დაუვიწყარი ზაფხული
წყნარი კუთხე
ბავშვი, რომლის ასაკიც 7-8 წელს აღემატება, უკვე დამოუკიდებლობისაკენ ისწრაფვის. ის ხშირად ეძებს ადგილს, სადაც განმარტოება შეიძლება. როგორც წესი, ასეთ ადგილს პატარები თავად პოულობენ. მშობლის ამოცანაა, შეამჩნიოს შვილის მისწრაფება და ხელი შეუწყოს მას საყვარელი ადგილის მოწყობაში. ამისთვის სულ ცოტა რამ დაგჭირდებათ. მაგალითად, გამოუსადეგარი სკივრი, ძველი სურათი ან პატარა მაგიდა. თუ ამ ყოველივეს სამზარეულოდან რამდენიმე ჭიქასაც მიამატებთ, ადგილი შვილთან გულახდილი საუბრებისთვის მალე მზად იქნება.
გენერალური შტაბი
თუ სახლის მახლობლად ან თქვენსავე ეზოში ოთხი ხე ერთმანეთთან ისე ახლოს იზრდება, რომ მათი "შემოღობვა" შეიძლება, სულ ადვილად მოვაწყობთ შტაბს - პატარა ბიჭებისთვის საოცნებო გარემოს. ვერ წარმოიდგენთ, როგორ გაიხარებს ბავშვი. "შტაბის" გადასახურავად შეგვიძლია ძველი მუშამბა ან მტკიცე ქსოვილი გამოვიყენოთ. ბავშვი აუცილებლად დაპატიჟებს "შტაბში" თანატოლებს და თქვენ საშუალება მოგეცემათ თვალყური ადევნოთ, როგორ ამყარებს თქვენი პატარა ურთიერთობას თანატოლებთან, როგორ იქცევა კოლექტივში.
საქანელა
თუ ბავშვი ზაფხულს სოფელში ატარებს, ეზო ისე უნდა მოაწყოთ, რომ პატარამ თავი კომფორტულად იგრძნოს, საამისოდ კი სხვა ატრიბუტებთან ერთად საქანელა ან ჰამაკიც დაგჭირდებათ. მადლობა ღმერთს, დღეს არც ერთი არ არის დეფიციტი, მაგრამ თუ შეძენა ვერ მოახერხეთ, თავადაც შეგიძლიათ საქანელას მოწყობა. უნდა მოძებნოთ მაგარი ხის ნაჭერი, რომელსაც გლუვი ზედაპირი ექნება, ძალიან გამძლე თოკები ხის ძლიერ ტოტზე ჩამოაბათ, ხოლო ხის ნაჭერს კუთხეებზე ნაჭდევები გაუკეთოთ, რათა თოკები მჭიდროდ ჩაიჭედოს შიგ.
საბავშვო მოედანი
პატარებს უყვართ აქტიური დასვენება. უნდა გაითვალისწინოთ მათი მისწრაფება და ეზოს ნაწილი აქტიური თამაშებისთვის გაუთავისუფლოთ. რა თქმა უნდა, აუცილებლად უნდა მოაწყოთ ქვიშის მოედანიც. პატარებს ძალიან უყვართ ქვიშაში თამაში, გვირაბების გათხრა, ციხესიმაგრეების შენება და "პასკების ცხობა". საამისოდ თანაბარი წარმატებით შეიძლება გამოვიყენოთ როგორც ქვიშაში "სამუშაო" სპეციალური კომპლექტი, ასევე იოგურტის კოლოფი, ხილფაფის ქილა და სხვა ასეთი საგნები. პატარა უნდა მივაჩვიოთ, რომ თამაშის შემდეგ ნიჩაბი და სათლი, ფორმები და ქილები შეკრიბოს და შეინახოს. ასე ეჩვევა ბავშვი წესრიგს. უფროსები ყურადღებით უნდა იყვნენ, რათა ქვიშის მოედანი შინაურმა ცხოველებმა ფიზიოლოგიური მოთხოვნილების დასაკმაყოფილებლად არ გამოიყენონ. უმჯობესია ქვიშის მოედნისთვის ისეთი ადგილი შევარჩიოთ, რომელიც დილით მზის სხივებით თბება, შემდეგ კი ძირითადად ჩრდილშია - ქვიშა დილით კარგად გათბება და ტემპერატურას დიდხანს შეინარჩუნებს.
ერთი შეხედვით უბრალო მორი
ბავშვის ფანტაზიას საზღვარი არ აქვს. მას შეუძლია, უბრალო ხის მორი საკუთარი წარმოსახვის წყალობით ნამდვილ სათამაშოდ აქციოს. ბიჭისთვის ის ზოგჯერ ცხენია, ზოგჯერ თვითმფრინავი, ზოგჯერ მანქანა, გოგონებისთვის კი მორი შეიძლება პოდიუმად იქცეს. პატარა ქალბატონი მასზე ამაყად დააბიჯებს და ცდილობს, წონასწორობა დაიცვას. ასე რომ, თუ ეზოში მორი დევს, ნუ იჩქარებთ მის მოცილებას. მთავარია, მის გვერდით ქვა ან მეორე მორი არ ეგდოს, რათა პატარა უეცრად არ დაშავდეს.
ლაშქრობა
პატარა ბავშვი მანძილს სათანადოდ ვერ აფასებს. სახლიდან ოდნავ მოშორებით წასვლის შემთხვევაშიც შეგვიძლია შევუქმნათ ილუზია, რომ სადღაც შორს ვართ და ამ ყველაფერს "ლაშქრობაც" დავარქვათ. წინასწარ მოამზადეთ მზის ქუდი, წყალი, საგზალი, პატარა პლედი, რათა მიწაზე დაჯდომა შეძლოთ, ეს ყველაფერი ჩაალაგეთ მსუბუქ ჩანთაში (ბავშვიც დაიხმარეთ) და გზას გაუდექით. ისაუბრეთ ტყის მშვენიერებაზე, შეაგროვეთ ფოთლები, დაკრიფეთ ყვავილები, უსმინეთ ჩიტებს... ეს ყველაფერი ერთი შეხედვით უბრალო რამ არის, მაგრამ პატარა ბავშვებზე ხშირად წარუშლელ შთაბეჭდილებას ახდენს.