რაც შეიძლება ორიგინალური!
აქედან გამომდინარე, არც მისთვის საჩუქრის შერჩევაა ადვილი. თქვენ ხომ ძალიან გინდათ პატარას სიხარული მიანიჭოთ და თქვენ მიერ მირთმეულმა საჩუქარმა კარადის თაროზე უქმად არ მოიკალათოს? ამიტომ ამ საქმეს, ანუ საჩუქრის შერჩევას მიუდექით შემოქმედებითად, იმის მიხედვით, დაბადების დღისთვის გინდათ საჩუქარი, საახალწლოდ თუ რაიმე ღირსშესანიშნავი დღისათვის.
მაგალითად, რით შეიძლება გავახაროთ ბავშვი ახალ წელს? ამჯერად უკვე დაგვიანებულია, თუმცა ეს რჩევა მომავალი წლისთვის შეგიძლიათ გაითვალისწინოთ. მაინც რა შეიძლება შევარჩიოთ? ვუყიდოთ კიდევ ერთი სურათებიანი წიგნი, მორიგი თოჯინა თუ მეოცე მანქანა? როგორც ჩანს, ჩვენს პატარებს ყველაფერი აქვთ, რაც შეიძლება ამქვეყნად ინატრო. მაგრამ ამ საკითხის უჩვეულო გადაწყვეტა და მოულოდნელი არჩევანის გაკეთება შესაძლებელია! თუკი წინასწარ იზრუნებთ საჩუქარზე, აუცილებლად გააოცებთ პატარას!
მხატვრებისა და მუსიკოსებისთვის
თქვენი ბავშვი - ნამდვილი პატარა ფერმწერია? ხატავს არა მარტო ფურცელზე, არამედ კედლებსა და თეთრ, ქათქათა ზედაპირზეც კი? სწორედ ის დროა, რომ უყიდოთ საწოლის თეთრეული-გასაფერადებელი. მასზე შესაძლებელია ნებისმიერი რამ დახატოს თქვენმა პატარამ ქსოვილისთვის განკუთვნილი ფლომასტერებით. თანაც, ასეთი თეთრეული ადვილად ირეცხება, ხოლო ნახატი რჩება! ასეთ თეთრეულში დაძინება პატარებს ძალიან მოსწონთ! საერთოდ, პატარების "შემოქმედებას" ყოველთვის უნდა დაუჭიროთ მხარი. გოგონა ან ბიჭუნა ოცნებობს მსახიობი გახდეს? არსებობს სპეციალური საკონცერტო სცენა (ასაწყობი) მიკროფონით - star party. მისი საშუალებით შეგიძლიათ ნამდვილი საზეიმო კონცერტი მოაწყოთ პირდაპირ სახლში. ქსოვილი მაგრდება ორ სადგარზე და იქმნება ნათელი სცენა. სიმღერა შეიძლება უსადენო მიკროფონის საშუალებით, რომელიც აკომპანემენტსაც გაგიწევთ. აქვს ხუთი მელოდია, რამდენიმე რიტმი, ხმის რეგულატორი და აპლოდისმენტებიც კი. სცენა თქვენ უკვე გაქვთ სახლში? მაშინ დასადგმელი მიკროფონის დაყენება სირთულეს აღარ წარმოადგენს. ხომ წარმოგიდგენიათ თქვენი შვილების გაოცება და სიხარული. ეს მართლაც მოულოდნელი საჩუქარი იქნება!
მე მიყვარს ჩემი ცხენი
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
თქვენს ბინაში თუ ოდნავი სიხალვათე მაინც არის, მაშინ იქნებ თქვენი პატარა მართლაც საოცარი საჩუქრით გაახაროთ. ეს არის ახალი ინტერაქტიური მეგობარი - პონი. ეს ცხენი თითქმის ნატურალურ ზომებშია დამზადებული - მისი სიმაღლე 99 სანტიმეტრია. პონი რეაგირებს შეხებაზე, მოფერებაზე, ხელის გადასმაზე, აბრუნებს თავს, ამოძრავებს ყურებს, კუდს, ფრუტუნებს და სტაფილოსაც კი "მიირთმევს". ასეთ ცხენზე დაჯდომაც შეიძლება. იქნებ ასეთმა საჩუქარმა თქვენს პატარას გაუღვივოს ინტერესი ცხენოსნობისადმი?
რა გაქვს ქუდში?
ფოკუსების ჩვენების ცოდნა - ნებისმიერი პატარის ოცნებაა. ეს ოცნება შეგიძლიათ რეალობად უქციოთ თქვენს ბავშვს! აჩუქეთ მას ჯადოსნური ქუდი, რომელშიც შეიძლება მოულოდნელად გაჩნდეს და გაქრეს... კურდღელი. რამდენიმე რეპეტიცია და დღესასწაულზე (ან ერთ მშვენიერ დღეს!) თქვენი გოგონა ან ბიჭუნა მართლა გააოცებს სტუმრებს ნამდვილი ფოკუსებით. გარდა ამისა, არსებობს "კეისები", რომელთა დახმარებითაც ადვილად შეიძლება საკმაოდ ბევრი ფოკუსის ათვისება. გაითვალისწინეთ, რომ ამგვარი "საცირკო ატრიბუტები" შეიძლება შეარჩიოთ როგორც 5-6 წლის ილუზიონისტებისთვის, ასევე უფროსი ასაკის ბავშვებისთვისაც.
ზღაპარი კედელზე
ალბათ ბევრს გვახსოვს, რომ ბავშვობაში დედა ან ბებია გვაჩვენებდა დიაფილმებს - "ჩხიკვთა ქორწილს", "ქორბუდას", "ნახევარქათამას" და ა.შ. კარგად გვახსოვს, როგორ გაჭიმავდნენ თეთრ ქსოვილს ან სულაც ზეწარს, როგორ მოძრაობდა ფირი ან როგორ ისმოდა დედის ან ბებიის ხმა, იმ ტექსტს რომ კითხულობდნენ, რომელიც დიაფილმს ახლდა. რატომ არ შეიძლება ეს საოცარი რამ ჩვენი შვილისთვისაც გავიმეოროთ? რა თქმა უნდა, ახლა თითქმის ყველას აქვს ვიდეომაგნიტოფონი და DVD, მაგრამ დიაფილმების ჯადოქრობას ვერავინ შეცვლის. შეგიძლიათ ასევე შეიძინოთ თანამედროვე ფილმოსკოპი, რომელსაც გამოიყენებთ როგორც რადიოპროექტორს. დიაფილმები ახლაც იყიდება. მათი ერთობლივი ყურება კვლავ აღადგენს მეგობრული ურთიერთობის ატმოსფეროს. განა ეს მშვენიერი საჩუქარი არ არის?
ასეთი საოცარი საჩუქრების შეძენა შეგიძლიათ ინტერნეტმაღაზიებში. ისინი გამოუმუშავებენ თქვენს პატარებს გემოვნებას, ფანტაზიას, გაუფაქიზებენ სულს. დაიმახსოვრეთ, მოულოდნელობა ყოველთვის სასიამოვნო ემოციას იწვევს ბავშვებში...
