად თეფში საკვებს სითბოს დიდხანს შეუნარჩუნებს.
- თუ პატარა ცელქია, მოხერხებული იქნება თეფში, რომელსაც ძირზე რეზინის მისაწოვარი აქვს. ასეთი თეფში მჭიდროდ ეკვრის მაგიდას და ბავშვი მას ვერ ჩამოაცურებს.
- თეფშით მოხერხებულად ისარგებლებენ ბავშვიც და მშობელიც, თუ მას ორი ხელის მოსაჭიდი ექნება.
- პატარას ჭამის სურვილს გავუღვივებთ, თუ ლამაზნახატიან თეფშს შევურჩევთ.
დანა-ჩანგალი
პატარა ბავშვისთვის ყველაზე რთული კოვზის, დანა-ჩანგლის და კვებასთან დაკავშირებული სხვა ატრიბუტების გამოყენების ჩვევის შეძენაა. მათი შერჩევისას მშობელმა მრავალი ფაქტორი უნდა მიიღოს მხედველობაში. უწინარეს ყოვლისა, ბავშვის მტევნის აგებულების ანატომიური თავისებურებები - უნდა გავითვალისწინოთ, რომ ის, რაც სხვებისთვის შესაფერისია, ცაციებს არ გამოადგებათ. პატარა ბავშვს სპეციალური ჩანგალი და კოვზი სჭირდება - პატარა უნდა იყოს და ისეთი ტარი ჰქონდეს, რომ ზედ ხელმა არ ისრიალოს. თავად ჩანგალი და კოვზი შეიძლება იყოს როგორც პლასტმასის, ასევე ლითონის, ტარი კი აუცილებლად პლასტმასისგან უნდა იყოს დამზადებული. მთავარი კი ამ საგნების უსაფრთხოებაა - პატარამ მათი მეშვეობით ვერაფერი ვერ უნდა დაიზიანოს. საუკეთესო მასალა ვერცხლია, რომელსაც ანტიბაქტერიული თვისებები აქვს. ყველა დედამ იცის, რომ თავდაპირველად ყველა ლუკმა ვერ მიაღწევს პირამდე - პიურეს კვალი დაეტყობა ტანსაცმელს, მაგიდას, იატაკს... მაგრამ გაბრაზება არ შეიძლება. დედის ვალია, ყველაფერი მოაწესრიგოს და პატარას წყნარად სთხოვოს უფრო ფრთხილად ჭამა. რა თქმა უნდა, ეს თავდაპირველად ძალიან რთულია, მაგრამ თანდათან ყველაფერი მოგვარდება!