მარიკა დვალი

არადა ყველამ როდი იცის, როგორ ჩააწვეთოს ბავშვს წვეთები ცხვირში, თვალში ან ყურში. ვინც იცის, იმედი გვაქვს, არ შემოგვწყრება და ერთხელ კიდევ გადაამოწმებს, სწორად ასრულებს თუ არა მანიპულაციებს.

ცხვირში ჩაწვეთების ტექნიკა

ჩაწვეთებამდე აუცილებელია, ცხვირის ღრუ გამოასუფთაოთ და გამოამშრალოთ. საამისოდ გამოიყენეთ სპეციალური ჩხირები, რომლებსაც ორივე მხარეს ბამბა აქვს დახვეული. ეს სჭირდებათ ჩვილი და უმცროსი ასაკის პატარებს, მოზრდილებს კი ასწავლეთ, თვითონ გამოისუფთაონ ცხვირი ერთჯერადი ხელსახოცით. მხოლოდ ამის შემდეგ შეიძლება პიპეტით ცხვირში ხსნარის ჩაწვეთება.

რა მდგომარეობაში უნდა იყოს ბავშვი?

ჩვილი და უმცროსი ასაკის ბავშვები დაისვით მუხლზე და ოდნავ გადაიწვინეთ მარცხენა მკლავზე, მარჯვენით კი თავი დაუკავეთ და შესაბამის მხარეს მიუბრუნეთ. აუცილებლად დაგჭირდებათ დამხმარე, რომელიც ბავშვს ორივე ნესტოში 1-2-წუთიანი ინტერვალით პიპეტით ჩააწვეთებს 2-3 წვეთ ხსნარს.

მოზრდილი ბავშვი დასვით სკამზე და თავი საზურგეზე დაადებინეთ ან ზურგზე დააწვინეთ და თავქვეშ პატარა ბალიში ამოუდეთ. პროცედურა გაიმეორეთ დღეში 3-4-ჯერ, რა თქმა უნდა, ექიმის დანიშნულებისამებრ.

ყურში ჩაწვეთების ტექნიკა

შუა ყურში მიმდინარე ანთებითი პროცესის დროს ხშირად ინიშნება ყურში ჩასაწვეთებელი სამკურნალო საშუალებები. ბავშვებს, განსაკუთრებით - წლამდე ასაკში, ზედა სასუნთქი გზების მწვავე რესპირაციული დაავადებები ხშირად ურთულდებათ შუა ყურის ანთებით - ოტიტით, მაგრამ თუ ყურიდან გამონადენი შეამჩნიეთ, ნუ იჩქარებთ რამის ჩაწვეთებას ექიმის გარეშე! ჩაწვეთებამდე აუცილებელია, ხსნარი სხეულის ტემპერატურამდე გაათბოთ. ამისთვის შეგიძლიათ ბოთლი ჩადგათ თბილ წყალში ან ხელში დაიჭიროთ, ვიდრე ხსნარი სასურველ ტემპერატურას მიაღწევს. შემდეგ პიპეტით ამოიღეთ და ხელისგულზე დაწვეთებით შეამოწმეთ. ცივი ხსნარის ჩაწვეთებამ შესაძლოა თავბრუხვევა გამოიწვიოს. პატარას ყურები ბამბიანი ჩხირით გამოუსუფთავეთ და მანიპულაციას შეუდექით.

რა მდგომარეობაში უნდა იყოს ბავშვი?

ბავშვი, განურჩევლად ასაკისა, დააწვინეთ ზურგზე და თავი ისე დაუჭირეთ, რომ მტკივანი ყური ზევით მოხვდეს. გარეთა სასმენი არხი რომ გაასწოროთ, მცირე ასაკის ბავშვს ყურის ნიჟარა ოდნავ ჩამოუწიეთ, ხოლო მოზრდილებს მაღლა აუწიეთ და უკან გადაუწიეთ. პიპეტი დაიჭირეთ მარჯვენა ხელში, ყურის ხვრელის მიმართ ვერტიკალურად, და ჩააწვეთეთ 5-6 წვეთი. ჩვილ ბავშვებს პროფილაქტიკის მიზნით წამალს ორივე ყურში აწვეთებენ, მოზრდილებს კი მხოლოდ დაავადებულ მხარეს. ჩაწვეთების შემდეგ ბავშვი 15-20 წუთს გააჩერეთ ზურგზე მწოლიარე. პროცედურის დამთავრების შემდეგ გარეთა სასმენი ხვრელი მშრალი ბამბის ტამპონით გაუწმინდეთ. ჩვილის ყელ-ყურ-ცხვირის ანატომიური აგებულების თავისებურებათა გათვალისწინებით ყურისა და ცხვირის წვეთები ერთდროულად ინიშნება.

თვალში სამკურნალო პრეპარატების შეყვანის ტექნიკა

პროცედურის ჩატარებამდე და მის შემდეგ ხელები კარგად დაიბანეთ. თუ პიპეტში ხსნარი დარჩა, ბოთლში აღარ ჩააბრუნოთ, გადაღვარეთ. პროცედურისთვის დაგჭირდებათ დამხმარე, რათა ბავშვს თავი, ხელები და ფეხები გაუკავოს. ბავშვის მდებარეობა ბავშვი დააწვინეთ ზურგზე, დამხმარეს მისი გაკავება სთხოვეთ, თქვენ კი მარჯვენა ხელში პიპეტი დაიჭირეთ, მარცხენა ხელით ჩამოუწიეთ ქვედა ქუთუთო და თვალის გარეთა კუთხეში ჩააწვეთეთ 1-2 წვეთი სხეულის ტემპერატურამდე შემთბარი ხსნარი. ამგვარივე მანიპულაციას მოითხოვს თვალის მალამოს წასმაც. მალამო ესმება გარეთა კუთხიდან სპეციალური მინის ჩხირით. შემდეგ საჭიროა თვალის დახუჭვა და მალამოს შეზელა მსუბუქი მასირებით.

კიდევ ერთხელ შეგახსენებთ: თვალში, ყურსა თუ ცხვირში ჩასაწვეთებელი ნებისმიერი სამკურნალო საშუალება ექიმის მიერ სწორედ თქვენი შვილისთვის და სწორედ ამ შემთხვევისთვის უნდა იყოს დანიშნული. გახსნილი წამლის გამოყენება მხოლოდ მკურნალობის დასრულებამდე შეიძლება. დარჩენილი წვეთები უნდა გადაღვაროთ. რამდენიმე თვის შემდეგ მისი გამოყენება საშიშია.