მეორე დედა
ძებნა დაიწყეთ მეგობრების, ნაცნობების, ნათესავების გამოკითხვით. სავსებით შესაძლებელია, ვინმე გირჩიონ და საქმიანი რჩევებიც მოგცენ. თუ აქედან არაფერი გამოვიდა, შეგიძლიათ მიმართოთ სპეციალურ სააგენტოს. იქ მოისმენენ თქვენს მოთხოვნებს და შემოგთავაზებენ რამდენიმე ვარიანტს. მაგრამ მანამდე თავად უნდა გაარკვიოთ, როგორ ძიძას ეძებთ, რა უნდა შეეძლოს და რა თანხას შესთავაზებთ მას. ძიძის ანაზღაურება დამოკიდებულია იმაზე, რამდენ ხანს გაატარებს ის თქვენს პატარასთან. ამის განსაზღვრა ძალიან მნიშვნელოვანია. თუ დედა ჯერ სწავლობს და ან ნახევარ განაკვეთზე მუშაობს და საამისოდ დღეში რამდენიმე საათი სჭირდება, მაშინ გამოგადგებათ ძიძა საათობრივად ანუ არასრული დატვირთვით. ის ბავშვთან გაატარებს დღეში 4-6 საათს. არიან ძიძები, რომლებიც სრულ სამუშაო დღეს - 12 საათს რჩებიან და კვირაში 5 დღეს მუშაობენ. მათი ანაზღაურება, ცხადია, უფრო მაღალია. თუ თქვენს შვილს ცუდად სძინავს და ღამღამობით ხშირად ტირის, თქვენ კი დღის განმავლობაში ისე იღლებით, რომ ძალა არ გყოფნით, წამოდგეთ და მიხედოთ, ამ შემთხვევაში დაგეხმარებათ ღამის ძიძა. ის მოვა საღამოს, რათა პატარა ძილის წინ აბანაოს და დააძინოს, და წავა დილით, მას შემდეგ, რაც ბავშვი გაიღვიძებს და ისაუზმებს. ღამით ძიძა ყურადღებას მიაქცევს ბავშვს, აჭმევს, თუ ატირდა, დაამშვიდებს, თუ დასჭირდა, საფენს გამოუცვლის. ასეთ ძიძებს, როგორც წესი, საათობრივი ანაზღაურება აქვთ. თუ მუდმივად გჭირდებათ მცოდნე და გამოცდილი ადამიანის დახმარება, დაიქირავეთ ძიძა, რომელიც თქვენთან იცხოვრებს, ყოველთვის თქვენს გვერდით იქნება და ნებისმიერი პრობლემის მოგვარებაში დაგეხმარებათ, თუმცა ასეთი მომსახურება საკმაოდ ძვირი ღირს. გარდა ამისა, მოგიწევთ ძიძისთვის ცალკე ოთახის გამოყოფა ან საწოლის დადგმა ბავშვის ოთახში. კიდევ ერთი: უცხო ადამიანთან ერთ ჭერქვეშ ცხოვრება ადვილი არ არის, ოჯახში ახალი წევრის მიღებისას უნდა გაითვალისწინოთ, რომ მას აქვს თავისი ჩვევები და მათთვის ანგარიშის გაწევა მოგიწევთ.
გამოცდილებას + სიყვარული
კარგი ძიძა უნდა ფლობდეს განსაზღვრულ ჩვევებს, რომლებიც აუცილებელია ბავშვთან მუშაობისას, შესანიშნავია, თუ აქვს უმაღლესი პედაგოგიური, ფსიქოლოგიური ან სამედიცინო განათლება, მაგრამ თავიდათავი მაინც ბავშვების სიყვარულია. გაითვალისწინეთ: წლამდე ასაკის ბავშვების მოსავლელად სხვაგვარი გამოცდილებაა საჭირო, ვიდრე წელს გადაცილებული ბავშვების მოსავლელად. შესაბამისად, განსხვავებულია ფასებიც. ჩვილი ბავშვის მოვლა განსაკუთრებული პასუხისმგებლობაა. თუ გსურთ, თქვენი შვილი პატარაობიდანვე ორ ენაზე ლაპარაკობდეს, საამისოდ ძიძა საგანგებოდ უნდა მოიძიოთ და, ცხადია, მეტის გადახდაც მოგიწევთ. დიდად ფასეულია ბავშვის ფიზიკური და ინტელექტუალური განვითარებისთვის საჭირო მეთოდების ცოდნაც. უმჯობესია, ძიძის ყველა მოვალეობა წინასწარ ჩამოაყალიბოთ და ხელშეკრულებაში ჩაწეროთ, რათა შემდგომ არ გაჩნდეს პრეტენზიები ერთმანეთის მიმართ. კვება, გასეირნება, მასაჟი, ბავშვისა და მისი ნივთების მოვლა - ყველა წვრილმანი წინასწარ უნდა იყოს შეთანხმებული. ძიძის შერჩევა ძალიან ფაქიზი თემაა. თქვენ მას ანდობთ ყველაზე ძვირფასს, რაც გაგაჩნიათ - თქვენს შვილს, თანაც იმ ასაკში, როდესაც იყრება ბავშვის პიროვნების საძირკველი, ამიტომ უდიდესი მნიშვნელობა აქვს, ვის ხელში აღმოჩნდება პატარა. მის ბუნებაზე, ადამიანურ თვისებებზე, განათლებაზე, ინტელექტზე, მისწრაფებებსა და ჩვევებზე იქნება დამოკიდებული თქვენი შვილის აღზრდა და გავითარება. ამიტომ დიდი ყურადღება და დაკვირვება გმართებთ. რეკომენდაციები აუცილებლად გადაამოწმეთ, დასვით კითხვები, ნუ მოგერიდებათ, გამოჩნდეთ ზედმეტად ცნობისმოყვარე - ძიძის არჩევისას დაშვებული შეცდომა შესაძლოა საბედისწერო აღმოჩნდეს.