ბრუქსიზმი, იგივე, კბილების კრაჭუნი
რომელიც უფრო მეტად გავრცელებულია ბავშვებში. მისი გამომწვევი მიზეზი ბოლომდე დადგენილი არ არის. მიუხედავად ამისა, არსებობს გარკვეული ვარაუდები, რაც შეიძლება კბილების კრაჭუნს (ბრუქსიზმს) იწვევდეს.
პირველ რიგში, რასაც ყურადღება უნდა მიექცეს, არის ბავშვის ნერვული სისტემის მდგომარეობა - ნერვული დაძაბულობა, გადაღლა, ფსიქოლოგიური სტრესი, ამის ერთ-ერთი გამოვლინება კი, შესაძლოა კბილების კრაჭუნი იყოს.
სხვა მიზეზი შესაძლოა იყოს პათოლოგიური პროცესები პირის ღრუში (მაგალითად, კბილის ტკივილი, ნერწყვის გამოყოფის გაძლიერება და სხვა), ასევე ყურის ტკივილი, სხვადასხვა პრობლემა ცხვირის არეში.
კბილების კრაჭუნი სიცოცხლისთვის საშიში არ არის. დაბალია იმის ალბათობა, რომ ამ დროს ბავშვმა შეიძლება კბილები დაიზიანოს. გარკვეული პერიოდის გასვლის შემდეგ ეს პროცესი თავისთავად წყდება და ბავშვებიც ჩვეულებრივად ვითარდებიან.
როდესაც ბავშვი კბილებს აკრაჭუნებს, პირველ რიგში, უნდა დააკვირდეთ მას. ასევე მიაქციეთ ყურადღება ბავშვის ძილს, ხომ არ არის აღელვებული, შეშინებული ან დათრგუნული, დაათვალიერეთ მისი პირის ღრუ, კბილების მდგომარეობა. შეამოწმეთ ყელის, ხახის, ყურების მდგომარეობა, დაადგინეთ ხომ არ აღენიშნება პრობლემები საჭმლის მომნელებელ სისტემაში.
ამრიგად, ბრუქსიზმის გამომწვევი მიზეზი სხვადასხვა რამ შეიძლება იყოს. ბავშვობის ასაკში განვითრებული ეს პრობლემა, ხშირ შემთხვევებში მკურნალობას არ საჭიროებს, რადგან იგი თავისით გაივლის 6-7 წლისთვის.