ნანა კალანდაძე

გენერალური გეგმა

იქნებ მიმართოთ ასეთ სტრატეგიას: დაჯექით და ყველაფერი კარგად მოიფიქრეთ. შეადგინეთ სია, ვისთვის რის ყიდვას აპირებთ. ჩართეთ ამ სიაში არა მხოლოდ ოჯახის წევრები და სხვა ახლობლები, არამედ მეგობრებიც და კოლეგებიც. შეიძლება კოლეგამ მოგილოცოთ, თქვენ კი მისთვის მილოცვა დაგავიწყდათ; დგახართ უმწეოდ, წითლდებით და უხერხულობისგან მხოლოდ იმის თქმასღა ახერხებთ, რომ მისთვის განკუთვნილი საჩუქარი შინ დაგრჩათ. ასე რომ არ მოხდეს, ყველაფერი წინასწარ გათვალეთ. სასურველია, თუ ამ საკითხს სერიოზულად მიუდგებით. შეიძლება ყველას წინასწარ ჰკითხოთ, რას ისურვებდა საჩუქრად. ალბათ, უმეტესობა გიპასუხებთ, რომ არ იცის. ამიტომ მოფიქრება დაგჭირდებათ. სიაში ყველა სახელის გასწვრივ დაწერეთ საჩუქრის შესაძლო ვარიანტი და დაახლოებით ის თანხა, რომლის გადახდაც შეგიძლიათ. ვაშა, გენერალური გეგმა შედგენილია! ყველა ნაცნობს გამოჰკითხეთ, რის მირთმევას აპირებენ ახლობლებისთვის. აღმოჩნდება, რომ თქვენს გარშემო მყოფებს შეუძლიათ ფასეული იდეების მოწოდება. ამ წელს შეიძლება დაქალს თავისი საყვარელი სერიალის სრული კომპლექტი მიართვათ დვდ-ზე ჩაწერილი (ეს იდეა შეიძლება მეზობელმა ან სხვა ახლობელმა მოგაწოდოთ). ჩამოწერეთ, რომელ დღეს რომელი საჩუქრის შესაძენად წახვალთ და რომელ მაღაზიაში. ყველაფრის ერთ დღეს და ერთ მაღაზიაში ყიდვას ნუ დაგეგმავთ, თორემ შეიძლება იმედგაცრუებული დარჩეთ. ყველა სასურველი ნივთი შესაძლოა ერთ მაღაზიაში ვერ იპოვოთ. თუ სიურპრიზების მოწყობა გიყვართ, მაგრამ გამოკითხვის შემდეგ კონკრეტული შეკვეთა მიიღეთ, ნუ დაღონდებით - ვინ თქვა, რომ ერთ ყუთში მხოლოდ ერთი საჩუქარი უნდა იდოს, შეგიძლიათ თქვენი სიურპრიზიც დაუმატოთ. თუ საჩუქრების საყიდლად ფული არ გყოფნით, შეგიძლიათ სუვენირები თავადვე მოამზადოთ. ეს სასიამოვნო პროცესია, გაცილებით ეკონომიურიც. შეგიძლიათ მიაკითხოთ მაღაზიის იმ განყოფილებას, სადაც იყიდება ე.წ. ბისერები - სხვადასხვა სახის ბიჟუტერიის დასამზადებლად. სხვადასხვა ფორმისა თუ შეფერილობის ბისერისაგან შეიძლება დამზადდეს განსხვავებული სამაჯური, საყურე, მძივი, ბავშვებისთვის საახალწლო გირლანდები. მერწმუნეთ, საკმაოდ ორიგინალური, ლამაზი და პრაქტიკული საჩუქრები გამოგივათ. ბავშვებისათვის შეიძლება შეარჩიოთ ფერადი ფანქრების, ფლომასტერების ნაკრებები, ნაძვის ხის სათამაშოები და მოსართავები. ასტროლოგიის მოყვარულთათვის საჩუქრად წლის სიმბოლო-ცხოველი გამოგადგებათ. მეგობარ ქალებს შეიძლება პარფიუმერიის ნაწარმი მიუძღვნათ. მამაკაცებისთვის გამოგადგებათ: ცხვირსახოცების, წინდების კომპლექტები, ჰალსტუხები, ოდეკოლონი ან სხვა პარფიუმერული საგნები. საახალწლოდ და შობის დღესასწაულისთვის ნამდვილად შესაფერისია ორიგინალური დეკორატიული სანთლები, რომელთა არჩევანი ძალზე ფართოა მაღაზიებში. არის სხვადასხვა შეფერილობისა და ფორმის სანთლები, რომლებიც უმეტესად საზეიმოდაა მორთული და სასაჩუქრედ შეფუთული. ისინი შეგიძლიათ ახლობელთა გემოვნების გათვალისწინებით და მათი ოთახების შეფერილობის შესატყვისად შეარჩიოთ. გამოიყენეთ საახალწლო მისალოცი ბარათები. შესანიშნავი საჩუქარია წიგნი. მკითხველის ასაკისა და ინტერესის გათვალისწინებით შეგიძლიათ მიუძღვნათ სასაჩუქრე ეგზემპლარები. ის ერთნაირად გაახარებს როგორც უმცროსი, ისე უფროსი ასაკის ადამიანს. საახალწლო საჩუქრად ასევე შეიძლება გამოდგეს ახალი წლის კალენდრები, როგორც კედლის, ისე სამაგიდო. ძალზე დიდი მნიშვნელობა აქვს სადღესასწაულო საჩუქრის შეფუთვას. შესაფუთი ფერადი ქაღალდები ან ყუთები შეიძლება საჩუქრის შესატყვისად შეარჩიოთ. ასეთი ფორმით მირთმეული საჩუქარი უკვე საზეიმო განწყობილებას ქმნის. ქალბატონებს განსაკუთრებით გვახარებს საოჯახო ნივთები: ჭურჭელი თუ სამზარეულოს წვრილმანები...

 

მიაწოდეთ სიგნალი

ბევრი ქალი სხვისთვის საჩუქრის შერჩევისას ყოველთვის თავისი მოთხოვნილების გათვალისწინებით იქცევა. ამიტომ ზოგჯერ საჭიროც კია, ახლობელს საკუთარი სურვილის შესახებ სიგნალი მიაწოდოთ, ასე მათ აღარ მოუწევთ თავის მტვრევა, თუ რა მოგიძღვნან. გამოკვლევები გვიჩვენებენ, რომ საახალწლო საჩუქრებისთვის ზრუნვას ადამიანთა 15% ოქტომბრიდან ნოემბრის ბოლომდე იწყებს; 70% საჩუქრებს არჩევს ნოემბრიდან დეკემბრის დასაწყისამდე - დაახლოებით სამი კვირის განმავლობაში; 10% საჩუქრებს ყიდულობს დღესასწაულამდე ერთი კვირით ადრე, თანაც ამას უთმობს მთელ დღეს ან რამდენიმე საღამოს; 5% - "საახალწლო" მყიდველია. ისინი ყველაფერს ერთად იძენენ ერთ მაღაზიაში და თანაც, უკანასკნელ მომენტში.