როდესაც ბავშვს ტემპერატურა უწევს
როდის უნდა ვიყოთ განსაკუთრებით ყურადღებით და მივმართოთ ექიმს?
- როდესაც ბავშვს აქვს ნევროლოგიური ან გულ-სისხლძარღვთა სისტემის დაავადებები;
- მაღალი ტემპერატურისას, რომელსაც თან ახლავს კანის სიფერმკრთალე ან მოლურჯო ელფერი, კიდურების გაციება, ხშირი ზედაპირული სუნთქვა;
- ღებინებისა და თხევადი განავლისას;
- მუცელში მწვავე ტკივილისას;
- 3 თვემდე ასაკის ბავშვების შემთხვევაში.
შესაძლებელია ბავშვს ჰქონდეს 38,5 გრადუსი ტემპერატურა, მაგრამ კარგად გრძნობდეს თავს, თამაშობდეს, ჭამდეს, არ ჭირვეულობდეს. თუ დაბალი ტემპერატურისას მდგომარეობა გაუარესდა, აუცილებლად მივმართოთ ექიმს.
განასხვავებენ ტემპერატურის მატების შემდეგ სტადიებს:
- სუბფებრილური ტემპერატურა - 38 გრადუსამდე;
- ფებრილური - 38-39 გრადუსი;
- მაღალი - 39-დან 41 გრადუსამდე;
- ჰიპერთერმული - 41 გრადუსზე მაღალი.
ტემპერატურის მცირედ მომატება შეიძლება აღინიშნოს აქტიური თამაშის დროს, ხოლო წლამდე ასაკის ბავშვებს შორის 37,2 გრადუსამდე ტემპერატურის ცვლილება შეიძლება ჩაითვალოს ნორმად, თუ სხვა საყურადღებო სიმპტომი არ აღინიშნება.
როდესაც ბავშვი ცხელია (მათ შორის - ხელები და ფეხები), ხოლო კანი ვარდისფერი ან მოწითალო აქვს და უმნიშვენლოდ ჭირვეულობს, შეგვიძლია ჩავთვალოთ, რომ ორგანიზმი ებრძვის ვირუსს. სხეულის ტემპერატურის მომატებისას ანტისხეულები გამომუშავდება, რომლებიც ანადგურებენ მავნე ბაქტერიებსა და ვირუსებს, ეხმარებიან დაავადებასთან გამკლავებაში, ამიტომ ტემპერატურის დაწევა არასასურველია, თუ მისი ნიშნული არ აღემატება 38,5 გრადუსს. გამონაკლისია ზოგიერთი ნევროლოგიური ან გულ-სისხლძარღვთა დაავადებების მქონე ბავშვები.
რასაკვირველია, ტემპერატურა უნდა დავწიოთ, თუ მოიმატა 39 გრადუსამდე და მეტად.
მაღალი ტემპერატურის დროს ბავშვი არ უნდა ჩავფუთნოთ. ოთახში ჰაერის ტემპერატურა 22 გრადუსი უნდა იყოს და ხშირად განიავდეს. აუცილებელია სითხის მიღება. სითხის ნორმალური მოხმარებაა დღეში 0,1 ლ კილოგრამ წონაზე. სასმელი წყალი სასიამოვნო ტემპერატურისა უნდა იყოს.
შემცივნების დროს ბავშვი უნდა გავათბოთ, დავახუროთ თბილი საბანი და დავალევინოთ თბილი სითხე. თუ ბავშვს არ ამცივნებს, მისი შეფუთვნა არ არის საჭირო.