თინათინ ქორიძე

.

კალციუმი, უპირველეს ყოვლისა, იკარგება საკვების თერმული დამუშავებისას. ბოსტნეულის ხარშვის დროს იკარგება მისი მეოთხედი, ამიტომ სასარგებლოა ნახარშიც. ისეთი ბოსტნეულის ფოთლები, რომლის ფესვებსაც საკვებად ვიყენებთ, მაგალითად: ჭარხალი, ბოლოკი და ა.შ., უფრო მეტ კალციუმს შეიცავს, ვიდრე ბოსტნეული. სტაფილოდან ორგანიზმი ითვისებს კალციუმის 13%-ს, რძე და რძის პროდუქტები, გარდა კარაქისა, ბოსტნეულსა და ხილთან კომბინაციაში კალციუმის საუკეთესო წყაროა.

• კალციუმის ათვისებას აუმჯობესებს

კალციუმის უკეთ ასათვისებლად ბოსტნეულის სალათებს შეგიძლიათ მოასხუროთ ლიმონის ან ფორთოხლის წვენი. ორგანიზმში კალციუმ-ფოსფორის ბალანსის ძირითად მარეგულირებლად D ვიტამინი ითვლება, ის აბათილებს ყველა იმ ნივთიერების მოქმედებას, რომლებიც კალციუმის შემბოჭველად ითვლება. ამდენად, კალციუმის ნაკლებობის თავიდან ასაცილებლად ბავშვისათვის განსაკუთრებით მნიშვნელოვანია D ვიტამინით დროული პროფილაქტიკა.

კალციუმის ათვისებას ასევე აუმჯობესებს:

• A, C და B ჯგუფის ვიტამინები;
• საკვებში არსებული ცილა;
• ლაქტოზა (რძის შემადგენლობაში შემავალი შაქარი);
• ლიმონმჟავა.

კალციუმს უკეთ ითვისებს ორგანიზმი არა უზმოზე, არამედ ჭამის დროს ან მის შემდეგ. ბავშვები საკვებით მიღებული კალციუმის 60-70%-ს ითვისებენ, ამისათვის საჭიროა სწორი კვება.

კალციუმის ათვისებას აფერხებს:

• მჟაუნმჟავას შემცველი პროდუქტები: ისპანახი, მჟაუნა;
• ლერწმის შაქარი, კაკაო, შოკოლადი;
• ზოგიერთი სახეობის ფაფა, რომელიც შეიცავს ფიტინს. ასეთია მანანის ბურღულის ფაფა.

ამიტომ გირჩევთ, ეს საკვები პროდუქტები მთლიანად ამოიღოთ ბავშვის რაციონიდან, თუ მას აღენიშნება კალციუმის დეფიციტი.

• რომელი საკვები შეიცავს ყველაზე მეტ კალციუმს?

რძე და რძის პროდუქტები კალციუმს ორგანიზმისთვის ადვილად ასათვისებელი ფორმით, ფოსფორთან ოპტიმალურ თანაფარდობაში შეიცავს. 0,5ლ ან 2,5 ჩაის ჭიქა ძროხის რძე საშუალოდ 600 მგ კალციუმს შეიცავს, რაც 50-80%-ით აკმაყოფილებს ბავშვის ორგანიზმის მოთხოვნილებას განურჩევლად ასაკისა. კალციუმის შემცველობა უფრო მეტია ყველსა და ხაჭოში. ამჟამად იყიდება სპეციალური პროდუქტები - რძე და ხაჭო, დამატებით გამდიდრებული კალციუმით, 150-200 მგ 100 მლ პროდუქტში.

ბავშვისთვის საკვების, სალათების, სუპების მომზადებისას შეგიძლიათ გამოიყენოთ კვერცხის ნაჭუჭისგან მომზადებული ხსნარი. კარგად გარეცხილი უმი კვერცხის ნაჭუჭი მოათავსეთ ქილაში და დაასხით ვაშლის ძმარი ან ლიმონის წვენი ისე, რომ დაიფაროს და გააჩერეთ 8-12 საათი. კალციუმი ნაწილობრივ გადადის ხსნარში, რომელიც მზა კერძს შეგიძლიათ მოასხათ გემოვნების მიხედვით.

გახსოვდეთ! კალციუმის დეფიციტი ბავშვებში სხვადასხვა სახით იჩენს თავს -

• ძვლების დეფორმაცია;
• კბილების დაგვიანებული ამოსვლა;
• კარიესი;
• ხშირი მოტეხილობები;
• ოფლიანობა;
• გულის რიტმის დარღვევა;
• მადის გაუკუღმართება;
• კანის სიმშრალე;
• ფრჩხილების მტვრევადობა;
• უხეში თმა გამელოტებული უბნებით.

6-18 თვემდე ასაკში კი იწვევს დაავადებას -

• სპაზმოფილიას;
• კრუნჩხვებისადმი მიდრეკილებას, რომელიც უმეტესად გაზაფხულზე გამოვლინდება.

მშობლებო, დროულად დაიჭირეთ თადარიგი, გაზაფხული კარს მოგვადგა!